Read South Giziga HOS 4 Bible Online

HOS 4 - South Giziga bible

HOS 4

¹Israyeley, cinaka mingiɓi ngi Bumbulvuŋ. Bumbulvuŋ ara ga kiita da mizli ngisi ruwuyoy. Asi gwat migisiŋ anta, wuɗa mbur migweˀ ngivi ka anta. Yo a sinaka Buymisemuŋ asi ruwuyo ta ma.

²Nisa vu, tikina vu, kiɗa hirnga, hul waɗ madama ara sikam nga mbuŋ nga mbuŋ. Kiɗa hirnga ara gi aseˀe aseˀe.

³Yo ma na, ruwuy a ndir le ɗoɗok, mizli ngi rahay gar a roko hĩhĩyãm, jom ti gwat misahmi ngi ɓuhoy ati ɗiyuwoyo. Kilif ngi si yamay kwana, a sa ngizlam kap aya.»

⁴Jam lesle! Anja mbur a ji ɓi da mbur ta, anja mbur a ngil mi ta, ko mizli ɗikey, ko ka masay vuna, anja a zli ɓi ngi ji ɓi da mbur ta.

⁵Ti papasa, sar a sa bukum, yo mijiviɗe kwana, sar a sa baŋ ati ka ti duvuɗ aya. I sa taˀa mi da munuko lek ngi wãˀ.

⁶Mizli ɗuwoy a taˀaka mi lek lek ngi wãˀ, asi a sinikiy ta. Ka mungum siniy mata na, ya kwana, y'anta sa ngum i sunuw ta ya, ki masay ɗu mata. Ki puyuk hirnga ti gwat Buymisemuŋ ɗik mudubunuw di le, ya kwana, yi sa puyuk hirnga ti ziri ɗikey aya.

⁷Masayay gar, a gam mungra le avu ya, jijih taŋ na, i sa tiri di gwat ngi mesem.

⁸A zumam di i useˀ ngi mikuli ngi mizli ɗuwoy, migaka ar mungra taŋ na, gwat taŋ mawuɗama, anja sey mizli ɗuwoy a gam mungra haɗa haɗa.

⁹Gwat masa gi avu mizli ati masayaya, i misi purla. I sa cufuɗa taŋ, ɓa a slufaka gwat ngi gi taŋ, i sa wurka taŋ weˀe avu gwat ngi gi taŋ.

¹⁰A sa zumam, a zumam, amma ko a mbam ta, a sa gam sulome, a gam sulome, amma ko a yam ta, asi a pulaka cine mi da Bumbulvuŋ le.

¹¹Gi sulome ati wi ti mbaazla, a zliɗa taŋ lesle le.

¹²Mizli ɗuwoy a cufuɗaka mingiɓi avu kuli dum, yo madubuna taŋ gwata, i mihaŋ naŋhay, asi wuluk ngi gi sulome ara zizaŋ, yo taŋ magam sulome tuwa na, ara muɗaka vu taŋ tivu Buymisemuŋ taŋ avra.

¹³A sirkam le ngi gi mikuli a hirnga muwãhay, a sirkam le ngi wura gwat ngi mikulihey ar li miɗingirey, asi widis migidaŋ ka miter, asi widis madiɗa ati terebeŋhey , asi susuɗuk taŋhaya taŋ zuy zuy! Ziri mongoso kumoy, ara gam sulome, yo ngwas ngi ziri kumoy, ara gam madama.

¹⁴Y'anta sa slufa sulome ngi ziri kum mongosohoy magaka ta, ko madama ngi ngwas ngi ziri kumoy magaka, y'anta slufa ta, asi masayay vuna, tihaŋ taŋ, ada bam ti ngwas sulomeheye baˀa, a wuɗkaka gwat ngi mikuli ati sulome vur Bumbulvuŋhoy: Mizli maslaam wala ngi gwat taka hana na, i mizizahay le.

¹⁵Kum Israyeley, da ki ra gam sulome na, anja ki caka Zudahay anga ta ɓula! Ki ram nga Gilgal, ar li mipal na ta, ki ram nga Betel, ar li ngi vu na ta, yo ki hudumom, ki ɓam: «Bumbulvuŋ naŋ ti siifa» na, ki ɓam ta.

¹⁶Haˀaw! Israyel a gi titrik titrik kaɓa sla mangum ru ta. Na wurenna so na, Bumbulvuŋ a sa pula taŋ kaɓa mapulam ziri tumuŋhoy nga zum sukwa?

¹⁷Pulaka mizli Efrayimeye! Taŋ i mizli mujumom le ati kulihey.

¹⁸Taŋ misam a kiɗ mi le na, mbak gi madama so, Buy taŋhay a wuɗam zli ɓi ngi gi gwat ngi mesem haɗa.

¹⁹Birkataŋ a sa sirta taŋ kaɓa zlara, joˀ mesem a sa ga taŋ ti gwat ngi mikuli taŋhaya.