Read South Giziga HOS 5 Bible Online

HOS 5 - South Giziga bible

HOS 5

¹Kum masayay, cinaka ɓi ani, kum mizli Israyeley, cinam kuy kuy, yo kum ngi mamay buyoy, jikam slimiɗe: kiita mijeŋŋe, anja magaka i kum zleˀe, na a Mispa, ki tiram le kaɓa kwar ngi ji mizli, yo ar muwã Taboro, ki tiram kaɓa zuva ming'aka le,

²mizli miteŋteŋ tahaya, a lam vigiɗ mijileŋ le. Na ya, i ra juw vu ɓa ngi kuta taŋ ti bonoy gar taŋ.

³Sukwi Efrayime, yi si na le, yo Israyeleye, i muɗumohoy avu ya ta. Kum mihizigiɗaka Efrayimey ɓa a gam madama na, vurˀe, Israyeley gar a tiram le taŋ ti dili.

⁴Gwat ngi gi ngi Israyeley na, ngi mo ng'avu Buymisemuŋ taŋ ta, asi wuluk ngi sulome a ro a hur taŋ, yo a sinaka Bumbulvuŋ ta.

⁵Huhumo vu ngi Israyeley vuna tehhe, ara ga sedewo taŋ. Israyeley ati Efrayimeye, ara ram tiɗam tiɗam ar malambaˀ taŋ tehhe, Zudahay kwana, ara ram tiɗam tiɗam asi taŋ ya.

⁶A soko ti tumuŋ ati ˀaw waɗ sla taŋhaya, a soko nga sipa Bumbulvuŋ, amma t'anta sa lumaka ta, asi Bumbulvuŋ a kirih le kileŋ avu taŋ.

⁷A njikaka Bumbulvuŋ le, asi a yam di i ziri ngi madamahay, wurenna, madama a sa zuma taŋ jom ati zlili taŋ milumaka.

⁸Fam tulum a Gibeya, yo fam zara a Rama. A Bet-Aveŋ, wudam widi ngi zli vurum. Sukwi Benjameŋ, a wuɗam a zlukuw ngi kiɗe ti dirba!

⁹Ar hin ngi kuta vu ti bonoyo hirwuy Efrayime, a sa tiri diŋ. I ra ɓi ɓi minjah a wuzla sukwi Israyele.

¹⁰Buy ngi Zudahaya, i mizli migirjaha maakwayay, I sa vunaha himaˀ ɗu na, fuyõ fuyõ ng'ar taŋ.

¹¹Efrayim i muguzuvura le, ar kiita, anta purakaŋ ka mbur ta asi naŋ muhurdum hirdam ngi sipa gwat ngatara lambaˀa.

¹²Amma vur Efrayime, yi sa tiri kaɓa movroko, yo vur hay ngi Zuda, i sa tiri kaɓa gweh gweh.

¹³Efrayimey a puraka jiji taŋ le, yo Zudahay a puraka gwehgweh taŋ le. Joˀ Efrayimey a ram ng'avi Asirihey, dar a slinam mbur ng'avu buy madiɗa, amma buyo naŋ anta mbulukum gu ta, naŋ anta kufukum gwehgweh kumoy na gu ta.

¹⁴Ya jak na, i sa gi avu Efrayimeye kaɓa mobor, avu Zudahaya, i sa zli kiɗa vu kaɓa gawla mobor. Masa puw vu meɗ meɗe, i ya, i sa cuh ti gwat ya mija, ko mbur masa tiɓiy di anta.

¹⁵I sa cuh, i sa mi ngi hay ɗu, hã da taŋ misa ɓam le a zluɓaka le, yo ara ram ti sipikiy. Taŋ misi ar bonoy na, a sa ram ti sipi ɗu.