Read South Giziga HOS 7 Bible Online

HOS 7 - South Giziga bible

HOS 7

¹Rak ti ya mawuɗ mbulo Israyele na, malambaˀ ngi Efrayim ati malambaˀ madiɗa ngi Samari, a njikoko vu. Haˀaw, ara tikinam vu gisiŋ, muhuloy ara cam ng'ar viŋhey, mivi vuhoy a roko kirnini avra.

²Gwat malambaˀ taŋ magaka na, ya Buymisemuŋ i ra si nah na, ko mbur loŋ maɓi kanah ti kwacay naŋ anta. Wurenna gwat ngi gi taŋ a sirta taŋ le, t'ani a mihiri ɗu ani.

³A ra gam jalaɓi ti buy madiɗa, ti ɓi ngi moˀore taŋ na, yo ara gam jalaɓi ti buyoyo ti ɓi ngi gi gilaw taŋ na.

⁴Taŋ gar i migi madamahay. Taŋ kaɓa li di ɗaf munjulili, midi ɗaf mupula ɗiya vu naŋ le, zle ti naŋ mufukuɗa hapa le, hã hapa a slikiɗi.

⁵Ti muguzlum ngi buy ndra madiɗa na, buyoy a kam jiji ɓaˀ ɓaˀ ti mbaazla maja taŋ vu, joˀ buy madiɗa, a ja haŋ da misingir ar mizli,

⁶Asi a kirohoko le, taŋ kaɓa vu munjulili ng'ir li di ɗaf, Mevel taŋ ndus ndus ti ɓi ngi tikina vu. Kap ti duvuɗu, himaˀ taŋ a ro lek leke, ti miprike, a tiɓi giw giw kaɓa li mawur.

⁷Taŋ njulili gar, kaɓa li di ɗaf, a ngizlaka madiɗa taŋhaya le pay, buy taŋhay a ndilam le cek, ani, a wuzla taŋ, ko mbur pal ngi hizigo widi ng'avi ya anta.

⁸Sukwi Efrayim ara pula mizli mekelemey a jumom ng'avi taŋ, naŋ kaɓa sukwi ngi helelem mikefer kefer ngi humbuɗ, mususulo vay pal.

⁹Mulakay ara zumaka gidaŋ naŋ, amma ko naŋ a si na ta, yo mana, hol a bo galaŋ galaŋ a hirnga, amma ko naŋ a si na ta.

¹⁰Huhumo vu ngi mizli Israyeley, ara ga sedewo ngi hirnga taŋ tehhe a muŋ, amma ko a moko ng'avi ya Bumbulvuŋ Buymisemuŋ taŋ ta. gar ti nah kwana, a sipikiy ya Buymisemuŋ ta na si.

¹¹Efrayim a gi cunuˀ cunuˀ, yo i manja lesl kaɓa gonok. A zila Eziptehey ng'ava ma na, naŋ a kil nga Asiri.

¹²Ti taŋ makilam nga Asiri na, yi hiziga zuva ɗu ng'ar taŋ, i ja taŋ kaɓa majam ɗiyuwoy. I cine le, a kusom le si na, i hila taŋ slaɓaɓ.

¹³Taŋ makilam ti ya na, i bonoy avu taŋ! Taŋ mislikiɗam ɓi avu ya na, a zizam le wãˀ! Taŋ magam slir angi ya na, ɓa yi mbuɗo hirnga taŋ sukwa?

¹⁴Taŋ mawudam ng'avi ya na, ti mevel taŋ wãˀ ta. Taŋ tup tup ar li niˀici, a ciraka vuhoyo ɓulot ɓuloto, amma a gaka ngi luuma alkamari nawaya ati mbaazla si. Taŋ mabigaka cine mi taŋ na, da ya.

¹⁵Ya, yi sirka taŋ le, i vula taŋ gidaŋ le, amma taŋ, ara wulkam wuluk malambaˀ ar ya.

¹⁶Da ara moko kwana, anta ng'avi ya ta, taŋ kaɓa lek mukusluro le. Taŋ miɓi mi ngi kuwoy na, a sa ngizlaka buy taŋhayakap ti maslalam, ar hirwuy Ezipte, mizli a sa singiram ar taŋ vurˀe.»