Read South Giziga HOS 8 Bible Online

HOS 8 - South Giziga bible

HOS 8

¹Fam tulum, tilam mi, ar mizli ngir hay ngi Bumbulvuŋ, mendere ara po sar kaɓa kurom, asi mike na, a ngilaka jumoˀay ɗu le, yo gwatay ya mudubuna taŋ di na, a slam huma le ava.

²A ra wudam ng'avi ya: «Buymisemuŋ ndra, ndra Israyeleye, i sunukuw le!»

³Na taŋ vuna a hizigiɗaka gi mezle le avra: Anja mesene taŋ a ɓulaka taŋ.

⁴Manja ya miɓa taŋ si na, a cam buy madiɗahay, manja a cifiɗikiy si na, a cam buyoy. Ɓiri bara ati ɓiri tapasl tapasl taŋhaya, a pam taŋ kulihey, ɓa ngi ziza vu taŋ tehhe a muŋ.

⁵Mizli Samarihey, Bumbulvuŋ a hiziga zuŋ sla kumo le avra! I zuɓ mevel le fõh fõh ng'ar kum. Ɓi ngi ndir manja dili na, kisa ɓusaka ta hã ti vunaka?

⁶Zuŋ sla kum a bo ti ruwuy Israyel, i mbur misina gwat mindiraŋ, ɓi ngi Buymisemuŋ anta ava neˀ le ta. Haˀaw, zuŋ sla ngi Samari na, a sa mam di muwaha le meɗ meɗe.

⁷Taŋ mazligam himiɗ na, a sa gam sifi ngi burgataŋ. A ɓam: «Alkamari, da zingaˀ anta ava ta na, anta tiri hapa ta.» Da ko a tiri hapa tekeɗe kwana, i mulakay masa bugumokoŋ.

⁸Israyel i muzuma le kap, n'ani a wuzla sukwi ngi mizli, kaɓa gwat mupuɗaw mata!

⁹A wulkam, a ram nga Asiri, kaɓa zungu ɓuh mawi hirnga naŋ. Efrayimeye, a hiɗik mangaslay le.

¹⁰Da ko ara wuɗkam gwat ngatara da sukwi ngi mizli kwana, wurenna, yi sa kuso taŋ muduba. Neˀ ng'aka na, a sa jijikam kirkir ti bonoy madiɗa ngi yaramahay magaka taŋ di.

¹¹Efrayim a ɗiyi li gi mikulihey haɗa, ɓa ngi puya mungra, amma, li gi mikuli tayna tuwa, a tiram vaˀa, i jiviɗ ngi gi mungra jaka.

¹²Da ko ɓi ka miɓa ɗaˀ le na, i toho taŋ di sar durmuk kwana, a sa pura ava, kaɓa i gwat nawaya na si.

¹³Ar deɗe ngi mikuli na, a gaka ti useˀ, a zumakaŋ, amma anta cira hiri da Bumbulvuŋ ta. Wurenna i ra wuluk keŋ ar malambaˀ taŋhaya. ara slufa mungra taŋhaya. Sey a mam nga Ezipte a muŋ.

¹⁴Israyel a puyuk hirnga ti mbur migi naŋ le, a ndir mugum ngi buyoy. Zuda kwana, a ndir walahay muguno ti moholoy haɗa. Amma yi saka vu da walahay tayna, a sa wura walahay muguno ti moholoyo kap.