Read South Giziga AMO 1 Bible Online

AMO 1 - South Giziga bible

AMO 1

¹Ɗerewol hana, a ɓi di i ɓi ngi Amos mbur misi ginewey a ruwuy Tekoˀa. A ndir vi cuw ɓa ruwuy a jijik na, Buymisemuŋ a ɓaŋ ɓi vur zumabuy ngi Israyel, a ɓaŋ hirak ti Oziyas ma zum buy a ruwuy Zuda, yo Zeroboˀam mangal ngi Yoˀas i buy angi hirwuy Israyel.

²Amos a ɓi na: «Bumbulvuŋ ara buco ti Siyoŋ kaɓa mobor, yo ˀay naŋ a cino kaˀ ti Zeruzaleme. Li zum ngi ginewey a hiryam le, yo hirnga muwã Karmel a muˀul le cay.»

³Bumbulvuŋ a ɓi ani: «I ra mbiɗa hirnga da mizli Siri ngi Damasay, asi a gam mungra madiɗahay le haɗa, wãˀ naŋ asi hana: a musukuɗoko mizli Galaˀataya le musukuɗ musukuɗ ti ɓiri ngi musukuɗo li. Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata.

⁴I saka vu da hay ngi buy Hazayele, yo i sa wura hay ngi buy Ben-Hadataya.

⁵I sa ngila gwat ngi kilika mizlingreŋ ngi Damasa. Buy ngi Bikat-Avene, i sa kiɗa vagay, waɗ buy Bet-Eden mikaw ti ganday ngi ɓiri na. Akẽh so na, mizli Sirihey a sa jaka taŋ nga Kir. I ya Bumbulvuŋ maɓi.»

⁶Bumbulvuŋ a ɓi na: «I ra mbiɗa hirnga da mizli Filisti ngi Gazahaya, asi a gam mungra madiɗahay le haɗa, wãˀ naŋ asi hana: a fucaka mizli ngir walahaya taˀ gar nga Edom. Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata.

⁷I saka vu da dalam ngi Gazahaya, joˀ vu a sa zuma hay mimezle ngi raˀahaya.

⁸I sa susuyumo buy ngi Asdoto, waɗ buy mikaw ti ganday ngi buyoy a Askaloŋ. I sa ma mevele hirik ng'ar Ekroŋ, dar Filistihey mindiram ti siifa, a sa zizam. I ya Bumbulvuŋ Buymisemuŋ maɓi.»

⁹Bumbulvuŋ a ɓi ani: «I ra mbiɗa hirnga da mizli Fenisi ngi Tirey, asi a gam mungra madiɗahay le haɗa, wãˀ naŋ asi hana: Taŋ i mizli Israyeley mupurla ngbaŋ, ko a kam slimiɗ neˀ le kaɓa i sukum taŋhaya ta. A fucaka mizli ngir walahaya taˀ gar fec fec nga Edom. Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata.

¹⁰I sa nduvuɗa vu da walahay Tire, dar vu a sa zuma hay mimezle ngi raˀahaya.»

¹¹Bumbulvuŋ a ɓi ani: «I ra mbiɗa hirnga da mizli Edomoy, asi a gam mungra madiɗahay le haɗa, vendeke naŋ asi hana: A gidiɗaka sukum taŋ Israyeleye ti maslalam, pak paka, ko mesem neˀ a hiri tekeɗe anta. Taŋ misi mevel fõh fõh tuwa na, anta pulaka nguma vu mbak le ta, yo anta pulaka ji vu a kwacaya mbak le ta, a roko kaŋ kaŋ ara. y'anta pula ɓi ɗu ya mujuwa a mevel ɗu ngi gi na teˀ vur i taŋ si ta.

¹²I saka vu da walahay Temana, dar vu a sa zuma hay mimezle ngi Bosiraˀahaya».

¹³Bumbulvuŋ a ɓi ani: «I ra mbiɗa hirnga da mizli Amoŋhoy, asi a gam mungra madiɗahay le haɗa, wãˀ naŋ asi hana: Ɓa hirwuy taŋ a sik firndiw asi ruwuy Galaˀata na, a nduzoko kwacay ngi ngwas misi ti huroyo. Vurˀe, y'anta sa pula ɓi ɗu ya mujuwa a mevel ɗu na teˀ mata.

¹⁴I saka vu da walahay Raba, tapasa, mizli a sa wudam widi ngi vurum, widi misi tapas musure magi ar burkataŋ gambara, dar vu a sa zuma hay mimezle ngi Rabahaya.

¹⁵A sa jaka buy taŋ nga ruwuy mulak, jom ati soje naŋ madiɗahaya.» I Bumbulvuŋ miɓa.