Read South Giziga AMO 2 Bible Online

AMO 2 - South Giziga bible

AMO 2

¹Bumbulvuŋ a ɓi ani: «I ra mbiɗa hirnga da mizli Moˀapaya, asi a gam mungra madiɗahay le haɗa, wãˀ naŋ asi hana: a zlumaka tesl ngi buy Edomo le hetetete, a tiri buɗ buɗ ka fucu. Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata.

²I saka vu da ruwuy Moˀapa, vu a sa zuma hay mimezle mezle misi a Keriyoto. Mizli Moˀapay a sa micam a wuzla gwatay mahurumom haɗi, a wuzla widi ngi vurum, a wuzla hurum ngi tulum.

³I sa muɗa migi kiita ceɗ ti wuzla taŋ waɗ gawla naŋhaya gar, i sa kiɗa taŋ vagay vagay gar arleˀeŋ.» I Bumbulvuŋ miɓi.

⁴Bumbulvuŋ a ɓi na: «Vur mizli Zudahay makir malla mufaɗ mimbiɗam hirnga na, y'anta sa pula ɓi ya mujuwa a mevel ɗu ngi gi na teˀ vur i taŋ si ta. Asi a pulaka dubun ngi Bumbulvuŋ fuk, a jaka ɓimujuwa naŋhaya ta. Asi slir taŋ miziza cine taŋhay na, a ziza taŋ le ya.

⁵I saka vu da ruwuy Zuda, joˀ vu a sa zuma hay mimezle ngi Zeruzalemeye.»

⁶Bumbulvuŋ a ɓi ani: «I ra mbiɗa hirnga da Israyeley, asi a gam mungra madiɗahay le haɗa, wãˀ naŋ asi hana: mbur mijeŋŋe a hiɗikam di dala le, mbur misi murga a hiɗikam di mapiya piya sar pal. Vurˀe, y'anta sa pula ɓi ɗu ya mujuwa a mevel ngi gi na teˀ mata.

⁷Yo ma na, putukulo mbur misi murga ar murɓuko, may naŋ a ja taŋ haɗa. A zumaka gwat ngi mizli mihina hirngahaya ma. Cine ati mangala a hinam ti ngwas misi purla. Naŋ kine, a hiryaka slimiɗ nga ya Bumbulvuŋ le.

⁸A ciki li gi mikulihey gar na, zanahay, mizli misi murgahay mijikaka taŋ na, taŋ a slam taŋ himaˀ, waɗ tutup tup ar taŋ [1]. Ar hay ngi kuli taŋhaya, ara sam mbaazla taŋ mitikam di vu.

⁹Na ya, ya mingizla mizli Amorihey na, a mihiri taŋ ngbaŋ. Amorihey i mizli madiɗakaɓa miterey, gidaŋ taŋ kaɓa ngi widis madiɗa. I ngizla tizer taŋ le kuɗup wãˀ.

¹⁰Mbak nah vuna le ma na, mubo ti kum ti ruwuy Ezipte i ya. Yˀar li kis kum a wuzlaɓuh mikirɗak kirɗaka, hã vi kukur mufaɗ, ɓa ki tiɓaka hirwuy ngi Amoriheye da kumo.

¹¹A dirba nah, i wini mijiviɗey a wuzla ziri kumoyo. A wuzla ziri gawla kumoyo i wini mizli muvulahay le hadam da Bumbulvuŋ. Naŋ kanah gisiŋ takwa mizli Israyeley? I ya Bumbulvuŋ maɓi.

¹²Mizli ngi si mbaazlahay zleˀe ta, ki vulaka taŋ. Ki tikaka mijiviɗeye, ki ɓaka taŋ: ki njikaka ɓi ngi Bumbulvuŋ ta!

¹³Na y'ani, i wuɗ i kurupukum ndaɗaɗ ndaɗaɗ daˀ arleˀeŋ, kaɓa mota ngi slahay mimbaf ti maslapa ngi alkamari makurup gwat a jiviɗi.

¹⁴Ko mbur mawus vu haɗi, anta sa ndila li ngi ɗumo ta, ko mbur migidaŋ haɗa, anta sa gi gwat gu neˀ le ta, ko bugawla, anta sa lih ta.

¹⁵Mbur misi gulum a duba, anta sa cici deŋ gu ta. Mbur makil haɗa, anta sa lih ta, mbur misi pilis anta sa lih ta.

¹⁶Tapasa, mbur bugawla miwãˀa, a sa kil virzi ti mi. I ya Bumbulvuŋ maɓi.