Read South Giziga JON 2 Bible Online

JON 2 - South Giziga bible

JON 2

¹Akẽh na, Bumbulvuŋ a slino kilif madiɗa kutum, a so nda Zonasa suɗuk. Zonas a ndir a kwacay kilife, hiipas hiipas makir ati duvuɗ duvuɗ makir.

²Naŋ misi a kwacay kilife, a dir dibiɗ da Bumbulvuŋ, Buymisemuŋ naŋ.

³A ɓi: «Angi bonoy mufuniy gidaŋ na, i tumbuluw ka Bumbulvuŋ le: ki mbiɗiy di le. ya misi ar li cifi ngi mizli mumucahaya, i ziluw ɓa ki kilo widi ɗu: ki ciniy ˀay ɗu le.

⁴Ki hizigiy le ng'ar heleleŋ a wuzla mubuliy, ya guzluv a diga a wuzla yam, diɓel ngi yama gar, asi cala asi cala, a mbizlo ng'ar ya.

⁵Hã yi ɓi: Yi muɓula le kileŋ a mihiri ɗike. Dambalaka yi ra wuɗ pura hay ɗik mipal na ngbaŋ.

⁶Yam a ndiy sesẽŋ asi ˀay, ya guzluv a wuzla yam mijileŋ, giziŋ ngisi yamay gijaw gijaw hirnga ɗu.

⁷Yi pi sar le, hã sesẽŋ asi virzi ngi muwãhay, miviŋ ngi ruwuy ngi mizli mumucahay a gicam le kiɗasl kiɗasl ngi wãˀ a hirnga ɗu. Amma ka, yawwa Bumbulvuŋ, Buymisemuŋ ɗu! Ki jiɗo ti ya le ti siifa tir vigiɗe.

⁸Naɓa yi ro fiɗek fiɗek zleˀe, yi wuluk keŋ ar ka, joˀ yi ziluw: «Bumbulvuŋ ɗu» Dar diradibiɗ ɗu a ndil sesẽŋ avu ka, sesẽŋ ar hay ɗik mipal.

⁹Mizli mawuɗam huruk huruk a mbuŋ kulihey ngatara lambaˀhay haɗa na, anja a pulaka sipi jiviɗ taŋ na!

¹⁰Amma ya, i zli dimis ngi guw sise, i guw mikuli, yo gwat ya mija mi ɗike ti naŋ na, i guw di. Haˀaw, malih vu i ka Bumbulvuŋ.

¹¹Akẽh na, Bumbulvuŋ a ɓa kilife ɗaˀ si na, a vunoho Zonasa pitikir a ruwuy.