Read South Giziga NUM 12 Bible Online

NUM 12 - South Giziga bible

NUM 12

¹Moyis a zuɓ ngwas, zuŋ Etiyopi. Miriyam ati Aroŋ a dirɗakaŋ asi ngwas nah.

²A ɓam na: «Bumbulvuŋ miɓi na, i Moyis pal naŋ kwa? A ɓa ndra le ya ta walkwa?» Bumbulvuŋ a cine mingiɓi taŋ na le.

³Moyis i mbur mahin hirnga haɗa, ko mbur mahin hirnga ka naŋ na, anta asi ruwuyo ta ngbaŋ.

⁴Gurjik si na, Bumbulvuŋ a ɓa Moyis, Aroŋ waɗ Miryama: «A ram makir kumo ng'ar guɗuk ngi zlir ti ya.» Dar a ram makir taŋ so.

⁵Bumbulvuŋ a po sar ar musure ngi gazlavay, a cici deŋ a mizlingre guɗuko. A zila Aroŋ ati Miriyama, a kiraham cuw taŋ ng'avaŋ.

⁶Bumbulvuŋ a ɓa taŋ: «Cinaka mingiɓi ɗu ani kuy kuy: Da mijiviɗ ada a wuzla kumo na, ya Bumbulvuŋ, i bigaŋ vu, ɓa a puriy ti kleŋ, yo i ɓaŋ ɓi ar musuwun.

⁷Amma ngi gawla ɗu Moyise naŋ kanah ta, naŋ i mbur magi welele ti mevel purla vur mizli ngi sukwi ɗuwoy gar.

⁸I ɓaŋ ɓi, ndra hiri taˀ taˀ, i ɓaŋ di njah njah, i bigaŋ vu, a puriy ya Bumbulvuŋ le a mbuŋ naŋ. Na kumo, ki zlaka, ki dirɗa gawla ɗu Moyise mbri mbrike?»

⁹Bumbulvuŋ a ji mevel haɗi ar taŋ, a cuh.

¹⁰A dirba gazlavay mupula hirnga guɗuko na, Miriyam a ndir, vu zlip zlip babara ka gugumay, i kukula. Aroŋ a pura na, naŋ ti kukula!

¹¹A ɓa Moyise: «Aw buy ɗu, i zluɓaka le. Ndr'i gilaway, migi mungrahay. Ambuh, ki mbiɗa malambaˀ ndra migaka na, nga hirnga ndra ta.

¹²Da zuŋ a muco le a kwacay mumuŋ manja a ya ka na, dumvu naŋ cah, i muzuma le. Anja Miriyam a tiri kanah ta.»

¹³Dar Moyis a tumbulo Bumbulvuŋ ˀay paɗ a muŋ, a ɓaŋ: «Aw Buymisemuŋ ɗu, inga ɗiyaŋ takwa!»

¹⁴Bumbulvuŋ a mbiɗaŋ di: «Miriyama, da i cine mutufaŋ tazlay nga mihiri na, a sa ndir ti mesem, hã luuma pal takwa! Da kine na, ɓulaka tir walahaya ngi luuma pala ya. A dirba nah, a sa pulakaŋ jiviɗ ngi ci ng'ar walahay a muŋ.»

¹⁵A bam ti Miriyama tir walahaya ngi luuma pal. Israyeley a slikiɗam ta, a kutukoko hã a mo ɗagay.

¹⁶A dirba nah, a slikiɗam baɗ a Haseroto, ara pam a wuzlaɓuh mikirɗak kirɗak ngi Paraŋ.