Read South Giziga NUM 15 Bible Online

NUM 15 - South Giziga bible

NUM 15

¹Bumbulvuŋ a ɓa Moyise:

²«Mingiɓi ani ngi ɓi da Israyeley: Ti kum misa cam le angi hirwuy, ya masa vulukum di, ɓa ki pam anga tuwa na,

³kisa gikiy mikuli ti ginewey. Mikuli mizlam zlam wãˀ malla mikuli ngi ɗiya ɓi. Ki sa gikiy di ngi ɗiya ɓi ngi hudum, malla ngi mongoy kum, malla tapas muguzlumoy. Vurˀe, ki wunam sla, tumuŋ malla ˀaw, naɓa zĩˀĩ taŋ, a sa tislikiy mevel.

⁴Mbur magiy mikuli ti ginew na, a so ti hapa aseˀe ma, kilo makir, fukaɗ fukaɗ ti mal litir pal ti reta.

⁵Da a giy di i mikuli ti tumuŋ zlam zlam malla mikuli ngi jumoˀay na, a so ti mbaazla litir pal ti reta vur zuŋ tumuŋ gar.

⁶Da a giy di ti zlengerek na, a so ti hapa kilo merkeɗ fukaɗ fukaɗ ti mal litir cuw,

⁷waɗ mbaazla litir cuw ngi pusl ma, zĩˀĩ taŋ mundum na, a sa tisliy mevel.

⁸Da naŋ magi da ya Bumbulvuŋ i mikuli ti gusoŋ zlam zlam malla mikuli ngi jumoˀay, ngi ɗiya ɓi ngi hudum malla mikuli ngi luuma zuy na,

⁹a so ti hapa kilo ngoltir, fukaɗ fukaɗ ti mal litir makir,

¹⁰waɗ mbaazla ngi pusl litir makir ma. Ziˀĩ taŋ mundum na, a sa tisliy mevel.

¹¹Da a gam di i mikuli ti gusoŋ, ti zlengerek, ti tumuŋ malla ti ˀaw na, a sa gaka kahana.

¹²Ko da ki gikiy mikuli ti ginew kiteka gar na, sey jom ti gwat ngi vul ya mutoho taŋ, vur hirnga ngi ginew gar na.

¹³Mbur Israyel gar mira giy mikuli misi zĩˀĩ naŋ a tisliy mevel na, a sa ga ti jiviɗ misi kahana.

¹⁴Mizli mulakay misi a wazlaray kum malla mipam a wuzla kum, a gam le dideˀ dideˀ mbeˀmbeˀ na, a sa gikiy mikuli misi zĩˀĩ naŋ a tisliy mevel, kaɓa ngi kum vuna ya.

¹⁵Jum kum gar na, a sa sipi mezegwel misi purla, kum Israyeley waɗ mulakay misi asi ruwuy kumo ma. I mikuli mupuɗaw ngi gi avu dideˀ kumoy nga mbuŋ nga mbuŋ. Ya Bumbulvuŋ, y'anta gi ti Israyeleye pal avu mulakaya ta.

¹⁶Kum ati mulakay misi asi ruwuy kumo, ɓimujuwa ati ɓi micica i misi purla vur kumo.

¹⁷Bumbulvuŋ a ɓa Moyise na:

¹⁸«Mingiɓi ani ɓa ki ɓa da Israyeleye: Da kisa cam le angi hirwuy ya maru ti kum ng'ara na,

¹⁹kum masa zumaka ɗaf ngi diga na, kisa hilam cah ngi vul da ya Bumbulvuŋ.

²⁰Ki sa wuɗam hapa mufukuɗa a hãŋ, joˀ kisa dam di makala ngi vul da ya. Ki coko di cukwaɗ avu hapa kum mufukuɗaka mudumbuŋ. Ki sa tusoko ar vu ngi vul da ya, kaɓa mavulikiy gwat ngi migamay ti sifi.

²¹Naŋ kahana, kisa wuɗam cukwaɗ avu hapa kum mufukuɗaka cikiɗeffe na, kisa tusoko, ki vulikiy di da ya. Ɓiɓi micica hana a sa ndir ngi set vur dideˀ kumoy nga mbuŋ.»

²²Ɓimuɗuvahay, ya Bumbulvuŋ muslufa taŋ slaf slaf ti haŋ ɗu da Moyis na, da kaɓa ki ngilam le purla asi taŋ tir manja sin naŋ,

²³tayna i gwat gar, ya Bumbulvuŋ muvulukum taŋ tihaŋ Moyis, zle ti hin, ya Bumbulvuŋ ɓi micica ɓi nah vur kum, a dirba nah ma na, vur dideˀ vur dideˀ nga mbuŋ,

²⁴da mungra miga miwaˀwaˀ ta nah na, a cuh manja jum ngi mizli a sinaka kaɓa a gam mungra le ta na, jum ngi mizli gar, a sa gikiy mikuli ti gusoŋ zlam zlam, misi zĩˀĩ naŋ a tisliy mevel, waɗ hapa ngi vul ati mbaazla ngi pusl kaɓa sirik kum, waɗ mikuli ti bazuway ngi zuɓa mungra.

²⁵A dirba nah, masay a sa ga mezegwel ngi zuɓa mungra ngi Israyeleye gar, joˀ ya Bumbulvuŋ i sa pula taŋ mungra taŋhaya. Naŋ kine, nah na, i mungra kum migaka tir manja sin naŋ. Vurˀe, ki gikiy mikuli ti ginew zlam zlam, waɗ mikuli ngi pula mungra miga tir manja sin naŋ.

²⁶I sa pula mungra ngi jum ngi Israyeleye gar waɗ ngi mulakay misi asi ruwuy taŋhaya. Asi i mizli gar migaka mungra nah tir manja sin naŋ.

²⁷Da i mbur purla migi mungra tir manja sin naŋ na, a sa gi mikuli ngi puya mungra ti ˀaw ngi vi pal.

²⁸Masay a sa ga mezegwel ngi puya mungra ngi mbur nah na daˀ a mbuŋ ɗu, i sa pulakaŋ mungra naŋ.

²⁹Ko da i mbur Israyel malla i mulak misi asi ruwuy taŋ kwana, mbur migi mungra le tir manja sin naŋ gar na, ɓimujuwa vur taŋ, naŋ purla si.

³⁰Amma da mbur Israyel malla mulak, a gi mungra le waˀwaˀ na, naɓa a zi di i ya Bumbulvuŋ ti zi, a sa gwahaka ti wuzla mizli avra.

³¹Mbur nah a sa ndir ti mungra naŋ, anja ki ɓulaka avra, asi a hirsa mingiɓi ɗu le, yo a ngila ɓimuɗuva ɗu le.

³²Ti Israyeley misi a wuzlaɓuh mikirɗak kirɗak na, mizli a lumam mbur kasl ar li juwa dum tapas sabat.

³³A soko di nga mbuŋ Moyis ati Aroŋ waɗ jum ngi mizli gar.

³⁴A jiginakaŋ kuy kuy. Asi a cicaka ɓi ngi bonoy taŋ masa gakaŋ di t'aruŋ.

³⁵Dar Bumbulvuŋ a ɓa Moyise: «Sey a sa kiɗaka mbur nah na vagay, kisa bam di nga duba gala, ɓa jum ngi mizli gar a kuyupakaŋ ti ɗugur.»

³⁶Jum ngi mizli gar, a bam ti mbur tuwa nga duba gala, a kuyupakaŋ ti ɗugur, a muc. Ɓi Bumbulvuŋ muɗuva da Moyis na, i hana so.

³⁷Bumbulvuŋ a ɓa Moyise:

³⁸«Ɓa Israyeleye na: Kum vuna ati dideˀ kumoyo, kisa gam gwat pecek pecek avu mi ngi zana kumoyo, yo cakaŋ gugumay gagaza wit wit.

³⁹Ki sa kam zana misi mi nah pecek pecek. Da kum misa puraka mi ngi zana mipecek pecek tuwa le na, kisa wulkam keŋ ar ɓimuɗuva ɗuwoy gar, joˀ kisa gam taŋ slra. Da kine na, naɓa mevel kumoy ati hiri kumoy anta sa hiziguɗukum, ɓa ki gam lambaˀ lambaˀ ta.

⁴⁰Vurˀe, kisa wulkam, ɓa ki gam slra ti ɓimuɗuva ɗuwoyo gar, kisa bigaka njah, kum inga yahay.

⁴¹I ya Bumbulvuŋ Buymisemuŋ kum. I bo ti kum ti ruwuy Ezipte, ɓa yi tiri Buymisemuŋ kum. Haˀaw, yi Bumbulvuŋ Buymisemuŋ kum.»