Read South Giziga NUM 16 Bible Online

NUM 16 - South Giziga bible

NUM 16

¹Mbur levi ada, a zilaka Kore, i mangal ngi Isar, mbur Kehat, a pa mi da ti Dataŋ ati Abiram ziri ngi Eliyapay, waɗ da On, mangal ngi Pelet.

²A pa taŋ mi ɓa a slikiɗam ɓi ar Moyise. Mavulaka taŋ gidaŋ i mizli skat cuw ti kukur zlum a wuzla Israyeley, i buyɓi ngi jumoy, mizli micawwa ngir kus madiɗahay, mizli misi slimiɗ taŋ mazil kaˀa.

³A kusom a hirnga Moyis ati Aroŋ, a ɓaka taŋ: «A mba ndra kwacay le muduba, mizli ngir jum ngi Israyeley gar, i ngi Bumbulvuŋhoy, yo Bumbulvuŋ kwana, naŋ da a wuzla ndra gar. Ka mapura vu ɗik fineˀ mizli ngi Bumbulvuŋhoy gar na vurmike?»

⁴Moyis micina mambiɗakaŋ hirnga na, a huruk huruk a ruwuy.

⁵Joˀ a ɓa Kore ati mizli naŋhaya: «Ti prik, ti miprike, Bumbulvuŋ a sa biga mbur nga naŋ, mbur misi ti seˀe, magumbuˀ ng'ava gu. A sa pula mbur naŋ muwunaŋ na, ɓa a kirih ng'avaŋ.

⁶Kore, kum ati mizli ɗikeye, gwat kum masa gam anihĩ: wuɗam gwat ngi zluma urdihey.

⁷Ti prike, kisa pam zayvu angi taŋ, kisa gujaˀakaŋ urdi a mbuŋ Bumbulvuŋ, naɓa i sa puraka mbur Bumbulvuŋ muwunaŋ na, mbur nga naŋ i mbur nah. Ya vuna kwana, ɓi ngi kum levihey a mbiy kwacay le ya!»

⁸A dirba nah, Moyis a ɓa Kore tuwa ma: «Kum ziri mizile ngi levihey, cinam so!

⁹Bumbulvuŋ, Buymisemuŋ ngi Israyele, a guhukum le tivi jum ngi Israyel mekelemeye, ɓa ki kiraham ng'avaŋ gu. Slra ngir guɗuk ngi Bumbulvuŋ naŋ asi haŋ kum, ɓa ki gaka slra nah ti slimiɗ ngi Israyeley gar, nah vuna muk ti kum takwa?

¹⁰Kore, ka ati sukum ɗik levihey gar kumo, Bumbulvuŋ a pulukum jiviɗ le ɓa ki Kiraham ng'avaŋ. Yo ma na, a wuɗ a ci ti kum masayay ma!

¹¹Na ma na, ka ati mizli ɗikeye, ki slikiɗam ɓi ar Bumbulvuŋ na mbri jak maka? Na kum maɓam vuna, i Aroŋ ta.»

¹²A dirba nah, Moyis a slin ɓa a ziloko Dataŋ ati Abiram, ziri mizile ngi Eliyapaya. Amma taŋ a mbiɗakaŋ di: «Ndr'anta ram nga hirwuy Kanaˀana ta.

¹³Ani ki coho ti ndra le nga muc a wuzlaɓuh, mbak hirwuy misi ɗuwa ati mam maɓulom anga na, naŋ muk ti ka takwa? Ki wuɗ ɓa ki wa ndra ma sukwa!

¹⁴Kay, gisiŋ, ki so ti ndra nga hirwuy misi ɗuwa ati mam, maɓulom ara ta ndiɗaˀ wãˀ. Ki vula ndra gwat da ndra ta, ko guva ngi gudubun, ko guva mekelem! Ki pura ndra ka dangaray kwa? Ndr'anta ngumam ru nga Kanaˀana ta!»

¹⁵Dar Moyis a ji mevel fõh fõh, a ɓa Bumbulvuŋ: «Ki tiɓa gwat ngi vul taŋ ta. Ko yi tiɓi gwat avu taŋ ɗaˀ ta, ko zungu tekeɗe. I zluɓ ɓi avu mbur ngi wuzla taŋ ɗaˀ ta.»

¹⁶Moyis a ɓa Kore: «Ka ati mizli ɗikeye, waɗ Aroŋ, soko ti prik nga mbuŋ Bumbulvuŋ ma.

¹⁷Mbur gar asi kumo, a so ti gwat ngi zluma urdi naŋ, kisa pam mukuturɓuy ngi zlum ar taŋ, ko waka gar asi kumo, aru di nga mbuŋ Bumbulvuŋ, a jum gar, gwat ngi zluma urdi skat skat cuw ti kukur zlum. Ka ati Aroŋ kwana, soko taŋ ya.»

¹⁸Kore ati mizli naŋhaya, mbur gar a zuɓa gwat ngi zluma urdi nga naŋ nga naŋ. A pam zayvu ara waɗ mukuturɓuy a hirnga naŋ, a cicam dedeŋ a mizlingre guɗuk ngi zlir ti Buymisemuŋ, Moyis ati Aroŋ t'ada ma.

¹⁹Kore a cikila mizli naŋhaya gar nga mbuŋ taŋ, gweˀ avu mizlingre ngi guɗuk ngi zlir ti Buymisemuŋ. Dar dudok ngi Bumbulvuŋ a bugo vu da jum ngi Israyeleye gar.

²⁰Dar Bumbulvuŋ a ɓa Moyis ati Aroŋ na:

²¹«Kiraham kileŋ avu mizli tayna, i wuɗ i ngizla taŋ wureˀ wurenna.»

²²Amma Moyis ati Aroŋ, a hurkom huruk huruk, a ɓam: «Aw Bumbulvuŋ, ka mavul siifa da gwat ka miga gar, vur mbur purla migi mungra ma na, ki ji mevel ar jum ngi mizilehey keɗeɗe vur mike?»

²³Bumbulvuŋ a mbiɗa da Moyise:

²⁴«Ɓa jum ngi mizli a kirih kileŋ avu hay ngi ti Kore, Dataŋ waɗ Abirama.»

²⁵Moyis a slikiɗ nga luuma Dataŋ ati Abirama. Mizli micawwa ngi Israyeley a ram aseˀeŋ.

²⁶Moyis a ɓa jum ngi mizli: «Kiraham kileŋ avu guɗuk ngi mizli malambaˀ tayna. Ki jaka haŋ avu gwat nga taŋ pal le ta, naɓa kumo kwana, kisa micam, asi mungra taŋ na ya.»

²⁷Dar mizli a baˀam avu hay ngi ti Kore, Dataŋ ati Abirama so. Dataŋ ati Abirama, a boko le tir guɗuk taŋhaya, a roko dedeŋ avu miviŋ taŋhaya ati ngwas taŋhay, ziri taŋhay waɗ dideˀ taŋhaya.

²⁸Moyis a ɓi: «Ya masa ga gwatay ani gar na, kisa sinaka i Bumbulvuŋ mislino ya gisiŋ, i ga gwata ti gidaŋ ɗu ta.

²⁹Da mizli tayna a micam kaɓa mizli gar, a micam muc muho gar na, naɓa i Bumbulvuŋ mislino ya ta.

³⁰Amma da Bumbulvuŋ a gi gwat madiɗa le, hirwuy a cir le, a nda taŋ le ati gwat taŋhaya gar, a pam sar le titiri ng'ar li ngi mizli mumucahay na, naɓa kisa sinaka mizli tayna, a hirsaka Bumbulvuŋ le zleˀe.»

³¹Moyis mitika mingiɓi naŋ tikeˀ sina, hirwuy a cir asi sar ngi Dataŋ ati Abirama.

³²Hirwuy a cir puɗak, a nda taŋ ati mizli ngi hay taŋhay gar, yo a nda mizli ngi Koreheye gar jom ti zlili taŋhaya ma.

³³Mizli tayna a cam titiri kine ng'ar li ngi mizli mumucahay ati gwat taŋhaya gar, joˀ hirwuy a sinir sinir. A susuymom kahana a wuzla jum ngi Israyeleye.

³⁴Israyeley misi akẽh micinaka widi taŋ na, a kilam cek. Asi a ɓam na: «Kulukum le, vur hirwuy manda ndra ya!»

³⁵Bumbulvuŋ a bulo vu ngiɗ ngiɗ, mizli mi skat skat cuw ti kukur zlum mazlumam urdihey tuwa, vu a zluma taŋ kap.