Read South Giziga NUM 17 Bible Online

NUM 17 - South Giziga bible

NUM 17

¹Bumbulvuŋ a ɓa Moyise na:

²«Ɓa Elazar, mangal ngi Aroŋ, ɓa a hila gwat ngi zluma urdihey na tir vu ng'avra, ɓa a zliɗa zayvu kileŋ. Asi gwatay ngi zluma urdi tayna, inga ya Buymisemuŋ.

³Ko da gwat ngi zluma urdi tayna, i ngi mizli migam mungra, mumicam aseˀe na tekeɗe kwana, a bigaka taŋ le a mbuŋ ɗu. A sa vuɗaka taŋ kamburam kamburam, a sa sirtam taŋ li gi mikuli. Mizli Israyeley a sa wulkam keŋ ava.»

⁴Masay Elazar tuwa, a hila gwat ngi zluma urdi, ngi ɓiri gazahay, ngi mizli muwuram titiri kine tuwa. A vuɗaka taŋ kamburam kamburam ngi sirta li gi mikuli.

⁵Ɓiri mikamburam kamburam tayna, a vula wuluk da Israyeley ani: Mbur ngi hay Aroŋ ta gar na, naŋ anta ti jiviɗ ngi zluma urdi a mbuŋ Bumbulvuŋ ta. Da a zluma le na, a sa gi ava, kaɓa gwat migi avu Kore ati mizli naŋhay na ya. Bumbulvuŋ a ɓa Moyise, ɓa a ɓa Aroŋ ɗaˀ ɗaˀ le.

⁶Li naŋ muwun na, jum ngi Israyeley, a tiraka Moyis ati Aroŋ, a ɓaka taŋ: «Ki kiɗaka mizli ngi Bumbulvuŋhoyo le vagay vagay!»

⁷Israyeley a kusom hoyo hoyo nga hirnga taŋ. Dar Moyis ati Aroŋ a mbiɗam hiri ngir tivu guɗuk ngi Buymisemuŋ. Akẽh na, musure ngi gazlavay a sirta guɗuko sirit, dudok ngi Bumbulvuŋ a bugo vu.

⁸Moyis ati Aroŋ a ram nga mbuŋ guɗuk ngi zlir ti Buymisemuŋ tuwa.

⁹Bumbulvuŋ a ɓa Moyise:

¹⁰«Kiraham kileŋ avu mizli tayna, i wuɗ i ngizla taŋ wureˀ wurenna!» Moyis ati Aroŋ a hurkom huruk huruk a ruwuy.

¹¹Moyis a ɓa Aroŋ na: «Zuɓa gwat ngi zluma urdi ɗike, pi zayvu ngir li gi mikuli angaŋ, pi mukuturɓuy, aru kutum ng'avi mizli, ga taŋ mezegwel ngi pula mungra, asi Bumbulvuŋ a ji mevel le, yo bonoy madiɗa, a zli le si.»

¹²Aroŋ a zuɓa gwat ngi zluma urdi naŋ kaɓa Moyis miɓaŋ di tuwa. A kil ng'avi mizli mukos kos ar li misi bonoy madiɗa mizli virzi tuwa. A zluma mukuturɓuyo, a ga mezegwel ngi puya mungra ngi Israyeleye.

¹³A cici deŋ ar wala ngi mizli mumucahay ati misi ti siifahaya. Dar bonoy madiɗa a kiɗ mi.

¹⁴Mizli mumicam ti bonoy na, taŋ mizli durmuk kuruˀ nga mufaɗ ti skat skat tarnaˀ, mbak mizli mumicam asi ɓi ngi Kore na le.

¹⁵Bonoy madiɗa mikiɗ mi muduba na, Aroŋ a mi ng'avu Moyis a mizlingre guɗuk ngi zlir ti Buymisemuŋ.

¹⁶Bumbulvuŋ a ɓa Moyise:

¹⁷«Ɓa Israyeleye: Anja buyɓi ngisi sukwi gar na, a sa vuluw ganday soŋ, jom gar na, ganday kuruˀ nga cuw. Ki sa toho slimiɗ ngi sukwi taŋhaya, toh toh avu ganday ngi mburo ngi mburo.

¹⁸Avi ganday ngi sukwi ngi Levi na, tuh slimiɗ ngi Aroŋ. Naŋ kine, gandayaya, taŋ tiɗeˀe a hirnga buyɓi ngisi sukwi gar.

¹⁹Ki sa pa ganday tayna sek ar guɗuk ngi zlir ti ya Buymisemuŋ, a mbuŋ akoti misi beleler ngi jumoˀay anga, ar li ya mabugukum vu na.

²⁰Gwat masa gi ani: mbur ya muwunaŋ na, ganday nga naŋ a sa ɗiɗi. Naɓa Israyeley matirukum na, i kiɗa mi nah le.»

²¹Moyis a ɓa ɓi hana da Israyeleye. Akẽh na, buyɓi ngisi sukwi purla purla gar a vulakaŋ gandaya, a hirnga taŋ tiɗeˀe. A jum gar na, ganday kuruˀ nga cuw. Ganday ngi Aroŋ naŋ da a wuzla taŋ.

²²Moyis a pa gandayay tuwa sek a mbuŋ Bumbulvuŋ, angi guɗuk misi beleler ngi jumoˀay anga na.

²³Li naŋ muwun na, Moyis a ci ng'ar guɗuko, a pura na, Aroŋ dideˀ ngi Levi, ganday nga naŋ a ɗiɗi ti ɗiɗi tew ta ma, amma a fuyuk, a yi, a nihi.

²⁴Dar Moyis a hila gandayay tuwa cek tir guɗuko, a biga taŋ da Israyeleye gar. Mbur gar a pura le, buyɓihey gar, a hilaka ganday taŋhay a muŋ.

²⁵Bumbulvuŋ a ɓa Moyise ma: «Mi ti ganday ngi Aroŋ nga mbuŋ akoti misi beleler ngi jumoˀay anga na, a sa ndir a diga, ɓa ganday nah, a biga da Israyeleye: taŋ i mizli micina mihey ta. Naŋ kine, taŋ matirikiy na, kisa tika, naɓa t'anta sa micam mata.»

²⁶Moyis a ga kasl kasl kaɓa Bumbulvuŋ muɗuvaŋ ɓi nah.

²⁷Israyeley a ɓaka Moyise: «Cin ɗi! I ra micam, i ra zizam cek na, k'anta ki pura takwa?

²⁸Ko wa gar mugumbuˀ le ng'avu guɗuk ngi Bumbulvuŋ na, a sa kiɗaka vagay. Ndra vuna i sa ngizlam cek kanah kwa mbrike?»