Read South Giziga NUM 21 Bible Online

NUM 21 - South Giziga bible

NUM 21

¹Buy madiɗa ngi Arat, i mbur Kanaˀan, hay naŋ kini tir vay ruwuy. A cine na, Israyeley ara soko tir jiviɗ ngi Atarim. A zla taŋ akẽh ngi kiɗa vu, a ji bekehey njiraˀ asi taŋ.

²Dar Israyeley a ɓaka Bumbulvuŋ ɗaˀ le ani: «Da ki vula ndra mizli hanayna le asi haŋ ndra na, i sa musukuɗoko walahay taŋ wãˀ.»

³Bumbulvuŋ a tiɓa ɓi ngi Israyeley tuwa le, a vula taŋ Kanaˀanay asi haŋ taŋ. Israyeley a ngizlaka taŋ, a musukuɗoko walahay taŋ, a zilaka li vay nah na Horma, mbiɗeˀvra ‹Diŋ›.

⁴Israyeley a pulaka muwã Horo, a zuɓam jiviɗ ngi mi mubuliy lavaɗa, a taka Edomo teˀe. Amma taŋ maram a jiviɗe na, vagas ara ga taŋ.

⁵A zlaka, a dirɗaka Buymisemuŋ ati Moyise, a ɓaka taŋ na: «Ki coho ti ndra mbak Ezipte le vur mike? Ɓa i micam a wuzlaɓuh aka kwa? Peŋ anta aka ta, yam anta, yo man, ɗaf malambaˀ hana, a ɓula ndra mi le ma!»

⁶Akẽh na, Bumbulvuŋ a slino taŋ kaw mihimaˀhay, a humbuɗaka Israyeleye, mizli a micam haɗi asi taŋ.

⁷Mizli mindirama, a soko lumaka Moyise, a ɓakaŋ: «Ndra mudurɗukuw ka waɗ Bumbulvuŋ na, i gam mungra le. Tumbulo Bumbulvuŋ ar deɗe ndra, ɓa a kursa kaw tayna kileŋ avu ndra!» Moyis a tumbulo Bumbulvuŋ ar deɗe ngi mizli.

⁸Dar Bumbulvuŋ a ɓa Moyise: «Ɓi ɓa a ɗiyam kaw ti ɓiri, a luwaka law avu ɓamtal. Ko wa gar, kaw mikiɗaŋ le, da a ɗuva hiri le ava na, a laha hutuŋ naŋ le.»

⁹Moyis a ɗiyi kaw ti ɓiri gaza, a luwa law avu ɓamtal. Da kaw muhumbuɗ mbur le, a ɗuva hiri le avu kaw ngi ɓiri gaza nah na, a laha hutuŋ naŋ le.

¹⁰Israyeley a zuɓam jiviɗ, ara pam a Obot.

¹¹A slikiɗam a Oboto, ara pam a Ye-Abarim misi a wuzlaɓuh mikirɗak kirɗak, kini tisi pas ngi miprik ngi Moˀap.

¹²A slikiɗam akẽh, ara pam a mi mizaw Zereɗ.

¹³A slikiɗam sar mumufaɗ naŋ, ara pam sar a duba Arnoŋ, mizaw muɗuv virzi a ruwuy Amorihey, a ngira wuzlaɓuh mikirɗak kirɗaka cããt, hã ara gi maakway ar wala ngi hirwuy Moˀap ati ngi Amorihey.

¹⁴Vurˀe, dimis ngir Ɗerewol vurum ngi Bumbulvuŋ a ɓi na: [2].

¹⁵jom ti mizaw naŋhaya, ˀaydidik naŋ misi tir vay Ar, maakway ngi hirwuy Moˀap Silaɓɓa,

¹⁶a slikiɗam a Arnoŋ, ara pam a Beˀer, vigiɗ ngi yam. Bumbulvuŋ a ɓa Moyis a diga na: «Cikila hirnga ngi mizli, i sa vula taŋ yam ngi si.»

¹⁷Vurˀe, Israyeley a hunumaka Bumbulvuŋ ti dimis ani: «Yam mabo col col tir vigiɗi, jukum salalay!

¹⁸Vigiɗ, buyoy milaka ti ganday taŋ ngi buyoy, mizli mugopoy muguroko ti ganday taŋ.» A slikiɗam baɗ a wuzlaɓuh akẽh, a ram nga Matana.

¹⁹Ti Matana, a ram nga Nahaliyel, ti Nahaliyele, a ram nga Bamot.

²⁰A dirba naŋ wãˀ na, a slikiɗam a Bamoto, a ngiraka sozo ngi ruwuy Moˀapa, ngir tivi mesengel ngi muwã Pisga. Wuzla ɓuh mikirɗak kirɗak a pur kaɗaŋ kaɗaŋ a diga.

²¹Israyeley a slinam mizli, ɓa ara ɓaka Sihoŋ, buy madiɗa ngi Amoriheye na:

²²«I wuɗam ɓa i ngiram tir hirwuy ɗike. Ndr'anta sa bam baɗ ar li muhuvahay malla guva ngi gudubunoyo ta. Ndr'anta sa saka yam ngi jiviɗeye ta. I sa zuɓam jiviɗ madiɗa tileɓ tileɓ, hã i ngiraka hirwuy ɗike kine.»

²³Amma Sihoŋ a pula taŋ jiviɗ ɓa a ngiram tir hirwuy naŋ ta. A kuso soje naŋhaya cek, ara jam hirnga ti Israyeley ar walahay Yahas, wuzlaɓuh mikirɗak kirɗak, a kiɗam vu a diga.

²⁴Amma Israyeley a paka taŋ hirnga le. A tiɓaka hirwuy taŋ gar, zle a Arnoŋ tir vay ruwuy, Yaboko tir vay muŋ, hã avu maakway ngi Amorihey majiginaka kuy kuy, misi tisi pas ngi miprik.

²⁵Israyeley a tiɓaka walahay madiɗa ngi Amoriheye le cek waɗ Heseboŋ ati prok migweˀ gweˀhey, a pam ar taŋ.

²⁶Heseboŋ i walahay miwa Amori gar, buy taŋ madiɗa i Sihoŋ migam vurum ati buy mudumbuŋ ngi Moˀap, mitiɓa hirwuyo cek cek hã sesẽŋ a Arnoŋ tuwa.

²⁷Vurˀe, mizli dimisey a ɓam na: «Soko nga Heseboŋ! Ndiraka walahay ngi buy Sihoŋ, slikiɗaka hiri naŋ a muŋ!

²⁸Vu a bo le kaˀ a Heseboŋ, a wura walahay Ar misi a Moˀapa le. Irne vu aro njilim njilim ar walahay ngi buy Sihoŋ, a wura kuli muwãhay misi a Arnoŋ na le.

²⁹I bonoy avu ka Moˀap ɗu! Kum mihuruk hurukey a mbuŋ Kemoso, ani, ki zizam le. Ziri mizilehey a kilam le, ziri mongosohoyo kwana, Sihoŋ, buy madiɗa ngi Amorihey, a ja taŋ le cek.

³⁰Amma ndra, i mulaka Amoriheye le ti luvutu. Wurenna, hirwuy Heseboŋ a ngizl le talalaˀ, hã sesẽŋ a Diboŋ, hã sesẽŋ a Nofa waɗ Medeba ma.»

³¹Israyeley micifam asi ruwuy ngi Amorihey na, kahana so.

³²Moyis a slin mupura lihey nga hirwuy Yazer, dar Israyeley a tiɓaka hirwuy migweˀ gweˀheye, a ɓulaka Amoriheye.

³³A dirba nah, a muslam jik nga Basaŋ. Neˀ si na, Og, buy madiɗa ngi Basaŋ, a bo ti soje naŋhay gar, nga ji hirnga ti Israyeleye, ɓa a kiɗam vu a Edreyi.

³⁴Bumbulvuŋ a ɓa Moyise na: «Ki zluwun ti buy nah ta! I sa vuluw di ɓa ki waŋ jom ati soje naŋhaya gar, waɗ hirwuy naŋ ma. Ki sa gi di kaɓa ka migi ti Sihoŋ, buy madiɗa ngi Amorihey, mazum buy zleˀe a Heseboŋ na ma.»

³⁵Israyeley a kiɗaka Og ati ziri naŋhaya, waɗ soje naŋhaya, ko a pulam mbur ti siifa loŋ ta, a zuma hirwuyo.