Read South Giziga NUM 22 Bible Online

NUM 22 - South Giziga bible

NUM 22

¹Akẽh na, Israyeley a slikiɗam ma, ara pam ar li micay ngi Moˀap, kini ti dubazaw Zurdeŋ, puɗak angi Zeriko.

²Balak, mangal ngi Sipor, buy madiɗa ngi Moˀap a pura gwat Israyeley migaka da Amorihey na le.

³Buy ngi Moˀap tuwa ati mizli naŋhaya mupuraka Israyeley misirgiɗim na, a ga taŋ zluwun le, ara jijikam,

⁴a ɓa mizli micawwa ngi Madiyanaya: «Mizli misirgiɗim hana, a sa ngizlaka gwatay avu ndra pay pay, kaɓa slahay mazumam giziŋ ar guva.»

⁵Buy Balak a slin mizli ng'avi Balaˀam, mangal ngi Beˀor. Balaˀama, hay naŋ a Petor, a mi mizaw Efrat, hirwuy ngi Amavihey. Buy ngi Moˀap a slin, a ɓaŋ mingiɓi ani: «Sukwi ngi mizli ani, a soko ti Ezipte, a nahaka li le heɓeheɓe, a pam ani gweˀ avu ya!

⁶Ambuh ambuh takwa, inga kilo widi ɗu, nisa taŋ, asi a funaka mizli ɗuwoyo le ti gidaŋ. Da ki ngum le na, asinta, i sa kiɗa taŋ, i sa ɓula taŋ tisi ruwuy ɗu gu kwani? Asi yi si na le, da ki ɗuwula mi le da mburo na, a dumoŋ gisiŋ, yo da ki nisa mburo le na, a jaŋ gisiŋ.»

⁷Mizli micawwa ngi Moˀapay ati Madiyanaya, gwat ngi vul da Balaˀam mbur mupura daˀasa, a rakaŋ di ngi hay a haŋ. Dar a slufakaŋ ɓi ngi buy Balak tuwa.

⁸Balaˀam a ɓa taŋ: «Hinam aka. Tiprike, i sa mbuɗukum mi kaɓa Bumbulvuŋ misa ɓiy di le.» Buy ngi Moˀapay a ndiram a hay Balaˀama so.

⁹Buymisemuŋ a sawa, a cufuɗa Balaˀama: «Mizli ka mitiɓa taŋ ngi hay ɗik na, i waniyka?»

¹⁰Balaˀam a mbiɗa da Buymisemuŋ: «Balak mangal ngi Sipor, buy madiɗa ngi Moˀap mislino taŋ, a ɓikiy na:

¹¹Sukwi ngi mizli ani, a boko ti Ezipte, a nahaka li le heɓeheɓe, ambuh ambuh takwa, inga kilo widi ɗu, yo nisa taŋ. Da ki ngum le na, asinta, i sa kiɗa taŋ gu, i sa ɓula taŋ gu kwani.»

¹²«Buymisemuŋ a ɓa Balaˀama: «Ki ru asi taŋ ta! Ki nisa mizli Israyeleye ta, asi i ɗuwula taŋ mi le.»

¹³Li naŋ muwuno, Balaˀam mislikiɗ si na, a ɓa mislin ngi Balakay tuwa. «Mam nga hirwuy kumo, asi Bumbulvuŋ a ngum ɓa i ru asi kumo ta.»

¹⁴Mizli micawwa ngi Moˀapay tuwa, a mam ng'avi Balaka, a ɓakaŋ: «Balaˀam a ngum so asi ndra ta.»

¹⁵Amma Balak a slin buy mekelemey haɗi, i mizli mupuɗaw puɗaway fineˀ mudumbuŋhoyo.

¹⁶Taŋ mindilam avu Balaˀama si na, a ɓakaŋ: «Balak, mangal ngi Sipor a ɓi na: Ambuh ambuh takwa, ki ziriɗa mi ɗu ta, sawa ngi hay ɗu!

¹⁷Asi i sa ɗuvuw hirnga haɗi, gwat ka mucufuɗiy le gar na, i sa guw di! Kulo widi ɗu, yo nisa mizli tayna.»

¹⁸Amma Balaˀam a mbiɗa da mislin ngi Balakaya: «Da ko Balak a vuliy dala ati ɓiri tapasl tapasl mundus ndus ar mugum naŋ na gar da ya kwana, y'anta ziriɗa mi ngi Bumbulvuŋ, Buymisemuŋ ɗu ta.

¹⁹Kum vuna kwana, hinam aka, ɓa i sa sina, da Bumbulvuŋ a sa ɓiy mbri maka na.»

²⁰Ngi duvuɗo, Buymisemuŋ a so ɓa Balaˀama: «Da mizli tayna a soko, ɓa ki kisa taŋ na, aru asi taŋ. Amma kisa gi di i gwat ya masa ɓuw di tewle.»

²¹Li naŋ muwun na, Balaˀam a juwa madiya zungu naŋ, a ram ati buy ngi Moˀapaya.

²²Balaˀam macuh tuwa na, a slikiɗa mevel da Buymisemuŋ. Balaˀam aro a jiviɗi, gilaˀ ar madiya zungu naŋ waɗ gawla naŋhay cuw maki sakaŋ. Dar modro ngi Bumbulvuŋ a cici deŋ a jiviɗe, ɓa a tikaŋ aru ta.

²³Dambalaka, madiya zungu a pura modro ngi Bumbulvuŋ mideŋ a jiviɗ na le, ti maslalam kaw a haŋ. Madiya zungu tuwa, a ngizli ɓa a bi tir guvahay. Balaˀam a kiɗa ɓa a tiko hiri naŋ nga jiviɗe.

²⁴Modro tuwa, ara cici zar nga mbuŋ, a jiviɗ mabi ar guva ngi gudubunoy, sler sler ar wala ngi moholoy tika tika.

²⁵Madiya zungu mupura modro ngi Bumbulvuŋ tuwa na, a gumbuˀ kap da mohol, ara guro sar ngi Balaˀama, joˀ Balaˀam tuwa, ara kiɗa zungu ma.

²⁶Modro ngi Bumbulvuŋ tuwa, aru nga mbuŋ ava ma, ara cici ar li misler sler muwãˀ naŋ, ko li cuh mekelem anta ti hazum ta, ti gula ta.

²⁷Madiya zungu mupura modro ngi Bumbulvuŋ tuwa ma na, a hin tup a ruwuy, Balaˀam a ji mevel, a kiɗa ti ganday.

²⁸Dar Bumbulvuŋ a ga ɓa zungu tuwa, a ɓi ɓi, joˀ zungu a ɓa Balaˀama: «I guw mi ɓa ki kiɗiy ganday makir naka?»

²⁹Balaˀam a mbiɗaŋ di: «Ki singir angi ya ti singir, da maslalam ada zleˀe avu ya aka na, anja i kiɗuw le vagay si!»

³⁰Madiya zungu a mbiɗaŋ di: «Yi madiya zungu ɗik takwa? Ka majiɗ ndrehhe na, a duba ɗu takwa? I guw di le ɗaˀ kahana kwa?» Balaˀam a mbiɗaŋ di: Ĩˀĩˀ.

³¹Dar ar nah akẽh, Bumbulvuŋ a wuna hiri ngi Balaˀama, a pura modro ngi Bumbulvuŋ mideŋ a jiviɗe, maslalam ceɗ kaw a haŋ. Balaˀam a huruk huruk a mbuŋ naŋ.

³²Modro ngi Bumbulvuŋ a mbiɗaŋ di: «Ki kiɗa madiya zungu ɗike ganday makir vur mike? Pura, i ya muso tukuw hiri. Yi pura na, mulak ka mazuɓa hana, ara zuzuw hutuŋ.

³³Madiya zungu a puriy le, a ngizli ti ya is makir, da a ngizli ti ya zleˀe ta na, anja ani i kuɗuw le vagay ɓaˀ arleˀe. Anja i pulaŋ nah le zuy zuyˀ.»

³⁴Balaˀam a ɓa modro ngi Bumbulvuŋ: «I gi mungra le! K'ada a mbuŋ ɗu a jiviɗe na, i si na zleˀe ta. Amma wurenna, da zuɓa mulak ɗu hana a cǝruw hiri ta na, yi mi le a muŋ.»

³⁵Amma modro ngi Bumbulvuŋ a mbiɗaŋ di: «Ĩˀĩ! Aru ati mizli tayna, amma kisa ɓi di i ɓi ya masa ɓuw di na tewle.» Dar Balaˀam a zuɓa jiviɗ ati mislin ngi Balakaya.

³⁶Ti Balak micina Balaˀam ara sawa na, ara ji di hirnga sesẽŋ a Ir, hirwuy Moˀap. Ir i walahay migweˀ avu maakway ngi hirwuy, a mi mizaw Arnoŋ.

³⁷Balak a ɓaŋ: «Ya mislina mizli mudumbuŋhoy na, taŋ geˀ preˀ kwa? Ki so ta vur mike? I ndila ɓa i ɗuvuw hirnga gu takwa?»

³⁸Balaˀam a mbiɗa da Balaka: «Yawwa, y'ani! Amma jiviɗ ada ɓa i ɓi lambaˀ kwa? I sa ɓi di i ɓi Buymisemuŋ masa bo di ti balam ɗu na tewle.»

³⁹Balaˀam a ram ati Balaka, a ndilam a Kiriyat-Husot.

⁴⁰Balak a gi mikuli ti sla ati tumuŋhoy, a vul cah da Balaˀam ati buyoy misi aseˀe.

⁴¹Li naŋ muwun na, Balak a jiɗ ti Balaˀama nga Bamot-Baˀal, ti diga na, mbur a pura mizli Israyeleye cah gu.