Read South Giziga NUM 27 Bible Online

NUM 27 - South Giziga bible

NUM 27

¹Zozef a yi Manase, Manase a yi Makir, Makir a yi Galaˀat, Galaˀat a yi Hefer, Hefer a yi Selofat. Selofat a yi ziri mongosohay, i ti: Mala, Noˀa, Hogla, Milka waɗ Tirsa.

²Ziri mongoso muzlum tayna, a soko nga mbuŋ Moyis, nga mbuŋ masay Elazar, nga mbuŋ buyɓihey, waɗ nga mbuŋ jum ngi Israyeley gar misi a mizlingre guɗuk ngi zlir ti Buymisemuŋ.

³A ɓam: «Cine ndra a muc le a wuzlaɓuh mikirɗak kirɗaka. N'anta a wuzla mizli ngi Korehey mimbiɗam hirnga avu Bumbulvuŋ na ta ngbaŋ, a muc na, asi mungra nga naŋhay. Amma a yi mangal mizile ta.

⁴Mbak slimiɗ nga naŋ a susuyum a wuzla dideˀ naŋhaya, vur naŋ miyi mangal mizile ta na sukwa? Vula ndra li mbaŋ da ndra, kaɓa ka muvula da sukum naŋhay na ya!»

⁵Moyis aru ti cufuɗ taŋ ng'avu Bumbulvuŋ.

⁶Bumbulvuŋ a mbiɗaŋ di:

⁷«Ziri mongoso ngi Selofatay a cufuɗaka jeŋ! Vula taŋ hirwuyo mbaŋ ɓa a zumaka, kaɓa jamba taŋhay na ya, anja ɓa a zumaka mi ngi cine taŋ.

⁸A dirba nah, kisa ɓa Israyeleye: Da mbur a muc le, manja mangal mizile na, mazuma hay i zuŋ naŋ mongoso.

⁹Da zuŋ naŋ mongoso vuna anta ma na, mazumaka haya i sukum naŋ mizilehey.

¹⁰Da sukum naŋ mizilehey anta na, mazumaka haya i sukum mizile ngi cinehey.

¹¹Da sukum mizile ngi cinehey anta ma na, mazumaka haya i muy naŋ migweˀgweˀhey. Hana i ɓimujuwa vur Israyeley gar ngi zuma hay, kaslsla kaɓa Bumbulvuŋ muɗuva ɓi nah da Moyis.»

¹²Bumbulvuŋ a ɓa Moyise: «Jiɗ ng'ar mesengel muwã Abarim. Yo Hirwuy ya muvula da Israyeley na, kisa puro di ti diga.

¹³Ki sa pura, a dirba nah, kisa muc, muc mupurla kaɓa sukum ɗik Aroŋ na ya.

¹⁴Asi mike na, jum ngi Israyeley mijiginam mi avu ya a wuzlaɓuh ngi Sin na, ko ki cinikiy mi ta. Yi Buymisemuŋ migisiŋ na, ko ki bigaka da Israyeley mucufuɗam yam na ta.» Buymisemuŋ maɓi na vur miviɗiviɗi ngi yam Mereba. Yam ngi tiri a Kades, a wuzlaɓuh ngi Sin.

¹⁵Moyis a ɓa Bumbulvuŋ:

¹⁶«Bumbulvuŋ Buymisemuŋ, ka mavul siifa da gwatay ka miga taŋ na, zuɓ mbur mekelem, ɓa a ja hirnga ngi jum ngi Israyeleye.

¹⁷Anja i mbur mindila le ngi jigina taŋ ko ar ɓi wanaka gar, ɓa mizli ɗikey a ndiram kaɓa tumuŋ manja mijiginey ta.»

¹⁸Bumbulvuŋ a mbiɗa da Moyise: «Zuɓa Zozuwe mangal ngi Nun. ˀUf ɗu ada a hur naŋ. Ki sa paŋ haŋ a hirnga.

¹⁹Ki sa biga da masay Elazar waɗ da jum ngi mizli gar. Ki sa vulaŋ slra ɗik a mihiri ngi jum ngi mizli gar.

²⁰Ki sa vulaŋ gidaŋ ɗike cah ngi wi mizli, ɓa jum ngi Israyeley gar a cinakaŋ mi.

²¹Amma naŋ vuna, a sa pura slra avu masay Elazar. Da a wuɗam bi le ng'ar vurumo malla ɓa a moko na, i masay masara puriy ti Urim ɗagay. Zozuwe ati jum ngi Israyeley, a sa sipaka ɓimuɗuva hana, ko ar pas wanaka gar.»

²²Moyis a cine mi da Bumbulvuŋ. A zuɓa Zozuwe, ara biga da masay Elazar waɗ da jum ngi Israyeleye gar.

²³A paŋ haŋ a hirnga, a vulaŋ slra nga naŋ, naŋ maga zleˀe, kaɓa Bumbulvuŋ muɗuva ɓi nah tuwa.