Read South Giziga NUM 32 Bible Online

NUM 32 - South Giziga bible

NUM 32

¹Dideˀ ngi Rubeney ati ngi Gataya, taŋ ti ginewey haɗi, a zli ta. A puraka li vay Yazer ati Galaˀata keɗ na, a tiɓaŋ le da gineweye.

²Vurˀe, dideˀ ngi Gatay ati ngi Rubeney, ara lumaka Moyis, masay Elazar waɗ buyɓi ngi jum ngi mizli, a ɓaka taŋ:

³«Walahay Atarot, Diboŋ, Yazer, Nimra, Heseboŋ, Elale, Sebam, Nebo waɗ Behoŋ, taŋ i walahayay,

⁴Israyel mitiɓaka, mbele Bumbulvuŋ tuwa. I li mezle ngi jigina ginewey, yo ani ndra gawla ɗikeye, ginew ndrahay ada.

⁵Yo a ɓakaŋ na: Moyis, da ki ngum le na, vula ndra hirwuy vay nah ɓa a tiri da ndra. Ki ru ti ndra nga dubazaw Zurdeŋ ta.»

⁶Amma Moyis a mbiɗa da dideˀ ngi Gat ati ngi Rubeneye: «Ki ɓam mbri? Sukum kumoy a sa ram nga kiɗa vu, ɓa kumo, ki ndiram sar seɗek aka sukwa?

⁷Israyeley maram nga hirwuy Bumbulvuŋ muvula taŋ di na, ki maka taŋ mevele vur mike?

⁸Zlezle, ti ya mislina cine kumoy, zle a Kades-Barneya nga puro hirwuy Kanaˀan na, a gam di i malambaˀ misi purla ati ngi kum na.

⁹A ram ng'ar sozo ngi Esekolo, a puroko hirwuyo le. A dirba taŋ mumoko na, a mucaka mevel ngi Israyel mekelemeye, ɓa a ram nga hirwuy, Bumbulvuŋ muvula taŋ di na ta.

¹⁰Tapasa, Bumbulvuŋ a ji mevel, a hudum, a ɓi:

¹¹Mizli misi vi kukur cuw malla mufunaka le, muboko ti Ezipte na, hirwuy ya muvula da Abraham, Izak waɗ Zakop na, ko mbur loŋ asi taŋ masa ci anta. Asi a cinikiy mi ti mevel purla ta.

¹²Sey Kalep mangal ngi Yefune, muy ngi Kenas ati Zozuwe mangal ngi Nun micam nga Kanaˀana, asi a sipaka Bumbulvuŋ le ti mevel purla.

¹³Moyis a ɓa taŋ ma: Bumbulvuŋ a ji mevel fõh fõh ar Israyeleye, a muro taŋ hã vi kukur mufaɗ a wuzlaɓuh mikirɗak kirɗaka, hã mizli tayna migam gwat ngi ji mevel da Bumbulvuŋ tuwa, a ngizlam pay kwaɗay.

¹⁴Ani wurenna, kum sukwi migi malambaˀhay, ki wuɗam ki sipaka sar ngi dideˀ kumoyo, ɓa ki slikiɗaka mevel da Bumbulvuŋ ng'ar Israyeleye si mata!

¹⁵Ani da kum mizli ngi Rubeney ati ngi Gataya, ki ngumam sipi Bumbulvuŋ ta na, a sa muro Israyeley a wuzlaɓuh, hã mizli a ngizlam pay, naɓa i kum migaka.»

¹⁶Mizli tuwa, a kiraham ng'avu Moyise ɓula si, a ɓakaŋ: «Ndiɗaˀ! Ndr'i sa ndiram gezleŋ da tumuŋ ndrahay aka, i sa pam walahay madiɗahay da mizli ngi hay ndrahay aka.

¹⁷A dirba nah, ndra vuna i sa hilaka gwat ngi vurumoy kutum, i pam sek a mbuŋ Israyele, i ki saka taŋ sesẽŋ a hirwuy muvulaka taŋ di. Ziri ndrahay a sa ndiram aka, ar walahayay mugun gun ti moholoy hanayna, ɓa taŋ zlaɗ lambaˀ da mizli ngisi ruwuy hana ta.

¹⁸I sa moko ng'ar li ndra na, sey da mbur Israyel gar a lum li cifi le.

¹⁹Amma ndr'anta wuɗam li ngi ndra ati taŋ a dubazaw Zurdeŋ ta. Li ngi ndra naŋ aka, tisi pas ngi miprik ngi Zurdeŋ.»

²⁰Moyis a mbiɗa taŋ di: «Gaka kaɓa kum miɓaka na. Hilam gwat ngi vurumoy nga kiɗa vu a mbuŋ Bumbulvuŋ.

²¹Da migi vurum kumoy a tuwuɗaka Zurdeŋ le a mbuŋ Bumbulvuŋ, a cifam le a diga, hã Bumbulvuŋ muɓula mesene naŋhaya le gar,

²²hã da hirwuy gar a hin hirnga le a mbuŋ naŋ na, a dirba nah so na, kisa moko nga hirwuy kumo, naɓa gwat, ɓa Bumbulvuŋ ati Israyeley a mbuɗukum hirnga aseˀe na, ki gam ta. Dar Bumbulvuŋ a sa vulukum ciki mizaw Zurdeŋ vay ngi ka da kumo.

²³Amma sinaka sin le, da ki gaka kanah ta na, naɓa ki gam mungra le a mbuŋ Bumbulvuŋ, joˀ zayɓi naŋ a sa mbiɗi nga hirnga kum.

²⁴Paka walahaya, da ziri kumoyo, ndiraka gezleŋ da tumuŋ kumoyo. Amma ɓi kum miɓaka ti balam kum na, ki pulaka ta.»

²⁵Dideˀ ngi Gat ati ngi Rubeney a ɓaka Moyise: «Ndra gawla ɗikeye, i sa gaka kaɓa ka muɗuva ndra ɓi nah na.

²⁶I sa pulaka ngwas ndrahay, ziri ndrahay, ginew ndrahay ati gwat misãmi ndraˀahaya gar, a sa ndiram ar walahay ngi Galaˀatay aka.

²⁷Amma ndra, i sa hilam gwat ngi vurumoy, i sa ram ng'ar vurumo, kaɓa Bumbulvuŋ muɗuva ɓi nah.»

²⁸Moyis a pula jiviɗ da masay Elazar, da Zozuwe mangal ngi Nun, waɗ da buy ngir sukwi Israyeleye.

²⁹A ɓa taŋ: «Da dideˀ ngi Gat ati ngi Rubeney a hilam gwat ngi vurumoy le, a tuwuɗam le ati kum nga dubazaw Zurdeŋ, nga gi vurum a mbuŋ Bumbulvuŋ na, a junukum le ɓa hirwuy a hin hirnga a mbuŋ kumo na, naɓa kisa vulaka taŋ hirwuy Galaˀata da taŋ.

³⁰Amma da a tuwuɗam ati kum ti gwat ngi kiɗa vuhoyo ta na, kisa vulaka taŋ hirwuy a wuzla kum, angi hirwuy Kanaˀana.»

³¹Dideˀ ngi Gat ati ngi Rubeney a mbiɗakaŋ di ɓula si: «I sa gaka gwat Bumbulvuŋ miɓa da ndra gawla ɗikeye.

³²Ndra vuna i sa hilam gwat ngi vurumoy, i cam nga hirwuy Kanaˀan a mbuŋ Bumbulvuŋ, ɓa i lumaka hirwuy ndra misi ti dubazaw vay ngi ka na.»

³³Hirwuy ngi Sihoŋ, buy madiɗa ngi Amori, hirwuy ngi Og, buy madiɗa ngi Basaŋ, waɗ walahayay ati hirwuyoy mugun hirnga taŋ na, Moyis a vula taŋ da dideˀ ngi Gat ati ngi Rubeneye, waɗ da cah asi sukwi ngi Manase mangal ngi Zozefe.

³⁴Dideˀ ngi Gatay a ndiraka walahay madiɗa ngi Diboŋ, Atarot, Aroˀer,

³⁵Atrot-Sofaŋ, Yazer ati Yogbaha,

³⁶Bet-Nimra waɗ Bet-Haraŋ, a tiram taŋ walahay migidaŋhay, a ndiram gezleŋ ngi gineweye ma.

³⁷Dideˀ ngi Rubeney a ndiraka walahay madiɗa ngi Heseboŋ, Elale, Kiriyatayim.

³⁸Nebo, Baal-Meyoŋ waɗ walahay Sipma, a caka slimiɗ nawaya da walahay mekelemey, taŋ mindiraka hiri naŋhay a muŋ na.

³⁹Ziri ngi Makirey, mangal ngi Manase, a ram nga hirwuy vay Galaˀat, a tiɓaka da taŋ, a ɓulaka Amorihey misi zleˀe a diga.

⁴⁰Dar Moyis a vula Galaˀata da Makir mangal ngi Manase, a pam anga.

⁴¹Ziri ngi Yaˀirey, mangal mekelem ngi Manase, ara tiɓaka hirwuy ngi Amoriheye, a cakaŋ slimiɗe «walahay ngi Yaˀirey».

⁴²A dirba nah wãˀ na, Noba ara tiɓa hirwuy Kenat ati walahay migweˀ gweˀ ngi cikeˀehey. A zila walahaya Noba ti slimiɗ naŋ tehhe a muŋ.