Read South Giziga NUM 5 Bible Online

NUM 5 - South Giziga bible

NUM 5

¹Bumbulvuŋ a ɓa Moyise na:

²«Mizli misi ti sukwi ngi kukulahay avu taŋ, misi waˀahay a mbuŋ malla mizli mijam haŋ le avu vagay ngi mbur gar na, ɓa Israyeleye, a ɓulaka taŋ tir walahay guɗuko avra.

³Ko ziley, ko ngwasay, ɓulaka taŋ tir walahaya guɗuko avra. Walahay guɗuk ngi Israyeley, ya misi anga na, anja a hiryaka ta.

⁴Dar Israyeley a ɓulaka mizli misi diliheye tir walahay guɗuko, kaɓa Bumbulvuŋ miɓa da Moyis tuwa.

⁵Bumbulvuŋ a ɓa Moyise na:

⁶«Mingiɓi ka masa ɓa da Israyeley anihĩ: da mbur zil malla ngwas a zluɓ ɓi le avu cala na, naɓa a zluɓ ɓi le avu ya Bumbulvuŋ.

⁷Sey a njika mungra naŋ, naŋ miga vuna, a mi ti gwat vuna cineˀe da buy naŋ. A wuɗ mekelem, a wunka taˀ taˀ zlum, waɗ a vulaŋ pal nga meˀeŋ.

⁸Da buy ngi gwat vuna a muc le, muy naŋ migweˀ, ɓa a makaŋ ti gwat anta na, a sa moko di da ya Bumbulvuŋ, mbiɗeˀvra da masay. Yo ma na, mbur muzluɓa ɓi, a sa jo zlengerek nga meˀe ngi gi mikuli ngi ɗiya ɓi, ɓa a gam di mezegwel ngi pula mungra.

⁹Gwat ngi vul da ya Buymisemuŋ gar, Israyeley masoko di nga mbuŋ masay na, a sa ndir da masay.

¹⁰Gwat mbur mira vula da ya Bumbulvuŋ na, kite ara vula da masay. Gwat mbur gar mavula da masay na, a ndir da masay vuna.»

¹¹Bumbulvuŋ a ɓa Moyise:

¹²Ɓa Israyeleye na: asinta, da ngwas ngi mburo, ara gi lambaˀ lambaˀ, naŋ teŋteŋ avu zil naŋ ta,

¹³a hirya vu naŋ le, mbur mekelem ara hin di ti yaŋ yaŋ, zil naŋ a si na ta, asi sedewo anta, yo a jakaŋ kasl ara ta.

¹⁴Da zil nah ara gi suloŋ, ara si hiri ar ngwas naŋ, dambalaka i gisiŋ. Malla ta na, da zil nah ara gi suloŋ, ara si hiri angi ngwas naŋ, dambalaka i gisiŋ ta.

¹⁵Da i gisiŋ malla i gisiŋ ta ma, mbur nah aru ti ngwas naŋ nga mbuŋ masay. A so ti gwat ngi gi sedege vur ngwas vuna: hapa ngi daw giziŋ kilo makir, a pi mal ng'ar hapa nah ta, yo a paŋ mukuturɓuy ngi zlum ti zlumo ta ma, asi i sedege magaka vur si hiri ar mbur, yo vur mbur mawuɗ njika mungra.

¹⁶Masay a sa ru ti ngwasa ng'ar li gi mikuli, ɓa ngi bigi a mbuŋ ɗu, ya Bumbulvuŋ.

¹⁷Masay a sa wuɗ yam ti gandaf, yam mipal waɗ murɓuk ngi ruwuy ngir guɗuk ngi huroˀo, a sa pa ng'ar yam tuwa.

¹⁸Masay a sa ru ti ngwasa nga mbuŋ ɗu, a cukoŋ doropo avra. Ngwas a wuna haŋ wun, masay a ɗuvaŋ gwat ngi sedege ngi njika mungraˀahaya taˀ ng'ar haŋ naŋ muwun tuwa, mbiɗeˀvra gwat ngi sedege vur suloŋ. Masay vuna, a ja yam miɗalak ngi nisa vu kaw a haŋ naŋ ya.

¹⁹Masay a sa hudumo ngwas tuwa, a ɓaŋ: ‹Da mbur a hin ti ka ta, da k'anta ki gi lambaˀ lambaˀ avu zil ɗike ta, da ki hirya vu ɗike ti mbiɗa gilaw da zil ɗike ta na, anja nis ngi yam miɗalak hana, a mbiɗi nga hirnga ɗike ta.

²⁰Amma da ki hirya vu ɗike le ti mbiɗa gilaw da zil ɗike, mbur mekelem, mbak zil ɗike, a hin ti ka le na,

²¹anja Bumbulvuŋ a tiri ti ka dirlay, ki ji kwacay. Naŋ kine, da mizli ngisi hirwuy ɗikey ara nisam vu na, sey a ɓaka ɓi ngi gwat ngi gi ɗik na ɗaˀ le.

²²Anja yam ngi nisa vu hana, a ci cik cik avu ka, ki ji kwacay, yo ki tiri dirlay.› Dar ngwas a mbiɗa: ‹Amin! Haˀaw, anja kine.›

²³A dirba nah, masay a sa toho mingiɓi ngi nis nah toh toh, a ca ng'ar yam miɗalak tuwa, ɓa a susuyum.

²⁴A vula yam miɗalak manis vu tuwa da ngwasa ɓa a saŋ, ɓa a ci cik cik ava.

²⁵Masay a sa tiɓa gwat ngi sedege ngi njika mungra tuwa, tisi haŋ ngi ngwas a sa biga da ya Bumbulvuŋ ti gi mezegwel, aru di ng'ar li gi mikuli.

²⁶Hapa ngi sedege tuwa, masay a sa wuɗ ngbal haŋ, a zluma ar li gi mikuli, ɓa Bumbulvuŋ a wulka keŋ ava, a dirba nah, a sa vula yam tuwa da ngwasa, ɓa a saŋ.

²⁷Da ngwas tuwa, a sa yama le na, gwat masa gi ani: da a ci le ar dili , naŋ anta teŋteŋ avu zil naŋ ta na, yam miɗalak manis vu tuwa, a sa ci cik cik ava, a ji kwacay, a tiri di dirlay. Naɓa ngwas nah, a tiri le avu mizli ngisi ruwuy naŋhaya, da ara nisam vu na, a zilaka slimiɗ naŋ daɗ le.

²⁸Amma da ngwas a hirya vu naŋ ta, a ci ar ɓi ta na, nis anta sa jaŋ ta, a sa yi.

²⁹Ɓimujuwa vur ɓi ngi suloŋ i hana. A gaka kahana da ngwas magi lambaˀ lambaˀ, ti ga gilaw da zil naŋ, yo ma hirya vu naŋ,

³⁰malla da zil magi suloŋ, masi hiri ar ngwas naŋ. Zil a sa ru ti ngwas naŋ nga mbuŋ ɗu ya Bumbulvuŋ, masay kwana, a sa gaŋ gwat ɓi micica ɓi naŋ hanayna cek.

³¹Anta sa mbiɗaka hirnga da zile neˀ le ta, amma da ngwas a gi gwat le gisiŋ na, a sa sa bonoy nah.