Read South Giziga MIC 1 Bible Online

MIC 1 - South Giziga bible

MIC 1

¹Ti hin ngi Yotam ati Ahas waɗ Ezekiyas, buy Zudahaya, Mise, mbur ngi ruwuy Moresete, Bumbulvuŋ a ɓaŋ ɓi. A pur ɓi ani ti kleŋ vur walahay Samari ati Zeruzalem.

²Kum mizli gar, cinam! Hirwuy ati mizli ngi raˀahay gar, jikaka slimiɗe. Bumbulvuŋ, Buymisemuŋ a wuɗ a gi sedewo ar kum zle ar hay naŋ mipala.

³Bumbulvuŋ n'ani ara bo tir hay naŋ. A ra po sar, ara ru ar li miɗingir ɗingirey ngi si ruwuyo.

⁴Muwãhay ara luwuslam asi sar naŋ, si virzi ngi sozohoy ara ndislam, kaɓa tebeɗ a ciki vu, kaɓa yam maɓul ar misirnene.

⁵Hana a gi gar na, vur dideˀ ngi Zakopoy mislikiɗam ɓi, yo vur Israyeley migam mungra. Slikiɗa ɓi ngi dideˀ ngi Zakopoy vuna i wanaka? I walahay Samari takwa? Li miɗingir ɗingir ngi Zudahay vuna i wanahay ka? I walahay Zeruzalem takwa?

⁶Vurˀe, hirwuy Samari, i sa tiri di diŋ, i sa tiri di hirwuy ngi hufa gudubun anga. Ɗugur naŋhaya, i sa gidigila taŋ ng'ar hurjijiŋ, virzi naŋ muɗuvaka na, i sa ŋhuko avra.

⁷Kuli naŋ miciɗa ti ciɗeye, i sa ngurfo taŋ cek avra, gwat ngi lum naŋ gar na, i sa pa taŋ ng'ar vu. I sa waha kuli naŋhaya meɗ meɗ, asi a cikila gwat tayna gar na ti lum naŋ ngi madama, a sa tiram lum ngi madama a muŋ ma.

⁸Ya Mise, i sa kuɗuma tuwuy, yo i sa widi ti gidaŋ ya. I sa ru manja tarak a sar, waɗ vu gulndiŋ kine. I sa zlo kuɗma tuwuyo kaɓa kiriɓuh. I sa zli dimis ngi vagay kaɓa tuwuy ngi maduuli.

⁹Kay, waˀa ngi walahay Samari na, slalak naŋ anta mata. A ra ndih sesẽŋ nga Zuda, hã duk mizlingre ngi mizli ɗuwoy a Zeruzalem.

¹⁰Ki tilam mi ti ɓi nah asi ruwuy Gata ta, ki tuwam ta. Asi ruwuy Bet-Leˀafra na, putukulom ar mereɓ.

¹¹Kum mizli Safirey, kilam gulndiŋ kine jom ti mesem. Mizli Saˀanaŋhay anta sa bam mata. Asi ruwuy Bet-Esele, i kuɗuma tuwuy. Jiniˀis asi kum anta mata.

¹²Mizli Marotoyo, a kam jiji madiɗa le ngi wãˀa. Haˀaw, mendere Bumbulvuŋ mupulo di na, a ndil le sesẽŋ a mizlingre walahay Zeruzalem.

¹³Mizli Lakisey, luwaka mota ngi vurum kumoy avu piliseye, asi mungra ngi Zeruzalemey na, a bo tivi ka, yo mungra madiɗa ngi Israyeley na, ki gaka le ya.

¹⁴Vurˀe, kum ati mizli Moreset-Gataya, kisa wuɗkam. Hay ngir walahay Akzipeye, a sa tiram njaha hiri ngi pula gir ta, avu buy Israyeleye.

¹⁵Mizli Maresahay, ya Bumbulvuŋ, i sa so ti mbur ngi cifi bugawla ar kumo. Buy hirnga ngi Israyeleye, a sa ɗumom sesẽŋ ar butum a Adulam.

¹⁶Kum mizli Zeruzalemey, hicaka ngwic hirngahay avra, vur ziri kumoy, kum mawuɗam taŋ haɗa na, Slaka himac hirngahay avra, mbak taŋ ndohho ndohho kaɓa mogodokoy, asi a jaka ziri kumoyo le ng'ar beke, kileŋ avu kum.