Read South Giziga MIC 2 Bible Online

MIC 2 - South Giziga bible

MIC 2

¹Mizli mututup ar gwat ngi hin taŋhay ti duvuɗu, mawulkam wuluk malambaˀ, yo majuwam ɓi ngi gi mendere da mizli, yo da li muwun le si na, a gaka gwat taŋ mawuɗama cummo, asi t'ada ti gidaŋ ngi gi naŋ. Kay, mizli tayna, taŋ ar bonoy.

²Da taŋ hĩhĩyam guvahay le na, a tiɓaka taŋ da taŋ. Da i hayay, a zuɓaka taŋ da taŋ. A jaka buy ngi haya jom ati hay naŋ wãˀ, yo a guzuvuraka mburo jom ati zlili naŋ wãˀ.

³Vurˀe, ya Bumbulvuŋ i ɓi na: «Ani i juwa le a kwacay ɗu ngi go mendere ng'ar mizli tayna, ko kum anta sa muɗoko ˀay kumoy ti raˀa gu ta, kum anta sa ram hirnga paɗ a muŋ gu ta, vur a sa gi i pas ngi bonoy.»

⁴Ti hin nah na, a sa ɓam ɓi ngi kicuwul ani ar kumo, yo a sa zlukum dimis ani: A kiɗ mi le. a sa ɓam: «Ndr'i ngizlam le pay. A tiɓaka hirwuyo le avu mizli ndraˀahaya. A gi mbri mbri ɓa a tiɓam ndra di maka? Mislikiɗa ɓiheye, ara wuɗkaka guva ndraˀahaya ar wala taŋ.»

⁵Vurˀe, a wuzla jum ngi mizli ngi Bumbulvuŋhaya hirwuy, mi ngi kum na, ko mbur pal masa wuɗkukum di anta.

⁶Mizli a ɓam: «Ki ngilam mi ta, anta ngilam mi kanah ta: Ĩˀĩ, naɓa zi anta sa kiɗ mi pas le ta.

⁷Mizli Israyeley i minisahay le kwa? Bumbulvuŋ anta ɓus ɓi mata, a kiɗ mi le sukwa? Gwat ngi gi naŋ kahana sukwa? Mingiɓi ɗu a gi mezle da mbur magi gwat kasl kasl na takwa?»

⁸Buymisemuŋ a ɓi vur kumo: Ti zleˀe na, ki tiram mesene ngi mizli ɗuwoy le. Mizli macohom manja zluwun avu kumo, ti taŋ mumoko le tir vurum na, godo ngi hirnga zana taŋhaya, ki cukoko taŋ di avra.

⁹Ki ɓulaka ngwas ngi mizli ɗuwoy avra, tir hay taŋ mawuɗama. ya muɗuva hirnga da ziri taŋhay na, ki tiɓaka taŋ di ngi wãˀ.

¹⁰Slikiɗam a ram, hana i pas ngi muska vu mata. Dili ɗik na, masa suw ti bonoy i naŋ, yo i bonoy ti vu ava.

¹¹Mbur maɓi ɓi lambaˀ, yo masli slir, maɓi: «I wuɗ ɓa i tulukum mi vur ɓi ngi mbaazla ati gwat ngi si mawi vu» na, kisa lumam, naɓa mbur nah vuna i mijiviɗ ngi mizli tayna.

¹²Kum dideˀ ngi Zakopoy keɗeɗe, i wuɗ i kusukum gar kumo. Kum Israyeley mindiram na, i wuɗ i cikilukum. I sa jumo hirnga kum arleˀe, kaɓa tumuŋhoy ar gezleŋ purla, kaɓa ginew taˀ gezleŋ ar li zum naŋ. Joˀ ˀay kumo a sa cino wuwwo asi kum mihaɗi na.

¹³Mbur mangirukum jiviɗe, ara ru ɓaˀ a mbuŋ kumo, ki ngiraka jiviɗ purla le, ki tuwuɗaka mizlingre le, yo ki bam le ti raˀa. Miɓaˀ a mbuŋ kum ngi kis kumo, i buy kum Bumbulvuŋ.