Read South Giziga HAB 3 Bible Online

HAB 3 - South Giziga bible

HAB 3

¹Dira dibiɗ ngi mijiviɗ Habakuk. Tuwuy ti tuwuy a mbuŋ Buymisemuŋ.

²Aw Bumbulvuŋ ɗu, mingiɓi ɗik ka miɓa na, i cine le, a giy zluwun le haɗa. Ambuh Bumbulvuŋ ɗu, ga taŋ ar vi hanayna matakwa! Ar vi hanayna na, ga taŋ, ɓa mizli a puraka taŋ takwa, amma ko da ki ro ti mevel tekeɗe kwana, wuluk keŋ, ki mbur mapur ircece haɗa.

³Buymisemuŋ ara so ti hirwuy Temaŋ, mbur mipala, a so ti muwã Paraŋ. Dudok naŋ a naha muŋ le, hirwuy a nih le ti hunum naŋ.

⁴A ra sawa ti li minjahha puɗak puɗaka. Wucuɗ ngi vuhoy cuw, ara wucuɗuko ti hur haŋ nga naŋ: gidaŋ nga naŋ, naŋ ɗum anga.

⁵A slino jiji mozorbono a mbuŋ naŋ, yo ar li naŋ mucuh le ti raˀa gar na, jiji ara liˀi ara ya.

⁶Da a cici le na, a jijika hirwuyo ngbir ngbir. Da ara pura sukwi ngi mizli na, a zluwunam kirkir. Muwã ngi seteye, a waha taŋ meɗ meɗ, li miɗingir misi zlezleheye, a mbuzlam le. Jiviɗ misi zleˀeheye, inga naŋhay.

⁷Yi pura na, guɗuk ngi Kusaŋhaya, a gam le geˀ geˀ teˀ. Li ɗum ngi hirwuy Madiyanaya, a gi le welele.

⁸Bumbulvuŋ, a ji mevel le ar zlazlaraya kwa? Mevel majuw na, ar zlazlaray kwa? Ka maslikiɗ himaˀ fõh fõh na, ng'ar mubuliy kwa? Ka majiɗ ar pilisey, ar mota ngi vurumoy na, ngi luuma bugawla kwa?

⁹Lek ɗik a ndir le gundulaŋ, luvut ɗikeye i mingiɓi ngi hudumoy. Ki pulo yam, a cira ruwuyo kãk kãk, a mulo jor jor.

¹⁰Da muwãhay a purukuw le na, a jijikam. Yam mivilvil ara zuɓ, yam mijileŋ ngi ruwuy maɓul na, ara cinawa, yo a nga diɓele nga dadala muŋ.

¹¹Luvut ɗikey mamulam cuɗiɗi, cuɗiɗi, yo ziwit ɗik mawucuɗ pilngiɗ pilngiɗ na, pas ati kiya a cicam le deŋ deŋ ar li taŋ.

¹²Ki bula ruwuyo kurzluˀ ti mevel ɗik na, Ti himaˀ ɗik mifõh fõh na, ki kurpa sukwi ngi mizli asi sar.

¹³Ki bo le nga laha mizli ɗikey, waɗ nga laha mbur ɗik ka muwunaŋ. Madiɗa ngi misi moˀoreheye, ki bukoŋ ˀaya caŋ, ki susuyumo mizli naŋhaya le ngirnin wãˀ!

¹⁴Hirnga ngi madiɗa taŋhaya, ki slina taŋ di ti luvut taŋhay tehhe a muŋ. Taŋ ara soko zleˀe wuwwo kaɓa vuŋ, ɓa a wurslikikiy wurslak wurslak, salalay, kaɓa taŋ mawurslukam mesene taŋhay ar li miyaŋŋa.

¹⁵Ki ki jiviɗ ti pilis ɗikeye tir mubuliy, baɗ tir yam majuruf ti gidaŋ.

¹⁶I cine hurum naŋ cin na, didak a miɗiy le haɗa: mi ɗu a ɓuruk ngbar ngbar ti zluwuno, i huluɓ hilaɓ hilaɓ. I ndir sĩw arleˀe, didak a muɗiy le. Asi hin ngi bonoyo sey i kutuko deŋ arleˀe, manja i wusu, ɓa i ru ng'avu sukwi ngi mizli mazlam ndra ti gurjik na.

¹⁷ˀUrufoyo anta fuyukom mata, gudubunoy anta yam ko neˀ le mata, i kutukoko yi ngi tutumburo, hã gar gar, guvahay anta yam gwat ngi zumoyo mata, ˀaway ati tumuhoy ara zizam ar gezleŋ taŋ, slahay kwana, anta ar gezleŋ taŋ mata.

¹⁸I sa jiɗ mececẽleŋ vur Bumbulvuŋ, i sa zluzluɓ asi Buymisemuŋ malihiy na.

¹⁹Bumbulvuŋ i Buymisemuŋ ɗu, i gidaŋ ɗu, a giy saraya kufaˀ kufaˀ kaɓa ngi muuni, aru tigi ti ya ar li miɗigir ɗigirey.