Read South Giziga ZEP 1 Bible Online

ZEP 1 - South Giziga bible

ZEP 1

¹Sofoni i mangal ngi Kusi, Kusi vuna i mangal ngi Gedaliya, dideˀ ngi Amariya, yo dideˀ ngi poprok ngi Ezekiyasa. Ar vi ngi Zoziyas mangal ngi Amoŋ mazum buy a ruwuy Zuda na, Bumbulvuŋ a vula mingiɓi naŋ ani da Sofoni.

²«Hirwuy micay na, i sa ngizla gwat ngi raˀahaya gar. I ya Bumbulvuŋ maɓi.

³I sa ngizla mizli ati gineweye, ɗiyuwoy maslikiɗam a muŋ ati kilif ngir yamaya. Mizli misi moˀoreheye, i sa ngizla taŋ ati gwat ngi gi taŋ ngi hizigiɗa mizli ng'ar mungra na. I sa susuyumo mizli tisi ruwuyo leɗeɗ avra. I ya Bumbulvuŋ maɓi.

⁴Bumbulvuŋ a ɓi: «I sa zuɓa haŋ ng'ar mizli ngi si ruwuy Zuda waɗ ng'ar mizli Zeruzalemey gar. Yo is ngi gwat magam di mikuli da Baˀal , slimiɗ ngi masay naŋhay ati masay naŋhay vuna, i sa susuyumo taŋ ti ruwuy tayna pay avra.

⁵Mizli majiɗam ng'ar gbale ɓa ngi huruk a mbuŋ wurzlaŋhay, mizli mahurkom a mbuŋ Bumbulvuŋ yo a hudumom ti slimiɗ ngi kuli taŋ Milkom,

⁶mizli mambuɗikiy duba da ya Bumbulvuŋ, masipikiy ta, yo macufuɗikiy ngi gi gwat taŋhaya ta na, i sa ngizla taŋ avra.

⁷Taˀaka mi a mbuŋ ya Bumbulvuŋ, asi hin nga ya Bumbulvuŋ naŋ gweˀe. ya Bumbulvuŋ i ra juw vu ngi gi mikuli, mizli naŋ mizilo taŋ, a ɗuwula taŋ mi le, ɓa a ndiram taŋ pal.

⁸Ya Bumbulvuŋ i ɓi: «Yawwa, ti hin ngi mikuli da Bumbulvuŋ, buyoy ati yaramahaya, i sa kuta taŋ ti bonoy, waɗ mizli maka ka zanahaya kaɓa sirik ngi mulakay na, i sa kuta taŋ ya.

⁹Ti hin nana, mizli matuwuɗam mohol, manahaka hay ngi kuli taŋ ti gwat mitiɓa ti gidaŋ waɗ ti gi gilaw da mizli na, i sa kuta taŋ ti bonoy.»

¹⁰«Yawwa, ti hin nana, a sa cinam majam salalay a Miviŋ ngi Kilifey, mawudam ˀay kaˀ ar Walahay Nawaya, hurum a sa gi ti gidaŋ a hirnga muwãhaya. I ya Bumbulvuŋ maɓi.

¹¹Mizli ngir slala mukutukoy, wudam cǝruw cǝruw, asi migi terereheye, a sa micam cek, mikiɗa kilo ngi ɓiri baraˀahaya, a sa ngizlam pay.

¹²Yawwa, ti di nana, i sa pura hirwuy Zeruzaleme bleŋ bleŋ ti torse, yo mizli muroko pulam vu ar li muska vu taŋ, taŋ maɓam: ‹Ko gwat malambaˀ, ko gwat mezle, Bumbulvuŋ anta gi ta› na, i sa kuta taŋ ti bonoy.

¹³Yawwa, a sa vaka taŋ zlili taŋhaya, a sa mbizlaka taŋ hayaya. A sa ndiram hayay, amma t'anta sa cifam ar taŋ ta. A sa hirvam gudubunoy, amma t'anta sa sam mbaazla naŋ ta.

¹⁴Hin madiɗa ngi Bumbulvuŋ naŋ gweˀe, naŋ gweˀe, ara zuɓo sar paɗ paɗa. Da hin nah mindilo le na, mizli a sa wudam cərəwcərəw, ko mbur miwirwir kwana, a sa widi: ‹gawla kilawa›.

¹⁵Hin nah, a sa tiri i hin ngi mevel, hin ngi bonoy ati hin ngi lik, hin ngi waha li ati hin ngi ndir ɗoɗok, hin ngi luvuŋ mititira timbiɗim, hin ngi gazlavay ati ngi gazlavay mililim lilim,

¹⁶I hin ngi fi tulum ati widi ngi vurum ar walahay muguno le ti moholoy ati hay musuburoy, misi a hirnga moholoy mira zliram.

¹⁷Mizli titiraˀahaya, i sa ca taŋ ar mendere, a sa ram tiɗam tiɗam kaɓa dangaray, asi taŋ a gam mungra le avu Bumbulvuŋ. Pumbus taŋ a sa pi ciih ciih, ɓaˀ li kaɓa mereɓ, dumvu taŋ a sa zĩˀĩ kaɓa gwat ngir kitikil.

¹⁸Ar hin Bumbulvuŋ masa ji mevel na, ko ɓiri bara taŋ, ko ɓiri tapasl tapasl taŋ, anta sa laha taŋ gu ta. Ar hin Bumbulvuŋ masa wuɗ vu suloŋ suloŋ na, vu ngi himaˀ ngi Bumbulvuŋ a sa zuma ruwuyo kap wãˀ, asi a sa bul vu culok a sa ngizla mizli ngi si ruwuyoyo pay gar.