Read South Giziga HAG 2 Bible Online

HAG 2 - South Giziga bible

HAG 2

¹Ar vi mucuw naŋ ngi Dariyus mazum buy, hin mizli ngir cuw ngaŋ purla ngi kiya mitarnaˀ naŋ na, Bumbulvuŋ a ɓa mijiviɗ naŋ Aze, ɓa a ɓi na:

²«Zorobabel, mangal ngi Seyaltiyel, buy miwi hirwuy Zuda, yo Yesuwa, mangal ngi Yosadak, masay madiɗa, waɗ is ngi mizli gara, ɓa taŋ na:

³Hay hana i mezle kuy ta wãˀ zleˀe ar dumbuŋ naŋ, mbur mindiro ti siifa ada a wuzla kumo mupura ɗaˀ kwa? Ki puraka wurenna, naŋ mbrike? Kum mapuraka wurenna na i hay mupuɗaw aruŋ kwa?

⁴Ani wurenna so na, ya Bumbulvuŋ i ɓuw ka Zorobabel, mangal ngi Seyaltiyel, buy miwi hirwuy Zuda, yo ka Yesuwa, mangal ngi Yosadak, masay madiɗa, waɗ kum is ngi mizli gara, tumom vu. Ya Bumbulvuŋ misi gidaŋ wãˀa, i ɓukum, slikiɗam, gam slra! Asi mike na, ya Bumbulvuŋ misi gidaŋ wãˀ i ɓukum, y'ada ati kumo.

⁵Asi ti kum muboko ti ruwuy Ezipte na, i juwa le kaˀ kaˀ a mevel ɗu, yo ˀUf ɗu naŋ da ati kumo, ko ki zluwunam neˀ le ta.

⁶Haˀaw, ya Bumbulvuŋ misi gidaŋ wãˀa, i ɓi na: hin ada neˀ, a ndir mata ɓula, muŋ ati hirwuy waɗ mubuliy ati li mingbaŋ ngbaŋhaya, i sa ga ɓa a wusam ngbir ngbir.

⁷I sa wusa sukwi ngi mizli cek, yo zlili ngi sukwi ngi mizli gar na, a sa so ng'aka, dar i sa ga ɓa hay hana a tiri mezle kuy ta wãˀ a muŋ ma. I ya Bumbulvuŋ maɓi misi gidaŋ wãˀa.

⁸Ɓiri bara inga ya, yo ɓiri tapasl tapasl kwana inga ya ma. I ya Bumbulvuŋ maɓi misi gidaŋ wãˀa.

⁹Ya Bumbulvuŋ misi gidaŋ wãˀa, i ɓi na: hay hana, mezle naŋ mukuy ta wãˀ na, a sa funa misi mudumbuŋ zleˀe na, yo i sa ga ɓa zuy a ndir ar li misenna.»

¹⁰Ar vi mucuw naŋ ngi Dariyus mazum buy, hin mizli ngir cuw nga mufaɗ ngi kiya mungoltir naŋ na, Bumbulvuŋ a ɓa mijiviɗ naŋ Aze na:

¹¹«Ɓa masayaya, anja ɓa a dubunam vur ɓihey ani. Bumbulvuŋ misi gidaŋ wãˀa a ɓi na:

¹²Da mbur a so ti useˀ ngi mikuli le mbizeˀ ti mi ngi zana naŋ na, da mi ngi zana naŋ nah tuwa a wus ɗaf le, malla a wus di i lar, mbaazla, mal, malla ko gwat ngi zum wanaka gar na, naɓa gwat tayna a tiram le taŋ pal kwa?» Masayay a mbiɗaka: «Ĩˀĩ».

¹³Aze a cufuɗa taŋ ma: «Kaɓa ani, mbur a tiri le naŋ ti dili, asi naŋ mija haŋ le avu vagay ngi mbur, yo da naŋ misa ja haŋ le avu gwat pal a wuzla gwat ngi zum tayna ti dili naŋ tuwa na, gwat nah a tiri le naŋ dili ya kwa?» Masayay a ɓiɗaka: «Gwat nah a tiri le ti dili.»

¹⁴Joˀ Aze a mbiɗa taŋ di so: «Bumbulvuŋ a ɓi na: ‹Mizli ati sukwi hana na, taŋ avu ya kanah ya. Gwat taŋ magaka ti haŋ taŋ ati gwat taŋ mavilikiy di gar ngi mikuli na, naŋ ti dili.›»

¹⁵«Buymisemuŋ a ɓi ma na: ‹Ani wurenna, wulkam kuy kuy, zle dana ati ngi mbuŋ ma gar. Dumbuŋ ti kum mizlaka kuso ɗugur ngi ndira hay nga ya Bumbulvuŋ t'aruŋ na,

¹⁶da mbur a jiɗ le zleˀe nga dirgwaɗ ngi hila alkamari agwaɗa kukur cuw na, a sa lumo i agwada kuruˀ tewle, yo da mbur aru le zleˀe nga zluro mbaazla ngir kisa litir kukur zlum ar li ɗuc naŋ na, a sa lumo i litir kukur cuw tewle.

¹⁷Slra kum migaka ti haŋ kumo, i nduva taŋ le, i hirya taŋ le ti tuˀuf, ti yam, amma ko i mo ti kum ng'avi ya gu ta na si. I ya Bumbulvuŋ maɓi.

¹⁸Wulkam kuy kuy, zle dana ati ngi mbuŋ ma gar, zle avu hin mizli ngir cuw nga mufaɗ ngi kiya mingoltir naŋ, naŋ mazli zle ti hin hana maɗuvaka virzi ngi hay ngi Bumbulvuŋ na, wulkam kuy kuy.

¹⁹Hilfa ngi alkamari a ndir le a dirgwaɗ kum aruŋ kwa? Ko gudubun, ko ˀuruf, ko yi ngi widis mazilaka grenade, ko tutumbur kwana, a yam ta. I sa ɗuwulukum mi zle dana muduba.

²⁰Ar hin mizli ngir mufaɗ ngi kiya na, Bumbulvuŋ a ɓa Aze ngi mucuw naŋ ma.

²¹«Ɓa Zorobabel, buy miwa hirwuy Zuda: ‹I sa wusa hirwuy ati muŋ ngbir ngbir.

²²I sa putukuso buyoy avra tir janga taŋ ngi buyoyo, yo gidaŋ ngi zumabuy ngi sukwi ngi mizli, i sa kiɗa mi taŋ. Mota ngi vurumoy ati mizli ngir taŋhaya, i sa putukuso taŋ. Pilis ati mizli ngir taŋhay a sa ndilam, mbur gar a sa muc ti kiɗ ngi maslalam ngi cil naŋ.

²³Zorobabel, ti hin nah na, i sa vuluw slra ngi gi, da ka gawla ɗu. I ya Bumbulvuŋ maɓi misi gidaŋ wãˀa. I sa tiri ti ka puɗaw haɗa a mihiri ɗu, kaɓa gwat ngi ɗuva haŋ taˀ angi ɗerewol, asi yi wini di i ka. I ya Bumbulvuŋ maɓi misi gidaŋ wãˀa.»