Read South Giziga ZEC 13 Bible Online

ZEC 13 - South Giziga bible

ZEC 13

¹«Tapasa, yam a sa bo vilvil ar deɗe ngi slalak ngi buna dili ati mungra ngi mizli ngi hay Davitey ati ngi Zeruzalemeye.»

²Tapasa, i sa kiɗa slimiɗ ngi kulihey asi ruwuyo, anta sa zilaka slimiɗ taŋ mata. Mijiviɗey ati lesl taŋ ngi hirya mbur na, i sa bi di avra tisi ruwuyo. I ya Bumbulvuŋ misi gidaŋ wãˀ maɓi.

³Da mbur a zla le ara njik ɓi ngi mbuŋ na, i cine ati mumuŋ tehhe a muŋ masa ɓakaŋ: «Sey ki mucu: asi ka manjik ɓi ngi mbuŋ ti slimiɗ ngi Bumbulvuŋ na, ki gi di i slir ngataraŋ.» Ti naŋ mira njik ɓi ngi mbuŋ tuwa na, dar cine ati mumuŋ tuwa a sa zligakaŋ ti gordo.

⁴Tapasa, mbur mijiviɗ gar, gwat naŋ mapura ti naŋ mira njik ɓi ngi mbuŋ na, a sa paŋ mesem, yo naŋ anta sa ki zana mija ti ngwic ɓa ngi gi gilaw da mizli mata.

⁵A sa ɓi na: «Yi mijiviɗ ta, ya i mbur muhuf. Li ngi guva ɗu ada zle ti ya misi ti zuŋ.»

⁶Da a sa cufuɗakaŋ le: ‹Na muguw waˀa a didak i mike?› na, A sa mbiɗa: ‹A gikiy waˀa a hay yeme ɗuwoy.›»

⁷Ka maslalam, puk pak ng'ar mijigin ɗu, waɗ ng'ar cil ɗu mupuɗaw na so. Kiɗa mijigin ɗu vagay, tumuŋhoy a sa zliɗam hirnga, yo ko ziri memeɗehey kwana, i sa zuɓa haŋ ɗu ng'ar taŋ. I ya Bumbulvuŋ misi gidaŋ wãˀ maɓi.

⁸Ziri ngi si ruwuy gar, kaɓa mingica taŋ le, li taˀ taˀ makir na, li mitaˀ taˀ cuwoy a sa kiɗaka taŋ, a ngizlam kap, amma masa ndir ti siifa i mingica li taˀ purla na tewle. I ya Bumbulvuŋ maɓi.

⁹Ziri mindiram ngac li taˀ purla tuwa na, i sa pura taŋ ar vu. Kaɓa mapam ɓiri bara malla ɓiri tapasl tapasl ti vu na, i sa pa taŋ kanah ya. Dar taŋ a sa zilaka slimiɗ ɗu, yo ya i sa cine taŋ di. I sa ɓi vur taŋ: «I mizli ɗuwoy», yo taŋ a sa ɓam vur ya: «Ya Buymisemuŋ taŋ, yi Bumbulvuŋ.»