Read South Giziga ZEC 2 Bible Online

ZEC 2 - South Giziga bible

ZEC 2

¹I zuɓa hiri paɗ na, i pur gwat: i durumoy mufaɗa. [2].

²Dar i cufuɗa modro maɓiy ɓi tuwa: «Gwat hanayna i mihey ka?» A mbiɗiy di: «I durumoy muwahaka hirwuy Zuda ati Israyel waɗ walahay Zeruzalem.»

³Akẽh na, Bumbulvuŋ a bigiy gudihey mufaɗa.

⁴Dar i cufuɗu: «Taŋ a soko gam mi maka?» A mbiɗiy di: «I durumoy muwahaka hirwuy Zuda, mbak ko mbur loŋ mislikiɗa hirnga a muŋ gu anta mata. Amma gudi hanayna a soko, ɓa a gaka taŋ zluwun, ɓa a kiɗaka sukwi tayna, sukwi mislikiɗam gak gak ar mizli ngi si ruwuy Zudahay, mizliɗaka taŋ hirnga mber mber na.»

⁵I zuɓa hiri paɗ na, i pur gwat ani: mbur deŋ ti zeweɗ ngi wi gwat kaw avu haŋ.

⁶I cufuɗaŋ: «Ki ru nga maka?» A mbiɗiy di: «I ru nga wa Zeruzalem, ɓa i si na sliprik naŋ ati jek naŋ.»

⁷Keɗ na, modro maɓiy tuwa ara ru, amma modro mekelem a so ji di hirnga.

⁸A ɓaŋ na: «Kil, ara ɓa mangal gawla ngi diga na: ‹Mbak Zeruzaleme, a ndir firndiw kine, asi zigiduw ati ginewey haɗi a sa ndiram anga.

⁹Yo ya i sa ndir anga. I sa ndir ang'aka mohol ngi vu gun gun hirnga naŋ, yo i sa biga dudok ɗu angaŋ.›» I ya Bumbulvuŋ maɓi.

¹⁰Kilam kutum kutum, pulaka hirwuy vay muŋhoyo. I ya Bumbulvuŋ maɓi. I zliɗukum hirnga le mber mber ng'asi gazlavay kuɗgulum gar, I ya Bumbulvuŋ maɓi.

¹¹Kum mizli Zeruzalemey, kum micifahay le hǝrǝk hǝrǝk a Babiloŋ, Sumuɗom, akum le.

¹²Bumbulvuŋ misi gidaŋ waˀ, mislino ya ti ɓi madiɗa, asi ɓi ngi sukwi ngi mizli mihilaka gwat kumoy na, a ɓi: Haˀaw, mbur mija haŋ le avu kum na, kite a wus di i zinga ngi hiri ɗu.

¹³Haˀaw, y'ani i zuɓa haŋ ɗu ng'ar sukwi tayna: ɓa i beke taŋhay masa hilaka gwat taŋhaya, joˀ kisa sinaka i Bumbulvuŋ misi gidaŋ wãˀ mislino ya.

¹⁴Kum Zeruzalemey, zluzluɓam, mumulom, asi y'ani so cifi a wuzla kumo, I ya Buymisemuŋ maɓi.

¹⁵Angi hin nah na, sukwi ngi mizli haɗi a sa vulaka vu taŋ da ya Bumbulvuŋ. A sa tiram mizli nga yahay, yo ya i sa ndir a wuzla taŋ, Dar kisa sinaka i Bumbulvuŋ misi gidaŋ wãˀ mislino ya ng'avu kumo.

¹⁶Bumbulvuŋ a sa tiri ti hirwuy Zuda i hirwuy nga naŋ angi Hirwuy Mipala, yo a sa wuna walahay Zeruzalem ava ma.

¹⁷Anja gwat misi ti pumbus gar na, a cifi lek lek a mbuŋ Bumbulvuŋ, asi neˀ na, a sa puɗuk, a bawa tir hay naŋ mipala.