Read South Giziga ZEC 3 Bible Online

ZEC 3 - South Giziga bible

ZEC 3

¹Akẽh na, Bumbulvuŋ a bigiy Yesuwa, masay madiɗa, ɓa i puraŋ, naŋ deŋ a mbuŋ modro ngi Bumbulvuŋ. Satana kwana naŋ da deŋ a ciki naŋ akẽh tir vay hazum naŋ, ara kupaŋ ɓi.

²Modro ngi Bumbulvuŋ a ɓa Satana: «Anja Bumbulvuŋ a gucuw mi Sataŋ, anja Bumbulvuŋ a gucuw mi, naŋ Buymisemuŋ muwuɗ Zeruzaleme da naŋ. Mbur hana i musluŋvu takwa?

³Yesuwa mideŋ a mbuŋ modro tuwa na, a ki zana mujupahay avu vu.

⁴Modro a ɓa gawla naŋhay mideŋ deŋhey a mbuŋ naŋ tuwa: «Cukokoŋ zana mujupahay na avra.» Akẽh a ɓa Yesuwa: «Ani i muɗo ka le tir mungra ɗikeye, wurenna a sa kukuw zana ngi muguzlumoy.»

⁵Joˀ a ɓi ma: «Anja a tuwuɗakaŋ loppol manja dili a hirnga.» Dar a tuwuɗakaŋ loppol manja dili a hirnga, waɗ aka kaŋ zanahaya. Modro ngi Bumbulvuŋ naŋ da deŋ akẽh.

⁶Dar modro ngi Bumbulvuŋ tuwa a njika ɓi ani da Yesuwa:

⁷Ya Bumbulvuŋ misi gidaŋ wãˀa, i ɓi: Da ki ra sipa jiviɗ ɗu, da ki ra ja ɓimuɗuva ɗuwoy a hirnga na, masa wa hay ɗu i ka ti hirnga ɗiki, yo kisa ki slimiɗ ar wazlaray ɗu ma, i sa cuw a wuzla mizli mideŋ deŋhey aka na.»

⁸Yesuwa, ka masay madiɗa, ka ati cil ɗikey mujoa mbuŋ ɗik na, cinam: asi kum i mizli ngi bigi gwat avu mizli, ani i wuɗ i so ti gawla ɗu, mikwanay ɗu. [3]

⁹Asi i ra ɗuva ɗugur ani a mbuŋ Yesuwa: hiri tarnaˀ ta taˀar ɗugur mupurla nah. Ya ti haŋ ɗu i sa tuh gwat ɗu nguɗ nguɗ ti nguɗ ava. yo i sa kiɗa hilfa ngi mungra ngi si ruwuy misenna, ar hin purla. I ya Bumbulvuŋ misi gidaŋ wãˀ maɓi.

¹⁰Angi hin nah na, kisa zilam vu ar wala kumo, nga musuka vu asi gudubunoy waɗ asi urfoy. I ya Bumbulvuŋ misi gidaŋ wãˀ maɓi.»