Read South Giziga ZEC 4 Bible Online

ZEC 4 - South Giziga bible

ZEC 4

¹Modro maɓiy tuwa a so puɗukiy kaɓa mapuɗukam mbur mihinje le.

²A cufuɗiy: «Ki pur mike?» Yi mbiɗaŋ di: «Yira pur gwata: I gwat ngi ɗuva lampe, miga gar ti ɓiri tapasl tapasl, jom ati gojogoɗ naŋ ngi mala tisi virzi naŋ, yo ti muŋ naŋ na, i lampehey tarnaˀ waɗ mi naŋhay tarnaˀ ngi ci kecekece ngi ji vu avu lampe tayna.

³Ti ciki naŋhaya ma na, widis ngi tutumburoy cuw, purla tir vay hazum ngi gojogoɗ ngi mala, yo purla numuŋ, tir vay gula.»

⁴I zla i cufuɗa modro maɓiy tuwa: «Buy ɗu, hana vuna a bigi di i mike?»

⁵Modro maɓiy ɓi a mbiɗiy di: «Gwat hana a bigi di i gwat kini na, ki si na takwa?» Joˀ yi ɓaŋ: «Kay, i si na ta Buy ɗu.»

⁶A mbiɗiy di ma, a ɓiy na: Bumbulvuŋ a ɓa Zorobabel ani: Ɓa kisa ga slra misenna na, anta ti gambara ngi vu ta, anta ti gidaŋ ta, amma ti ˀUf ɗu, maɓi i ya Bumbulvuŋ misi gidaŋ wãˀa.

⁷«Ka muwã madiɗa, ka vuna ki waka? Ki sa tiri li cay a mbuŋ Zorobabele. A sa bo ti ɗugur ngi mivaya tisi ka, kaˀ ar li babara, joˀ mizli a sa jam salalay vurˀeŋ: «Sise! Sise!»

⁸Bumbulvuŋ a ɓiy mi naŋ ani:

⁹Muɗuva virzi ngi hay misenna i Zorobabel ti haŋ naŋ, yo i naŋ masa kiɗa mi ngi ndir naŋ ti haŋ naŋ ma.» Dar kisa sinaka i Bumbulvuŋ misi gidaŋ wãˀ mislino ya ng'avu kumo.

¹⁰Hin ngi zli virzi ngi gwat meciɗekey na, mupura hiris le i waka? Tapas masa puraka Zorobabel kaw ti ɗugur ngi wi virzi ngi hay na, mizli a sa mumulom. Lampe mitarnaˀ tayna i hiri ngi Bumbulvuŋ, mira bula hirwuyo bal bal keɗeɗe.

¹¹Dar i zuɓa mingiɓi, i cufuɗ ma: «Widis tutumbur mucuw hanayna, mipal tir vay hazum waɗ pal tir vay gula ngi gwat ngi ɗuva lampehey na, a wuɗ a bigam di i mike?»

¹²I zla i cufuɗa sar mucuw naŋ ava ma: «Mihaŋ ngi widis tutumburoy mucuw tayna, maɓuloko mal ngi tir vigiɗ mucuw ngi ɓiri tapasl tapasl na, a bigam di i mike?»

¹³A mbiɗiy di: «A wuɗ a bigam di i gwat kini na, ki si na takwa?» Yi mbiɗaŋ di: «Kay, i si na ta Buy ɗu.»

¹⁴Dar a ɓiy: «Tayna i mizli muwunahay le cuw, mipa taŋ mal ngi vula slra le, muroko deŋ deŋ a mbuŋ Buy ngi ruwuy keɗeɗe.»