Read South Giziga ZEC 7 Bible Online

ZEC 7 - South Giziga bible

ZEC 7

¹s Gi dalyam ngi wulka Zeruzalem diŋ Ti Dariyus maɓul vi mumufaɗ naŋ ar zuma buyo, angi hin mufaɗ ngi kiya mungoltir naŋ mazilaka Kislew ngi vi nah vuna na, Bumbulvuŋ a ɓiy ya Zakari ani:

²Ti di nah na, mizli Beteley a slinaka Sareser, madiɗa ngi soje ngi buyoy ati Regem-Melek waɗ mizli naŋhay haɗi teˀe nga muca mevel ngi Bumbulvuŋ,

³yo ɓa a cufuɗaka masay magi slra ar hay ngi Bumbulvuŋ misi gidaŋ wãˀa, waɗ mijiviɗe ti ɓi ani: «Angi kiya muzlum naŋ na, sey i gi dalyam, kaɓa ya mugo di ani vi mbeˀ mbeˀ na makwa mbrike?»

⁴Dar, Bumbulvuŋ misi gidaŋ wãˀa, a ɓiy:

⁵Mizli ngi si ruwuyo gar ati masayaya, ɓa t'ani: Ki goko ani vi kukur tarnaˀ, ti kiya muzlum naŋ ati mitarnaˀ [4] ngi vi gar na, ki roko gam dalyam, yo ki roko ti tuwuy, na ki gaka dalyam nah vuna da ya kwa?

⁶Ti kum muzumam, yo misam na, ki gaka nah gar na, da hirnga kum takwa?

⁷Ti di Zeruzalem muzuy zuy, setette, walahayay gun gun hirnga naŋ, yo hirwuy ˀayzaw ati Hirwuy ngir zugudum muroko a haya, mingiɓi ngi Bumbulvuŋ, mijiviɗ misi zleˀehey mitilam di mi na, hana i mbiɗeˀvra naŋ takwa?

⁸Ya Zakari, Bumbulvuŋ a ɓiy ani:

⁹«Ya Bumbulvuŋ misi gidaŋ wãˀa, i ɓi ani: Slaka kiita ti jiviɗ naŋ jeŋŋe, yo anja mbur gar a ga gwat mikaslsla, yo a pura ˀircece da sukum naŋ.

¹⁰Wudiga ati mutuhu, moholoy ati misi murga na, ki guzuvuraka taŋ ta. Anja mbur gar asi kumo, a ja sukum naŋ a kwacay ngi gaŋ malambaˀ ta.

¹¹Amma na, a ngumam ki slimiɗ ar ɓi hana ta. A mbiɗam duba virnjik, a dislaka slimiɗeye, ɓa a cine ka ta

¹²A tiram ti mevel taŋ gidaŋ ka ɗugur mupuɗaw gingiliw gingiliw, mingiɓi Bumbulvuŋ misi gidaŋ wãˀ, ˀUf naŋ ati mijiviɗ misi zleˀehey maɓaka taŋ di na, ɓa a cine ka ta Dar Bumbulvuŋ misi gidaŋ wãˀa, a slikiɗ mevel haɗa teˀe.

¹³Vurˀe, Bumbulvuŋ misi gidaŋ wãˀa, a njika taŋ di ani: A zilikiy na, i cine taŋ di ta, kaɓa ya mizila taŋ, taŋ micinikiy di ta na ya.

¹⁴Joˀ i zliɗa hirnga taŋ mber mber nga wuzla sukwi ngi mizli misi taŋ misinaka taŋ ta. Mizli a zumaka hirwuyo a dirba taŋ: jiviɗ ngi cuh anta mata. Hirwuy ngi wuya, a tiram di hirwuy midaŋ daŋ.»