Read South Giziga ZEC 8 Bible Online

ZEC 8 - South Giziga bible

ZEC 8

¹Bumbulvuŋ misi gidaŋ wãˀa, a ɓiy na:

²Ya Bumbulvuŋ misi gidaŋ wãˀa, i ɓi na: i ra wuɗ Siyoŋ suloŋ suloŋ, mevel ɗu njim njim ka vu asi ɓi naŋ.

³Ya Bumbulvuŋ i ɓi ani: I ra mawa ng'avi Siyoŋ, ɓa i cifi a Zeruzaleme. A sa zilaka Zeruzaleme «Walahay-miteŋteŋ», yo a sa zilaka muwã ngi Bumbulvuŋ misi gidaŋ wãˀa ma na, «Muwã Mipal».

⁴Ya Bumbulvuŋ misi gidaŋ wãˀa, i ɓi ma: Hã midigilahay ati madangwasay, a sa cifam a jiviɗ madiɗahay aruŋ a Zeruzaleme, mbur gar na, ti mejegeɗ a haŋ a haŋ, asi a gam gal le haɗa.

⁵Jiviɗ madiɗahay ngir walahaya a sa naham ti ziri, ziri mizile ati mongosohoy a sa gam dungur a jiviɗ madiɗahaya.

⁶Ya Bumbulvuŋ misi gidaŋ wãˀa, i ɓi ani: Ar hin nah, da mizli mindirama, a puraka ɓi nah le, kaɓa i gwat magi ta na, ya kwana, i sa pura kaɓa i gwat magi ta ya kwa? I ya Bumbulvuŋ misi gidaŋ wãˀmaɓi.

⁷Ya Bumbulvuŋ misi gidaŋ wãˀa, i ɓi na: Haˀaw, i sa loho mizli ɗuwoyo, tisi ruwuy ngi si pas ngi miprik ati ngi si pas ngi pastaˀa.

⁸I sa mo taŋ, a sa cifam a Zeruzaleme. A sa ndiram i mizli ɗuwoy, yo i sa ndir yi Bumbulvuŋ taŋ miteŋteŋ, yo mijeŋŋe avu taŋ.»

⁹Ya Bumbulvuŋ misi gidaŋ wãˀa, i ɓi na: Cicam gidaŋ gidaŋ, kum mizli macinaka mingiɓi, mijiviɗey miɓaka angi hin hana maɗuvam di virzi ngi hay nga ya Bumbulvuŋ, ɓa ngi ndira hay ngi diradibiɗ da ya.

¹⁰Asi dumbuŋ angi hin nah na, anta wurkaka mizli zleˀe asi slra taŋ ta, yo mizli anta lumam gwat ti gineweye zleˀe ta, ko mizli anta ram digi zuy zuy zleˀe ta, vur mesene taŋhay, asi mike na, yi pula mizli le mbak, ɓa a slikiɗam ɓi ar wala taŋ.

¹¹Amma mizli mindiramay na, wurenna, y'anta avu taŋ kaɓa zleˀe mata. I ya Bumbulvuŋ misi gidaŋ wãˀ maɓi.

¹²Asi mike na, i sa vulo zuy asi ruwuyo, gudubun a sa yi, hirwuy a sa gi gwata, muŋ a sa pulo yama jor jor haɗa, i sa vula nah gar da mizli mindiramay na, ɓa a ndir da taŋ.

¹³Naŋ kine, kum Zudahay ati kum Israyeley, ani ki bigaka le a wuzla sukwi mekelemeye, kum i mizli minisahay le. Naŋ kine ya, i sa luhukum, yo i sa biga, kum i mizli muɗuwulukum mi le. Cicam gidaŋ gidaŋ, ki zluwunam ta so!»

¹⁴Asi mike na, ya Bumbulvuŋ misi gidaŋ wãˀa, i ɓi ani: kaɓa ya mujuwa a mevel ɗu, ɓa i guzuvurukum, asi dideˀ kumoy migikiy gwat ngi ji mevel na. Manjika hana i ya Bumbulvuŋ misi gidaŋ wãˀ, yo gwat ya mujuwa a mevel ɗu na, y'anta pula teˀ ta.

¹⁵Wurenna i juwa le a mevele, ɓa i gukum mezle, da kum mizli Zeruzalemeye. Ki zluwunam ta so.

¹⁶Gwat ya mawuɗ, ki jaka a hirnga na ani: anja mbur gar na, a ɓi ɓi mikaslsla da cala. Ar li ngi kiita kumoy gar na, slam kiita mijeŋŋe zliv maso ti zuy ar wala ngi mizli.

¹⁷Anja mbur a ja cil naŋ a kwacay, ɓa ngi gaŋ malambaˀ ta. Ki wuɗam hudum ti slire ta. Asi gwat tayna gar na, yi ra pura taŋ hiris le. I ya Bumbulvuŋ misi gidaŋ wãˀ maɓi.»

¹⁸Bumbulvuŋ misi gidaŋ wãˀa, a ɓiy na:

¹⁹Ya Bumbulvuŋ misi gidaŋ wãˀa, i ɓi na: Dalyam, kum magaka ar kiya mumufaɗ naŋ, muzlum naŋ ati mitarnaˀ naŋ waɗ ar kiya mukuruˀ naŋ na, a sa tiri avu kum Zudahaya, i hin ngi jiɗa mececẽleŋ, ngi mumul waɗ ngi muguzlum ngi cine ndum. Amma gwat madiɗa so na, wuɗam ɓi mikaslsla ati ɓi ngi vula zuy.»

²⁰Ya Bumbulvuŋ misi gidaŋ wãˀa, i ɓi na: «Sukwi mekelemey ati mizli ngir walahay madiɗahay, a sa soko nga Zeruzalem aka.

²¹Mizli ngir walahay mekeleme, a sa ram a ɓaka mizli ngir walahay numuŋ: «Akum, i ra tumbuloko Bumbulvuŋ misi gidaŋ wãˀa, i ra cicam a mbuŋ Bumbulvuŋ misi gidaŋ wãˀa. Mizli sa mbiɗaka taŋ di: ‹Ndr'i ram aya.›

²²Sukwi ngi mizli haɗa ati sukwi madiɗahay, a sa soko nga mbuŋ ya Bumbulvuŋ misi gidaŋ wãˀ a Zeruzaleme, a sa tumbulikiy ya Bumbulvuŋ.

²³Ya Bumbulvuŋ misi gidaŋ wãˀa, i ɓi na: Angi hin nah na, ziley kuruˀ maɓam mi wal avu ngi cala avu ngi cala na, a sa soko avu mbur Yude, kaw kaw haŋ avu mi ngi zana naŋ, a sa ɓam: «I wuɗam i ram asi ka, asi i cinaka na: Buymisemuŋ naŋ avu kum.»