Read South Giziga ZEC 9 Bible Online

ZEC 9 - South Giziga bible

ZEC 9

¹Bumbulvuŋ a til mi. Mingiɓi ngi Bumbulvuŋ a ndil a Hadrak, a Damas, waɗ a kiɗ mi a diga. Asi mike na, mizli titrahaya i ngi Bumbulvuŋhoyo ya, kaɓa sukwi Israyeley gar.

²Naŋ kine, mingiɓi a ndil le a Hamat, a Damas, waɗ a Tir ati Sidoŋ ma, li, mizli misi ti sinmijileŋ jileŋhey a diga haɗa.

³Hirwuy Tir a ndir li le da naŋ, li muguno ti mohol, a cikil ɓiri bara le zikitiŋ kaɓa murɓuk, yo a cikil ɓiri tapasl tapasl le haɗa, kaɓa ndileɓ a jiviɗ madiɗahay.

⁴Amma ani Bumbulvuŋ a sa tiɓa da naŋ, a sa mbizla mohol naŋ na, zliɗ zliɗ ng'ar mubuliy, naŋ walahay vuna, vu a sa zlizliraŋ.

⁵Askaloŋ masa pura keɗ na, a sa jijikaŋ haɗi, Gaza a sa diɗ gidaˀas gidaˀas ti bonoy, yo Ekroŋ a sa pura na, gwat majahaŋ jah na, anta mata. A sa zizaka buy Gaza, yo mizli anta sa cifam ar walahay Askaloŋ mata.

⁶Mizli miya ngi madamahay a sa pam a Asdoto, Filistiheye, gi taŋ zlokoko na, i sa kiɗa hilfa naŋ avra.

⁷ˀUse misi ti pumbus naŋ kine ati ˀuse taŋ ngi kulihey misi asi sliŋ na, i sa pursluko taŋ di avra ti balama. Dar naŋ vuna kwana a sa ndir da Buymisemuŋ ndra. A sa cifi buy a wuzla muy ngi Zudahaya, joˀ Ekroŋ a sa tiri kaɓa Zebusitey.

⁸I sa ɗiyi guɗuk a ciki hay ɗu, mizli maram ati masoko gar na, i jigina taŋ. Ko mbur loŋ masa guzuvura mizli ɗuwoy anta mata, vur hiri ɗu a ro taˀ ar taŋ wurenna.

⁹Walahay Siyoŋ, jiɗ mececẽleŋ! Walahay Zeruzalem, ji salalay kiɗ kiɗ. Pura, Buy ɗike n'ani so ng'avu ka. I mbur mijeŋŋe, yo i bugawla, i mbur mihina hirnga, naŋ gilaˀ ar zungu, ar gawla zungu kine aruŋ

¹⁰A sa ziza mota ngi vurumoyo baɗ tisi ruwuy Efrayime, waɗ piliseye tir walahay Zeruzaleme. A sa ngila lek ngi migi vurumoyo ngiɓac ngiɓac, a sa ɗuva ɓi ngi zuy a wuzla sukwi ngi mizli. A sa wa li, zle a mubuliy hã a mubuliy mekelem, yo zle a mizaw Efrata, hã ar hirwuy mira kiɗo mi.

¹¹Buymisemuŋ a ɓi: Naka so na, asi ya mujum ˀay ati ka, pumbus ngi gwat mikiɗa ngi mikuli mibiga na, i sa bo ti mizli ɗik mijahay na tir vigiɗ manja yama.

¹²Kum mizli mijahay le muroko ti njaha hiri, mam ng'ar walahay kum mugunohoy le ti moholoyo. Yi ra ɓa njah dana vuna si: yi sa guw mezle makaw cuw.

¹³Zuda, naŋ kaɓa lek ɗu, i ra ngirɗa cuwer naŋ, Efrayime i luvut ɗuwoy, i ra pi muwuŋ avu mi taŋ. Walahay Siyoŋ, i wuɗ i slina mizli ɗikeye, ɓa ara zlaka kiɗ kum, kum Grekeye, i sa tiri ti taŋ kaɓa maslalam a haŋ bugawla ngi vurum.

¹⁴Bumbulvuŋ a sa bugo vu a hirnga taŋ, joˀ luvut naŋhay a sa poko kaɓa wucuɗ ngi vuŋ. Bumbulvuŋ, Buymisemuŋ, a sa fa tulumo, a sa so ar burkataŋ ngi vuŋ masa so tir vay ruwuy na.

¹⁵Bumbulvuŋ misi gidaŋ wãˀa, a sa jigina mizli naŋhaya, ɗugur ngi vehvehluhoy muhuzugo taŋ ti hizigay a sa yaˀam asi sar taŋ, pumbus ngi mesene taŋhay a sa ɓul col col kaɓa mbaazla, kaɓa pumbus ngi mikuli ar skiɗ ngi kuca li, kaɓa pumbus mapaka zlar a mivay ngi li gi mikulihey mira kiɗam mi.

¹⁶Tapasa, Bumbulvuŋ, Buymisemuŋ taŋ a sa laha taŋ, taŋ mizli naŋhay misi kaɓa tumuŋhoyo. A sa wucuɗam asi ruwuyo, rak rak kaɓa ɗugur mupuɗaw puɗaway.

¹⁷Kay, a sa ndiram ti mumul! Kay, a sa ndiram kuy! Alkamari ati mbaazla a sa vula gidaŋ da ziri gawla ati diiliheye.