Read South Giziga MAL 1 Bible Online

MAL 1 - South Giziga bible

MAL 1

¹Bumbulvuŋ a ɓa Malasi ɓa a ɓa mingiɓi naŋ da Israyeley. [1]

²Bumbulvuŋ a ɓi na: «I ra wuɗukum», amma kumo, ki ɓam: «Mabiga ki ra wuɗa ndra vuna i mike?» Bumbulvuŋ a mbiɗa taŋ di: «Esaw i sukum ngi Zakop takwa? Amma yi wuɗ di i Zakop. I ya Bumbulvuŋ maɓi.

³Dar yi hirsa Esawa. Yi pula muwã ngi Esawaya mbak, a tiram daŋ daŋ, yo hirwuy naŋ a ndir da kiriɓuh ngi wuzlaɓuh mikirɗak kirɗakay.

⁴Da Edomoy ara ɓam: «Mesene ndrahay a waham ndra walahayaya le, amma ndra, sey i ndiraka hiri taŋ a muŋ» na, ya Bumbulvuŋ misi gidaŋ wãˀa, i ɓa taŋ na: «Taŋ, anja a ndiraka taŋ a muŋ ɓula, na ya i sa waha taŋ avra na si. Dar mizli a sa caka taŋ slimiɗe: ‹Hirwuy ngi moˀore.› waɗ ‹Mizli misi Bumbulvuŋ mambiɗa taŋ hirnga, ko mbak le ta›.

⁵Ki sa puraka ti hiri kumo, joˀ kisa ɓam: «Bumbulvuŋ i madiɗa asi ruwuy Israyele gar.»

⁶Mangal a cika hirnga da cine, yo gawla ngi mbur a cika hirnga da buy naŋ takwa! Na, da yi cine kum na, ama ani kum macikikiy hirnga vuna ska? Yo da yi buy kum na, ama ani kum macinikiy mi vuna ska? I ya Bumbulvuŋ misi gidaŋ wãˀ maɓi da kum masayay, kum maburɗaka slimiɗ ɗu na. Joˀ ki ɓam jak ma na: «I burɗaka slimiɗ ɗike ar wanaka» kini ma mbrike?

⁷Ki hiryaka ti kum masoko ti gwat ngi zum misi dili ng'ar li gi mikuli ɗu. Na ki ɓam: «I hiryukuw vuna mbri mbrike?» kini ma. Ki hiryaka ti kum maɓam zlahzlah: «Li gi mikuli ngi Bumbulvuŋ naŋ puɗaw ta na.»

⁸Da kum masoko di ngi gi mikuli i ginew dangar na, i gwat malambaˀ takwa? Yo da ki soko di i ginew mikiciɗek sar malla misi jiji na, i gwat malambaˀ takwa? Ani inga vulaka ginew misi kanah vuna da buy kum miwi li so. Ada sa ciraŋ hiri kwa? N'ada sa tuɓukum di ti mevel mezle kwa? I ya Bumbulvuŋ misi gidaŋ wãˀ maɓi.

⁹A dirba nah so na, ki tumbulikiy ya Buymisemuŋ, ɓa i purukum ircece. Magaka kahana gar na i kum. Y'ada i sa tuɓukum ti mevel purla sukwani? Macufuɗ kahana i ya Bumbulvuŋ misi gidaŋ wãˀa?

¹⁰Anja ɓa kisa ra bulam vu ar li gi mikuli ɗu lambaˀ ta na, a wuzla kumo, zliv mbur ada ngi gica mizlingre muduba sukwa? I ya Bumbulvuŋ misi gidaŋ wãˀ maɓi. Gwat maciriy hiri neˀ avu kum anta. Gwat kum mavulikiy di angi mikuli na, y'anta hĩyã ta ani!

¹¹Slimiɗ ɗu ara zil haɗa a wuzla sukwi ngi mizli, zle tisi pas ngi miprik hã tisi pas ngi pastaˀa. Ar li gar na, mizli ara zlumam urdi vur ya, yo ara vulikiy gwat manja dili ngi gi mikuli, asi slimiɗ ɗu ara zil haɗa a wuzla sukwi gar. I ya Bumbulvuŋ misi gidaŋ wãˀ maɓi.

¹²Amma na, ki hiryaka li gi mikuli ɗu, dar ki ɓam: «Li gi mikuli ngi Bumbulvuŋ, i mihirya le, yo gwat ngi zum ngi raˀa mavulakaŋ di da naŋ, naŋ anta puɗaw wãˀ ta» kini ma!

¹³Yo ki ɓam ma na: «Kayya, hana i gira vu ngatara», yo ki gam di kaɓa ɓi nah a cukum ta, i ya Bumbulvuŋ misi gidaŋ wãˀmaɓi. Ginew muhulo, mikiciɗek sar, malla misi jiji na, ki soko di, dar ki gikiy di mikuli. Ki waka na ɓa i tiɓa tisi haŋ kumo sukwani? I ya Bumbulvuŋ maɓi.

¹⁴Mbur misi ti ginew mizile mezle ar gezleŋ naŋ, a pula nah mbak murvay. Amma a ɓi ngi vul, yo ngi gi mikuli da ya Bumbulvuŋ i ginew mezle ta na, nis a jaŋ le. Asi yi buy madiɗa, yo slimiɗ ɗu ara ga zluwun da sukwi ngi mizli. I ya Bumbulvuŋ misi gidaŋ wãˀ maɓi.