Read South Giziga MAL 3 Bible Online

MAL 3 - South Giziga bible

MAL 3

¹Bumbulvuŋ misi gidaŋ wãˀa, a ɓi na, i ra slina mislin ɗu ani. A sa ɗiyiy jiviɗ a mbuŋ ɗu. I buy kum mawuɗam, i modro ngi jumoˀay kum muroko ti may naŋ tuwa. A sa ci gurjik ng'ar hay naŋ. Nˀani, ara ndilawa.

²Ti naŋ masa so na, masa ɓusa ɓi nah gu i waka? Ti naŋ masa bugo vu na, masa cici deŋ a muŋ gu i waka? Asi naŋ kaɓa vu munjulili mapam di ɓiri, kaɓa zabun mabunam di zana.

³A sa cifi ngi pi ɓiri waɗ ngi bi ti zayɓiri bara. A sa bi ti dili ngi dideˀ ngi Levihey avra wãˀ. A sa jujuro taŋ kaɓa majujurom ɓiri tapasl tapasl ati ɓiri bara. Masa ndiram avu Bumbulvuŋ, i mizli mavulakaŋ gwat ngi mikuli mizlir le kaslsla wãˀ.

⁴Gwat ngi mikuli, Zudahay ati Zeruzalemey masa vulakaŋ taŋ na, Bumbulvuŋ a sa tiɓa taŋ ti mevel mezle, kaɓa ar hin misi zleˀe, yo kaɓa ar vi mucohomoy zleˀe.

⁵I sa so a wuzla kumo ngi gukum kiita kumoyo. Mizli misi cucukoy ati migi madamahay, muhudum ti slirey ati muzuma migir ngi migi slrahay, ngi ngwas wudiga ati mutuhuhoy, muguzuvura moholoyoy, yo taŋ mazluwunam ti ya ta gar na, yi sa mbiɗa taŋ hirnga kutumo si. I ya Bumbulvuŋ misi gidaŋ wãˀ maɓi.»

⁶Kay, ya Bumbulvuŋ, y'anta mbiɗi ta. Amma kumo, kum i dideˀ ngi Zakopoy hã wurenna.

⁷Zle avu dideˀ kumoy na, kumo ki baˀam le avu ɓi ɗu, ya muɓukum di ɗaˀ le na, yo kum anta jaka a hirnga ta. Moko ng'avi ya, ɓa ya i sa mo ng'avu kum aya. I ya Bumbulvuŋ misi gidaŋ wãˀ maɓi. Na ki ɓam jak ma na: «I sa moko vuna mbri mbrike!» kini ma.

⁸Mbur a ga gilaw da Buymisemuŋ gu kwa? Ani ki ra gikiy gilaw! Ki ɓam na: «I gukuw gilaw ar mike?» Ki gikiy gilawa ar mukuruˀ gwat kumoy ati gwat kum mawuɗam ar gwat ngi lum kumoy ngi vul da ya na.

⁹Vurˀe, nis ɗu a jukum le wãˀ, asi kum mizli keɗeɗe gar na, ki gam di i gilaw da ya.

¹⁰Soko ti mukuruˀ ngi gwat kumoyo ng'ar hay ngi wi vu ti gwataya, ko ki pulam neˀ le ta. Anja gwat ngi zum ada ndrehhe ar hay ɗu. Inga cam a kwacay ɗu vur ɓi hana ɗagay, ɓa ki puraka ɗi, da ani i wunukum mifiliw ngi muŋ, ɓa vuŋ a gi ta kwani? Yo da ani i ɗuwulukum mi, ɓa ki lumam gwat haɗa fineˀ gidaŋ ta kwani? I ya Bumbulvuŋ misi gidaŋ wãˀ maɓi.

¹¹I sa tika birnjeɗeke, ɓa a zuma gwat ngi migam kumoyo mata, yo ɓa gudubun ngir guva kumoy a yam. I ya Bumbulvuŋ misi gidaŋ wãˀ maɓi.

¹²Dar sukwi gar a sa tilam mi vur kumo, kum ar mumul, asi kisa ndiram ar hirwuy mimezle. I ya Bumbulvuŋ misi gidaŋ wãˀ maɓi.

¹³Ya Bumbulvuŋ i ɓukum na, mi kum maɓikiy di da ya na, i mi ngi sliŋ, amma kumo, ki ɓam ma na: «Mi ngi sliŋ vur ka, ndra miɓaka ar wala ndra vuna i wanaka?»

¹⁴Ki ɓam ma na: «Gi mezegwel da Buymisemuŋ vuna, a pul gir mike? Yo Bumbulvuŋ misi gidaŋ wãˀa, ɓi naŋ miɓa taŋ ɗaˀ ɗaˀ le, yo cifi ti tuwuy a mbuŋ naŋ vuna, ji taŋ a hirnga a pul gir mike?

¹⁵Ani wurenna, i ra puraka mizli muhuhumo vuhoy kwana, ara mumulom. Ko mizli mukuwahay tekeɗe ma, slra taŋ ara ru nga mbuŋ. Da taŋ micam le a kwacay Buymisemuŋ kwana, ko gwat maga taŋ anta.»

¹⁶Naŋ kine, mizli mazluwunam ti Bumbulvuŋ a kiɗam slir ar wala taŋ kahana. Bumbulvuŋ a jika slimiɗ le asi mingiɓi taŋ, yo a cine taŋ di le. Mizli mazluwunam ti Bumbulvuŋ, yo maɗuvakaŋ hirnga gar na, a tohoko slimiɗ taŋ le toh toh ar ɗerewol ɓaˀ a mbuŋ naŋ.

¹⁷Ya Bumbulvuŋ misi gidaŋ wãˀa, i ɓi na, mizli tayna, angi hin ya masa ga slra ɗu na, a sa ndiram avu ya, i mizli nga ya ɗuwoy. I sa ga taŋ mezle kaɓa cine maga mezle da mangal naŋ miteŋteŋ.

¹⁸Akẽh na, kisa puraka wal wal misi ar wala ngi mbur mijeŋŋe ati mbur misi moˀore, yo ar wala ngi mbur magi slra ngi Buymisemuŋ ati magi ta.

¹⁹Asi hin ara ndilawa, hin muculok kaɓa li di ɗaf. Mizli muhuhumo vuhoy ati misi moˀorehey gar, a sa ndiram kaɓa giziŋ muˀulo. Hin nah a sa wura taŋ. I ya Bumbulvuŋ misi gidaŋ wãˀ maɓi. Ko slaslalak malla ko mihaŋ naŋ meciɗek a ndir neˀ le ta.

²⁰Amma kum mizli mazlunam ti ya na, gidaŋ ɗu ngi luhukumo, a sa bo ar kum kaɓa pasa, i gidaŋ ɗu nah masa mbulukum. Ki sa bam, joˀ kisa jiɗam paŋ paŋ kaɓa ziri slahay magilaka taŋ ti gil.

²¹Angi hin ya masa ga slra ɗu nah na, kisa njirslaka misi moˀorehey asi sar, asi a sa tiram kaɓa fucu asi sar kumo. I ya Bumbulvuŋ misi gidaŋ wãˀ maɓi.

²²Gawla ɗu Moyis, ya muvulaŋ ɓimujuwa taˀ gar ati sirik ɗuwoy a Horep da Israyeley gar na, wulkaka ɓimujuwa naŋ na keŋ.

²³Dumbuŋ ar hin ngi Bumbulvuŋ, hin madiɗa masa ndilawa, magi zluwun da mbur na, i wuɗ i sa slinukum mijiviɗ Eli.

²⁴Naŋ a sa ga ɓa cine ngi ziri a ɗiyam ɓi ati zir taŋ mizileheye, yo zir mizilehey kwana, ɓa a ɗiyam ɓi ati cine taŋhay aya. Kanah na, naɓa y'anta so nisa hirwuy kumo ti slimiɗ ɗu mata.