Read South Giziga 1 Mak 10 Bible Online

1 Mak 10 - South Giziga bible

1 Mak 10

¹Ar vi miskat ti kukur merkeɗ naŋ na, Alekzaŋdir Epifan, mangal ngi Antiyokus a bi, a ra tuɓa ruwuy Ptolemayise. Mizli a tuɓakaŋ, dar a zla zuma buyo akẽh.

²Buy Demetriyus micina ɓi naŋ na, a kus sojehey haɗi wãˀ ɓa a ram a ra zliram didak ati Alekzaŋdir ngi kiɗa vu.

³A tuh letir toh toh da Zonataŋ ti ɓi ngi gi leleŋ, waɗ a ɓaŋ ɓa a sa cifaŋ ar li madiɗa ma.

⁴A ɓi ti kwacay naŋ zle: «Anja i wusam vu ngi jumoˀay ati Zonataŋ dumbuŋ, vur naŋ masa jum ˀay ati Alekzaŋdir ng’ar ndra.

⁵Asi mike na, naɓa gwat malambaˀ ndra migaŋ di, da naŋ vuna, waɗ da sukum naŋhay ati sukwi naŋhay na, a sa wulukaka keŋ.»

⁶Demetriyus a pula jiviɗ da Zonataŋ ɓa a kus sojehey, yo ɓa a vuɗ gwat ngi vurumoy, waɗ ɓa a tiri mbur ngi seˀe. A ɓaŋ ɓa mizli naŋhay misi ar walahay Zeruzalem muguno ti mohol tuwa, a sa pulaŋ taŋ ma.

⁷Zonataŋ a so nga Zeruzaleme, a slufa letir tuwa a mbuŋ mizli gar waɗ a mbuŋ mizli gar misi ar walahay Zeruzalem, muguno ti moholo ma.

⁸Buy mupula jiviɗ da Zonataŋ ɓa a kus sojehey aya na, zluwun a ga taŋ le haɗa.

⁹Mizli ngir walahay muguno ti mohol a makaŋ ti mizli mija naŋhaya, joˀ naŋ a vula taŋ da mizli ngi hay taŋhay.

¹⁰Zonataŋ a cifi a Zeruzalem, a zla a ndir hayay, waɗ a ɗiya walahayha.

¹¹A ɓa mindira hayaya ɓa a ndiram mohol migidaŋhay waɗ ɓa a gunoko muwã Siyoŋ ti ɗugur musuburoy. Dar a gaka kanah.

¹²Hay muguno ti moholo, mizli soje mulakay misi araˀa, taŋ mbk kil.

¹³Mbur gar a pula li naŋ magi slra naŋ, ɓa a mam ng’asi ruwuy taŋhay.

¹⁴Sey a pulam mizli njiraˀ kini a Bet-Sur. Mizli tayna, a pulaka ɓimujuwahay ati ɓi ngi sirikeye le. Asi mike na, Bet-Sur i walahay taŋ maɗumom ara.

¹⁵Letir, Demetriyus mislin di da Zonataŋ na, buy Alekzaŋdir a cina ɓi naŋ le. Ɓi ngi kiɗa vu ati ɓi ngi bugawlahay waɗ ɓi ngi bonoyoy, Zonataŋ muluma taŋ gar ati sukum naŋhay na, a slufakaŋ taŋ le ma.

¹⁶Buy a zuɓa ˀaya paɗ a muŋ, dar a ɓi: «Mbur misi kaɓa naŋ na, ko ndr’anta sa lumam ta ndidaˀ wãˀ. Sey i jam di ngama, yo a tiri mbur ngi si ndra.»

¹⁷A tohoŋ letire. Ɓi ngi raˀa n’ani:

¹⁸«Buy Alekzaŋdir a ra ja haŋ da sukum naŋ Zonataŋ.

¹⁹I cina ɓi ɗike cin cin na, ki mbur migidaŋ, yo ka ter ngi tiri ngama ndra.

²⁰Vurˀe zle wurenna, yi cufuw le, ki masay madiɗa ngir sukwi ɗiki, yo ki ngama ngi buy ma. Wurenna, anja ki jumo ng’avi ndra, yo ki cifi ngama ndra.» Buy a slinaŋ ti letire jom ati zana mislirkeɗ waɗ loppol ngi ɓiri hirnga.

²¹Ar kiya mitarnaˀ naŋ ngi vi miskat ti kukur merkeɗe, Zonataŋ a ka zana ngi masay madiɗa heye, naɓa i muguzlum ngi guɗukoy. A kus sojehey waɗ aɗiyi gwat ngi vurumoy.

²²Demetriyus micina ɓi naŋ na, ko hiri a ciraŋ ta. Dar a ɓi:

²³«Ndra migam na i gwat mi ska? Ani Alekzaŋdir a ji ngam ti Zudeheye le dumbuŋ ar ndra ɓa a vulaŋ gidaŋ.

²⁴Ya kwana, i sa toho taŋ letir. I sa vula taŋ li cifi mezlehey, waɗ gwat ngatarahay ma. Kanah na, naɓa a sa jinam is tisi ndra.»

²⁵Letir naŋ mutoho, mingiɓi ngi raˀa n’ani: «Buy Demetriyus a ra ja haŋ da sukwi Zudehey.

²⁶Gwatay, ndra miɗuvuka ɓi ngi gi taŋhay ar wala ndra ati kum na, ki sinaka mezle naŋ le, vurˀe ki ndiram le ki ngama ndrahay, yo ki ram tisi mesene ndrahaya ta. Ɓi t’ayna gar i cinaka taŋ le, yo hiri a cira ndra le.

²⁷Ndiram teŋteŋ ndrehhe ati ndra, ɓa i sa vulukum migir kumo, asi kum mijinam ndra na.

²⁸Buutu kum mawurkaka na, i sa mukum di ng’aruwuy haɗa, yo i sa vulukum gwat ngatarahay.

²⁹Wurenna vuna, Zudehey gar, kum mawurkam buutu ho gar, kum mawurkam laada ngi mandaŋ, yo kum mawurkam buutu da buyoy na, i pulukum ɓi naŋ le avra.

³⁰Waɗ mana, mimakir ngi gwat ngi gam kumoy, kum mavikiy di, yo reta ngi yi ngi widisey kum mavilikuy di na, yi pula ɓi naŋ le avra. Ɓi hana a zli zle dana vur ruwuy Zuda ati distrik ngi Samari mimakir aseˀehey na gar.

³¹Zeruzalem a sa tiri walahay mipal, yo ɓi ngi buutu anta sa ndilaŋ naŋ ati ruwuy ngi seˀeheye ta. Yo mukuruˀ ngi gwat ngi lum naŋhaya, ko mbur masa tiɓi ava anta.

³²Gwatay, ya matuɓa taŋ ar walahay Zeruzalem muguno ti mohol tuwa, yi pula ɓi naŋ le. Yi pula ɓi naŋ le a si haŋ ngi masay madiɗa. A sa wini mizli ti haŋ naŋ ngi jigin naŋ.

³³Mbur Zude gar, miram di le ng’asi ruwuy ɗu wanaka gar na, yi pula le, i mbur diimu. Ko y’anta wuɗ dala tivi taŋ ta wãˀ. Anja ko a wurkam buutu ta, yo a vulam laada a hirnga ginew taŋhay ta.

³⁴Ar hin ngi muguzlumoy gar, hin sabat ati hin ngi kiya wuleɗey waɗ hin ngi muguzlum muɗuvahay gar na, hin makir ɓa hin t’ayna masa ndiloko, yo hin makir a dirba taŋ na, Zudehey gar misi asi ruwuy ɗu anta sa wurkam gwatay ta, a wurkam duvusoy ta ma.

³⁵Ko mbur masa wa taŋ, ɓa a tika taŋ ˀay ngi wurka gwat ta.

³⁶Da ko a hilam Zudehey durmuk kukur makir ngi tiri soje ngi buyoy kwana, a sa lumam migir mupurla ati ngi mizli mekelemey misi ar buyo.

³⁷Cah mekelemey a sa ram ng’ar walahay mimezle ngi buy muguno ti moholoy, malla a sa cifaka taŋ ar li ngi mupuɗaw puɗaw ngi buyoy. A sa wunaˀam madiɗa ngi soje taŋhay ati madiɗa taŋhay awuzla taŋ, yo a sa gaka gwat taŋhayakaɓa ɓimujuwa taŋ mawuɗu. A sa gaka cek kaɓa buy muɗuva ɓi naŋ da mizli ngi si ruwuy Zuda na.

³⁸Distrik mimakirey, ngi si walahay Samari, mujumo ng’avi Zude na, a sa jumom ruwuy purla ati walahay Zude. T’anta sa cinam mi da mbur mekelem mata sey da masay madiɗa.

³⁹Walahay Ptolemayis ati ruwuy ngi seˀehey gar, i vulakaɓa gwat ngatara da hay ngi Buymisemuŋ misi a Zeruzalem. Kahana, lum ngir taŋ gar a sa ndila wurka gwat mizliɗa ar li gi mezegwele.

⁴⁰Ya kwana, vur vi gar i sa vul dala gabal kuruˀ nga zum ar dala gir jiiba ɗu, mutuɓa ar walahay ngi si ruwuy ɗuwoy na.

⁴¹Ti zlezle na, misli migi slra ngi dalahay a paka mi ngi dala taŋ ng’ar li mipal , ani a sa pulaka ɓi naŋ teˀ. Wurenna, sey a vulaka cek ngi gi slra ngir hay ngi Buymisemuŋ.

⁴²Yo mana, vur vi gar na, ada a hilam dala gabal zlum zleˀe ar lum ngir hay ngi Buymisemuŋ, anta sa hilaka dala nana mata, a sa ndir da masayay mira gam slra ti hin nah.

⁴³Ko waka gar misa hin le ar hay ngi Buymisemuŋ misi a Zeruzalem, malla asi ruwuy Zeruzalem gar vur a vula buutu da buyo ta, mallla vur naŋ ti duvus mekelem na, anta sa jaka mata. Anta sa tuɓaka zlili taŋ ar li ya mazum buy ara na ta.

⁴⁴Dala ngir birtete ngi buyo, a sa ndir ngi ndira li gi mikuli ati ngiɗiyi naŋ.

⁴⁵Ɓa ngi ndira mohol ngi Zeruzalem ati ngi gun naŋ ti mohol waɗ ngi ndira mohol migidaŋ ngi walahay Zude, a sa hilam dala ar birtete ngi buy vuna ma.

⁴⁶Ti Zonataŋ ati mizli naŋhay micinaka ɓi nah na, ngumom tuɓa ɓi naŋ ta, a pulaka teˀe. Asi mike na, gwat malambaˀ, buy Demetriyus miga asi ruwuy Israyel, yo naŋ miga taŋ bonoy na, taŋ a roko di a hirnga aruŋ.

⁴⁷A juwaka a mevel taŋ ɓa a vulaka vu taŋ ng’avi Alekzaŋdir, asi mike na, naŋ a ɓa taŋ ɓi ngi leleŋ, yo a tiram mizli ngi seˀehey wãˀ.

⁴⁸Buy Alekzaŋdir a kus sojehey haɗa, joˀ a ram nga kiɗa vu ati Demetriyusu.

⁴⁹Buyoy mizlaka kiɗa vu na, soje ngi Alekzaŋdirheye taŋ mbk kil. Demetriyus a sipa taŋ, hã a lum bugawla ar taŋ.

⁵⁰A kiɗam vu hã pas a diɗi. Amma a kiɗaka Demetriyuso tapasa.

⁵¹Alekzaŋdir a slino mijiviɗ naŋhay ng’avi Ptoleme, buy Ezipte ti mingiɓi ani:

⁵²«Y’ani i mo le ng’asi ruwuy ɗu, yo i cifi ar li ngi dideˀ ɗuwoy. I kiɗa Demetriyuso le, yo i tuɓa li ndra le.

⁵³Naŋ kine, i kiɗam vu le ati naŋ, i kiɗa le jom ati soje naŋhaya. Ani i tuɓa li cifi nga naŋ buyo le.

⁵⁴Anja zle wurenna, i tiram ngamahay, yo anja ki vuliy zuŋ ɗik na ngi ngwasa: i sa tiri jomo ɗiki, yo i sa vuluw mindi le ɓa i vuluw di, daka waɗ da zuŋ ɗik vuna.»

⁵⁵Buy Ptoleme a mbuɗaŋ di ani: «Hin ka mici ng’asi ruwuy ngi dideˀ ɗikey, yo ka micifi ar li taŋ ngi zuma buy na, i hin ngi mumul.

⁵⁶Ani wurenna, i sa guw gwat ka mutoho taŋ na gar, amma sona, sawa i zliram a Ptolemayis, adiga i sa puram vu, yo i sa tiri jomo ɗik kaɓa ka miɓa tuwa.»

⁵⁷Ptoleme a ram nga Ezipte ati zuŋ naŋ Kleyopatir, a ndilam a Ptolemayise ar vi miskat ti kukur merkeɗ naŋ.

⁵⁸Buy Alekzaŋdir a zlir di adiga. Ptoleme a vulaŋ zuŋ naŋ ngi ngwasa. Joˀ a gaka muguzlum ngi kis naŋ ti mizli hoyo hoyo, kaɓa mizlir ngi le avu buyoyo.

⁵⁹Buy Alekzaŋdir a tuh letir da Zonataŋ ɓa a sa zlir di.

⁶⁰Zonataŋ a so ɓaˀ ɓaˀ zana mezlehey, dar a zliram ati buy mucuwoy tuwa. A vula taŋ ɓiri gaza, ɓiri tapasl tapasl, ati gwat mekelemey haɗa da taŋ ati ngama taŋhaya gar. Dar a tuɓakaŋ kuy kuy.

⁶¹Dar mizli Israyeley, matuɓaka ɓi ngi Buymisemuŋ tahay, masoko to mendere asi ruwuyo, a kusom ɓa a ra zliram didak ati Zonataŋ. A ra jakaŋ a ciki buy, Alekzaŋdir, amma ko buy a ki slimiɗ ar ɓi taŋ neˀ ta.

⁶²Buy a ɓa mizli ɓa a cukoko zana ngi Zonataŋ, ɓa akakaŋ zana gagaza ngi gi muguzlum jaka, joˀ a gaka kanah.

⁶³Buy a cufaŋ joˀ a cinaŋ, joˀ a ɓa mizli ngi seˀeheye: «Bam di ng’ar walahay, yo ɓaka mizli ko mbur masa widi di vur ɓi neˀ anta. Yo anja mbur a muɗaŋ didak neˀ le ta.»

⁶⁴Mizli mitikina vuhoy micinaka, mahunumaka Zonataŋ kaɓa buy miɓa ɓi naŋ, ti zana gagaza ngi muguzlum ɓaˀ a vuvu na, taŋ hoc hilaka kil.

⁶⁵Buy a vulaŋ ɗongor ti gidaŋ, a ɓa mizli ɓa a tohoko slimiɗ naŋ a wuzla ngama ngi buy, ngi mbuŋhoy. Yo a cifaŋ i madiɗa ngi sojehey, i miwi li ma.

⁶⁶Zonataŋ a mo nga Zeruzaleme ti zuy waɗ ti mumul.

⁶⁷Ar vi miskat ti kukur merkeɗ ti zlum naŋ na, Demetriyus, mangal ngi Demetriyus Mucuw naŋ a mo tir ruwuy Krete ng’asi ruwuy ngi dideˀ naŋhay.

⁶⁸Buy Alekzaŋdir micina ɓi naŋ na, didak a muɗaŋ, a mi nga Antiyos amuŋ.

⁶⁹Demetriyus a cifa Apoloniyuso, i miwi Siri madiɗa. Apoloniyus a kus sojehey haɗa, a ra cifam gweˀ a Zamniya. Waɗ a sli ɓa a ra ɓaka Zonataŋ na:

⁷⁰«Maslikiɗ ngi gi vurum ati ndra sey i ka pal ɗiki, ani wurenna, mizli a ra zikiy, yo a ra pikiy mesem asi ka. Ka mazuɓa himaˀ ɗik ngi buy ng’ar ndra na, vur mike?

⁷¹Da ki vula mevel ɗike le taˀ ar migi vurum ɗikeye na, po sar ng’ar li micay hana, ɓa i waka gidaŋ ndrahaya, asi mike na, mizli musoko tir walahay madiɗahay ada avi ya.

⁷²Cina ɓi ɗu, sina sin le da yi waka na. Yo mizli majinam is asi ndra na, sina taŋ sin le ma. A ɓam na, kum anta sa cicam deŋ le a mbuŋ ndra gu ta, asi mike na, a ɓulaka dideˀ kumoyo le is cuw tir ruwuy taŋ si.

⁷³Wurenna, ar li micay hana, mukuro piliseye, k’anta sa ɓula taŋ gu ta, yo sojehey misikinih hanayna, k’anta sa ɓula taŋ gu ta ma. Ani li ɗum anta, ɗugur anta, yo li kil anta ma.»

⁷⁴Ti Zonataŋ micina ɓi hana na, didak a muɗaŋ haɗa. A wuni mizli durmuk kuruˀ, joˀ a pulaka Zeruzaleme. Sukum naŋ Simoŋ a ra lumaŋ ti mizli njiraˀ aseˀe ɓa a sa jinaŋ.

⁷⁵A paka walahay guɗuk taŋ hiri dac da Zafa. Mizli ngi Zafahay a gicaka miviŋheye kap kap, asi mike na, Apoloniyus a pi mizli naŋhay le sek akẽh. A zlaka kiɗa vu so.

⁷⁶Mizli ngi Zafahay tuwa Zluwun a ga taŋ, a wunaka miviŋheye, dar Zonataŋ a tuɓa walahaya da naŋ.

⁷⁷Apoloniyus micina na, a hilo mukukuro pilisey durmuk makir, waɗ misi saray haɗa aseˀe. A soko kini ti Asdot kaɓa a wuɗam a cohom tiŋkeh, dambalaka na, a ra cam ng’ara li micay vuna ma, asi mukuro pilis naŋhay mihaɗa tuwa.

⁷⁸Zonataŋ a sipaŋ kinih ti Asdot, dar sojehey a zlaka kiɗa vu so.

⁷⁹Apoloniyus a pul mukukuro pilisey le zle sek tidirba Israyeleye manja a sinakaŋ.

⁸⁰Gurjik sina, Zonataŋ a pura mesene naŋhay ada dirba ma, yo a ra gunoko migi vurum naŋhaya. A zlaka mula luvut ng’ar Israyeleye, zle ngi miprik hã pastaˀ.

⁸¹Soje ngi Zonataŋhay a mburom vu le mbor kaɓa naŋ miɓa taŋ vuna, amma pilisey a giram le.

⁸²Ti mukuro pilisey mitikaka gidaŋ taŋ le na, Simoŋ a so ti mizli naŋhay tuwa, a kiɗam vu ati misi saraya ma. Simoŋ a kiɗa taŋ hã a kilam.

⁸³Mukuro pilisey a waham mber mber ar li micaya. Mizli makilamay tuwa a ndilam a Asdoto, a ra ɗumom a hay ngi kuli taŋ Dagoŋ.

⁸⁴Zonataŋ a ɗuva vu da walahay Asdot ati ruwuy ngi ciki naŋhaya. Hay ngi kuli Dagoŋ a wur kuɗup ati mizli muɗum ara tuwa.

⁸⁵Jom gar na, mucam ti maslalam waɗ tivi mizli durmuk dangafaɗa.

⁸⁶Zonataŋ a cuh ti ŋkeh, a ra pi a Askaloŋ. Mizli ngi digahay a boko, a tuɓakaŋ hoyo hoyo.

⁸⁷Zonotaŋ ati mizli naŋhay a moko nga Zeruzaleme, ti gwat mihilahay haɗa.

⁸⁸Buy Alekzaŋdir micina na, a ga ndongor da Zonataŋ ti gidaŋ ava ma.

⁸⁹A slinaŋ ti lek ngi ɓiri hirnga, kaɓa mavulaka da miyi ngi hay buyoy na. A vulaŋ walahay Akroŋ da naŋ, jom ti walahay ngi cikeˀeheye.