Read South Giziga 1 Mak 11 Bible Online

1 Mak 11 - South Giziga bible

1 Mak 11

¹Ptoleme, buy Ezipte a kus palalamay haɗa waɗ sojehey haɗi kaɓa muyuŋ ngi mi mizaw. A wuɗ a gi wer ngi tuɓa li Alekzaŋdir mazum buy ara, yo ɓa a jumo da li mazum buy nga naŋ.

²A ru ti ɓi ngi leleŋ ng’asi ruwuy Siri. Mizli ngi digahay a wunaka miviŋ ngi walahay taŋhaya, joˀ a soko jam di hirnga, asi mike na, buy Alekzaŋdir a ɓa taŋ le ɓa a sa tuɓaka jomo naŋ.

³Amma na, Ptoleme, walahay naŋ mucuh le tira gar na, a pul mijiɗa lihey sek le.

⁴Ti naŋ mawuɗ a ndila walahay Asdot na, a bugakaŋ hay ngi kuli Dagoŋ muwura tuwa, diŋ ngi hirwuy Asdot ati li ngi ciki naŋhaya. Waɗ mana, a bugakaŋ vagay ngi mizli mizliɗaka taŋ ɓaˀ li ati is ngi vagay ngi mizli Zonataŋ muzluma taŋ ar li kiɗa vu tuwa ma, asi mike na, a kusoko kusoko taŋ kos kos ar li buy masa cuh tira.

⁵A sokaŋ ti ɓi ngi gwat Zonataŋ miga taŋ na, ɓa a slikiɗaŋ mevel, amma naŋ a cifi teˀ teˀe.

⁶Zonataŋ a sa tuɓa Zosfa a ti zuguw hiɗim hiɗim. A jam ar wala taŋ, joˀ a hinam ar li naŋ.

⁷Zonataŋ a ki sa buyo hã seŋseŋ a mi mizaw Eleter, dar naŋ a mo nga Zeruzalem amuŋ.

⁸Buy Ptoleme sona, a cifi miwi walahay nana waɗ mugun hirnga naŋhay gar, seŋseŋ a Selewsi-ngi-miyam. Yo aɗiyi ɓi ng’ar Alekzaŋdir ava ma.

⁹A slino mizli naŋhay ng’avu buy Demetriyuso, ɓa a ra ɓakaŋ na: «Sawa i jumom ˀay arleˀe. Zuŋ ɗu Kleyopatir, ngwas ngi Alekzaŋdir na, i sa vuluw di daka, yo li cine ɗik muzuma na, ki wa ma.

¹⁰Ya muvula zuŋ ɗu da mbur nah na, ko a giy kuy ta, asi a wuɗ ɓa a kiɗiy zleˀe.»

¹¹Ptoleme maɓaŋ ɓi tayna ar Alekzaŋdir na, asi a ra wuɗ a wa li nah vuna ya.

¹²A tuɓa zuŋ naŋ, dar a vula da Demetriyus. A pulaka ngama ati Alekzaŋdir, yo a tiram mesenehey njah wãˀ.

¹³Ptoleme a ci nga Antiyos, yo a cifi buy ngi ruwuy Siri-Madiɗa. Loppol a hirnga tuwaɗ tuwaɗ cuw: ngi ruwuy Ezipte waɗ ngi Siri-Madiɗa ma.

¹⁴Ti hin nah, buy Alekzaŋdir naŋ a silisi, asi mizli ngi digahay a slam himaˀ le.

¹⁵Naŋ micina ɓi ngi gwat Ptoleme miga taŋ na, a sipa nder nder ngi kiɗi. Amma Ptoleme a ra ji di hirnga ti sojehey hiɗim hiɗim, dar a ɓulaka taŋ.

¹⁶Alekzaŋdir a kil nga ɗum a Arabi, yo buy Ptoleme a luma bugawla so.

¹⁷Mbur Arap ada, a zilaka Zaɓdiyel, a bukoŋ ˀaya taŋ, a slin ti hirnga da Ptoleme.

¹⁸Buy Ptoleme a muc, li muwun ngi makir naŋ ya. Dar mijiɗa li naŋhay, misi ar li muguno ti moholoy tuwa, mizli ngi digahay a ngizlaka taŋ kuɗup.

¹⁹Ar vi miskat ti kukur merkeɗ nga tarnaˀa, Demetriyus a tiri buy so.

²⁰Ti hin nah vuna, Zonataŋ a kuso mizli Zudeheye ɓa a ra zlaka walahay Zeruzalem muguno ti moholo. A ɗiyam masin ngi vurumoy haɗi ng’ar naŋ.

²¹Zudehey cah, matuɓaka ɓimujuwa ta, yo mahirsaka sukwi taŋ, a ra faka ɓi nah da buy Demetriyuso. A ɓakaŋ, Zeruzalem, walahay muguno ti moholo, Zonataŋ a ra tuɓaŋ.

²²Mingiɓi hana a ja mevel da Demetriyuso. A ru nga ruwuy Ptolemayise. A toho letir da Zonataŋ, a ɓaŋ ɓa a pula ɓi ngi tiɓi walahaya, a sa lumaŋ kutum a Ptolemayisi.

²³Zonataŋ muluma mingiɓi nah lum na, a ɓa mizli ɓa a tuɓaka walahaya cici. A wini mizli micawwahay cah ati masayay cah ma, a vula vu naŋ taˀ ngi zuɓa mulak nah vuna ti haŋ naŋ.

²⁴A wuɗ ɓiri bara, ɓiri tapasl tapasl, waɗ gwat ngatarahay wal wal a haŋ haɗa, a ra zliram ati buy a Ptolemayise. Buy Demetriyus a tuɓaŋ le kuy kuy.

²⁵Mizli Israyel, misi moˀore mekelemey a kupaka ɓi da Zonataŋ,

²⁶amma buy a gi ti naŋ kaɓa mizli mudumbuŋhoy migam di na ya. Dar a ɗuvaŋ hirnga a wuzla ngama naŋhay gar.

²⁷A cifaŋ i mbur madiɗa, masay, jom ng’avi buy ɓi naŋ misi zleˀehey ma. Yo a cifaŋ a wuzla ngama ngi buyoy.

²⁸Zonataŋ a cufuɗa buyo ɓa mizli Zudehey ati distrik ngi Samarihey mimakirey na, a wurkam buutu ta, ɓa naŋ kwana, a sa vulaŋ ɓiri bara kilo durmuk dangafaɗ ti skata.

²⁹Buy a tuɓa ɓi naŋ le. Ɓa ngi buga ɓi nah njah da Zonataŋ na, a tohoŋ ɗerewol ani:

³⁰«Buy Demetriyus a ra ja haŋ da sukum naŋ Zonataŋ ati sukwi Zude gar.

³¹I tohom letir le zle vur kum da muy ndra Lasten. Ani i slunukum ti mingiɓi ngi raˀa ɓa ki cinaka.

³²‹Buy Demetriyus a ra ja haŋ da muy naŋ Lastin.

³³Sukwi Zude miji ngam ti ya na, i ra wurka taŋ. Zudehey i ngama ndrahay, yo a ra gaka gwat taŋhayakasl kasl vur ndra.

³⁴I ɓa taŋ di njah wãˀ, hirwuy Zude waɗ distrik ngi Samari mimakirey: Alferema, Lidda ati Ramatayim na, i taŋ masa waka taŋ. Distrik tayna, a tuɓaka taŋ avi Samari jom ti li mugun hirnga taŋhaya, da Ruwuy Zude, ɓa ngi jina mizli gar, mara gam mikuli a Zeruzalem na. Zle wurenna, buutu mavulaka da buy, yo dala mawurkaka vur ruwuy waɗ vur yi ngi widisey, ar vi gar na, t’anta sa wurkam mata.

³⁵Gwat mekelemey taŋ mawurkikiy di zleˀe, kaɓa ani: mukuruˀ ngi zlilihey, gwat ngi wuruk ho gar, gwat ngi wuruk vur mandaŋ waɗ buutu ngi vul da ya buy na, i pula taŋ ɓi naŋ le avra.

³⁶Ɓi micica Hanayna, ko pal masa muɗaka avra anta. A sa zlaka zle dana hã ngi sete.

³⁷Anja ki tohoko mingiɓi hana toh toh bac pal, ɓa ki vulaka Zonataŋ ya. Naŋ kwana, a cuɓa caɓ a hirnga muwã mipal , ɓa mizli gar a puraka.

³⁸Buy Demetriyus a pura naŋ mawa ruwuy na, ruwuy a ro ar leleŋ, yo ko ruwuy pal mazlaŋ anta. A ɓula mizli ati sojeheye, ɓa mbur gar a ru ng’asi ruwuy naŋ. Sey a pul sojo ngi ruwuy mulak, naŋ mizuɓo taŋ ar matura Grekey. Naŋ migakanah tuwa na, mizli migam slra asi buy mudumbuŋhoyo, joˀ a hirsakaŋ.

³⁹Trifoŋ, mbur migi slra asi mizli ngi Alekzaŋdir a pura na, sojehey gar a ra zaka Demetriyuso. Mbur Arap ada, a zilaka Iyamlikoso, i naŋ magila Antiyokus, mangal ngi Alekzaŋdir. Trifoŋ a ru nga hay naŋ.

⁴⁰A cufuɗaŋ ɓa a pula mangala kutum kutum, a ra zum buy ar li ngi cine. Yo a faŋ ɓi ngi Demetriyus miɓa ati ɓi ngi mizli mahirsakaŋ na ma. A cifi akẽh hin mbeˀ mbeˀ.

⁴¹Zonataŋ a slin ng’avi buy Demetriyuso, ɓa a bo ti mijiɗa li naŋhaya tir li ɗum ngi Zeruzalem ati walahay mekelemey muguno ti moholoyo, asi a roko ti ɓi ngi vurum ati Israyeleye aruŋ.

⁴²Demetriyus a mbuɗaŋ di: «Ya masa ga gwat hana vur ka ati sukwi ngi mizli ɗikey pal ta, amma, da hin naŋ mindilo le sina, i sa gukum ɗongor ati sukwi ɗike gar.

⁴³Wurenna na, ka sliniy ti mizli ngi kiɗa vu asi ya, asi mizli ɗuwoy gar a slam himaˀ le avi ya.»

⁴⁴Zonataŋ a slinaŋ ti migi vurum miwirwirey, mizli durmuk makir nga Antiyos. Taŋ mindilam na, a cira hiri le haɗa da buy Demetriyuso.

⁴⁵Mizli durmuk skat ti kukur cuw a kusom le zleˀe a hur walahay Antiyokuso, a wuɗam ɓa a kiɗaka buyo vagay.

⁴⁶Mizli a tuɓaka jiviɗeye le, yo a ra wuɗam a zlaka Demetriyuso ngi kiɗe na, naŋ a ra ɗum ɗum ar mugum naŋ.

⁴⁷Buy a zilo Zudehey ɓa a sa jinakaŋ, dar a kiloko widi naŋ gar. Dar a wahay ar walahaya zlar gar. A kiɗam le ti hin nana, a gi gwat ngi mizli durmuk skat gu.

⁴⁸Ti hin nana, a hilam gwatay le haɗa, yo a wuraka walahaya le ma. Dar buy a lihi.

⁴⁹Mizli a puraka na, Zudehey a ra gam ti walahayaka taŋ mawuɗam. Vagas a ga taŋ ar ɓi taŋ muɗuvaka ngi gi tuwa, joˀ a wudam ng’avu buyo, a tumbulokoŋ.

⁵⁰A ɓakaŋ: «I nga pula ndra ar leleŋ takwa! Yo anja ki ɓa Zudehey na, ɓa a pulaka gi vurum ti ndra ati walahay ndra.»

⁵¹A zliɗaka gwat ngi vurum taŋhaya, joˀ a ngiɓam ˀay ati buyo. Buy ati mizli gar, ngir li naŋ mazum buy ara, a gaka dudok da Zudeheye haɗa. Zudehey a mam nga Zeruzaleme, ti zlili mbaf mbafa.

⁵²Demetriyus a cifi ar buyo amuŋ, dar ruwuy a cifi zuy zuy.

⁵³Amma Demetriyus anta gi gwat naŋ miɓa taŋ tuwa ko loŋ ta, hã a tiri mesene ngi Zonataŋ. Ɓa ngi wurka taŋ vur gwat taŋ migakaŋ di jak na, a ga taŋ bonoy.

⁵⁴Hin neˀ a dirba naŋ na, Trifoŋ a moko ati Antiyokuso. Antiyokus a cifi buy, yo a tuwuɗakaŋ loppol ti naŋ mimeciɗek vuna si.

⁵⁵Mizli, Demetriyus muɓula taŋ tuwa, a jumoko ng’avi Trifoŋ, a kiɗaka Demetriyuso, joˀ Demetriyus a kil.

⁵⁶Trifoŋ a hila begeneheye, waɗ a tuɓa Antiyokuso.

⁵⁷Gawla Antiyokus a toho letir da Zonataŋ a ɓaŋ: «I cufuw le njah, ki masay madiɗa. I cufuw le a hirnga distrikey mufaɗa. Yo ka wurenna a wuzla ngama ɗuwoy.»

⁵⁸A slinaŋ ti gazlanga ngi ɓiri tapasl tapaslay ati taasa nga ɗafay. A pulaŋ jiviɗ ɓa a sa gwata ar sikiɗ ngi ɓiri tapasl tapaslay, a ki zana gagaza ngi muguzlum, waɗ a ji mejegeɗ mipa ti ɓiri hirnga.

⁵⁹A cifa sukum naŋ Simoŋ, i miwi soje ngir wala muwã Siri mazilaka Sosol ngi Tir na, hã seŋseŋ ar maakway ngi Ezipte.

⁶⁰Zonataŋ a ru, a ra bula Siri Madiɗa vur walahay vur walahay. Mizli Sirihey gar a jumom ɓa a kiɗam vu tisi naŋ. A ru nga Askaloŋ, mizli ngi digahay a tuɓakaŋ hoyo hoyo ma.

⁶¹A bi ti diga nga Gaza, amma mizli Gazahay a gicaka miviŋ ngi walahaya. A tuɓa walahaya Gaza, a hila gwat ngi raˀahaya, dar a wura walahay mugun hirnga naŋhaya.

⁶²Mizli Gazahay a tumbuloko Zonataŋ, a ɓakaŋ. Joˀ Zonataŋ a pula taŋ ar leleŋ. Amma a zuɓa mangal ngi buy taŋ, a ru di nga Zeruzalem. A dirba naŋ, a bula li seŋseŋ a Damas.

⁶³Zonataŋ a cina na, madiɗa ngi soje ngi Demetriyusoy a roko a Kades ngi Galile, sojehey ada haɗa avi taŋ. A wuɗam ɓa a pam di sar tir buyo.

⁶⁴A ru nga zlir ti taŋ. A pula sukum naŋ Simoŋ a ruwuy Zude.

⁶⁵Simoŋ a ra tuɓo walahay Bet-Suro da naŋ, a kiɗam vu hin mbeˀ mbeˀ, hã a guco mizli ngi digahayakapa.

⁶⁶Mizli a cufuɗakaŋ ɓa a pula taŋ ar leleŋ, dar a pula taŋ. Amma a tika taŋ ˀay ɓa a bam tir walahay avra. A tuɓa, yo a pi mijiɗa lihey seke.

⁶⁷Zonataŋ ati migi vurum naŋhaya, a pam a ciki mubuliy Zenezaret. Ngi miprik prike, a ndilam a li mikcay ngi Asor.

⁶⁸Keɗ na, migi vurum ngi ruwuy mulakay a ra soko ng’ar taŋ ar li micaya. Amma a soje mekelemey a roko ɗum ɗum tir muwã ɓa ngi sa ja Zonataŋ ar mazaɓa.

⁶⁹Mizli muɗum ɗumoy tuwa a boko tir li ɗum taŋhaya dar kiɗa vu a zli.

⁷⁰Soje ngi Zonataŋhay a kilam cek, ko pal mindir anta. Sey madiɗa ngi soje naŋhay cuw mindiram: i ti Matatiyas, mangal ngi Absalom ati Zudas, mangal ngi Salfi.

⁷¹Zonataŋ a ngira zana naŋhaya, a pi mereɓ nga hirnga, joˀ a dir dibiɗi.

⁷²A dirba naŋ a mi nga kiɗa vu, a kiɗa mesene naŋhaya, dar a kilam.

⁷³Mizli naŋhay mikilam tuwa mupuraka Zonataŋ mulum bugawla na, a jumoko ng’avaŋ, a sipaka mesene naŋhaya bummo, hã seŋseŋ a Kades. Waɗ a paka walahay guɗuk taŋ adiga ya.

⁷⁴Ti hin nana, mesene ngi zonataŋhay a mucam le a gi gwat ngi mizli durmuk makir gu. Joˀ Zonataŋ a mo nga Zeruzalem amuŋ.