Read South Giziga 1 Mak 12 Bible Online

1 Mak 12 - South Giziga bible

1 Mak 12

¹Zonataŋ a poura na, li naŋ kuy avu naŋ. A wini mizli, a slina taŋ nga Roma ɓa, ɓi ngi ji ngama taŋ ati Romahaya, a maka hiri naŋ, a ɓaka njah amuŋ.

²A tuh letir ngi ɓi ɓi mupurla da Sparte ati walahay mekelemeye ma.

³A ndilam a Roma, a ram ng’avi mingila wuy ngi digahaya, joˀ a ɓaka taŋ: «Zonataŋ, masay madiɗa ati sukwi ngi mizli Zudehey a slinoko ndra ani. A wuɗam ɓa ɓi ngi ji ngama kum ati taŋ, yo ɓi ngi jumoˀay kum ati taŋ na, i maka hiri naŋ kaɓa misi zleˀe amuŋ.»

⁴Mizli mingila wuyoy a vulaka taŋ letir da buy ngi si ruwuy taŋ masa cohom tir taŋ gar, ɓa a pulaka taŋ ram ti zuy hã taŋ masa moko ng’asi ruwuy Zuda amuŋ.

⁵Letir, Zonataŋ mutoho da mizli Spartehey vuna, mingiɓi ngi raˀa n’ani:

⁶«Zonataŋ, masay madiɗa, ati mingila wuy ngi sukwihey, masay mekelemey, waɗ mizli Zudehey a ra jaka haŋ da sukum taŋ Sparteheye.

⁷Ti zlezle na, buy kum Areyos a toho letir le da Oniyas, mbur ndra masay madiɗa. A ɓaŋ kumo ki sukum ndrahay. Mingiɓi ngir letir nah a ɓa le njah.

⁸Oniyas a tuɓa mijiviɗ kumo le kuy kuy. Waɗ a tuɓa letir tuwa, slaf slaf na, i ɓi ngi jumo ˀay ati ɓi ngi ji ngama.

⁹Ndra, ɗerewol ngi ɓimujuwa misi avi ndra na, ada tislam ndra mevele. Ko ndr’anta wuɗam ɓi ngi jumoˀay tayna ta.

¹⁰Amma na, i slinam mbur le ɓa ɓi ngi jumoˀay ndra ati kum, waɗ ɓi ngi ji ngama ndra ati kum na, a ra ma hiri taŋ amuŋ. Asi mike na, zle ti kum mislinoko ndra mbur na, vihey a cohom le haɗa.

¹¹Avi ndra na, ar gwat ngi gi ndrahay gar, ar muguzlum ati hin ngi musko vuhoy, ar li gi mikuli ati diradibiɗ ndrahay gar na, ko ndr’anta puyukom ti kum ta. Naŋ kine, ɓa mbur a wuluk keŋ ar sukum naŋhay na, zlir le, yo naŋ kuy ma.

¹²Hirwuy kum mazil slimiɗ na, ndr’i ra mumulom.

¹³Amma ndra vurum ati ɓihey wal wal a wusam ndra le ginjir ginjir, asi mike buy miwi ruwuy mugun hirnga ndrahay a kiɗam ndra le ma.

¹⁴Ɓi ngi vurum hanayna, kum ati mizli ngi si ndrahay waɗ ngama ndra mekelemey na, i wuɗam i gurukum vurˀe zle ta.

¹⁵Ndra i njaham hiri asi Buymisemuŋ masa jiniˀis asi ndra. I naŋ misa laha ndra avi mesene ndrahaya, yo taŋ a sa ŋhiŋhiyam le.

¹⁶Wurenna, i wunaˀam Numeniyus, mangal ngi Antiyokus ati Antipater, mangal ngi Jasoŋ. I slinaka taŋ ng’Avi Romahay ɓa ɓi ngi ji ngama ndra waɗ ɓi ngi jumoˀay ndra ati taŋ na, a ra maka hiri naŋ.

¹⁷I ɓaka taŋ le ɓa a ram ng’avu kum aya, a ra jukum haŋ, yo letir ndra misi mingiɓi ngi mihiri ngi ji ngama, ngi jumoˀay waɗ ngi jum ndra sukumuhoy ati kum na, a vulukum di.

¹⁸Anja ki mbuɗam ndra ar ɓi nah so.»

¹⁹Letir mislinam di zle da Oniyas tuwa, mingiɓi ngi raˀa n’ani:

²⁰«Areyos, buy Sparte a ra ja haŋ da Oniyas, masay madiɗa.

²¹I lumam ɗerewol ada na, mingiɓi ngi raˀa a tohoko ar Spartehey ati Zudehey. Keɗ keɗ na, taŋ i sukumuhoy, yo i dideˀ ngi Abrahamay.

²²Wurenna, ndra misinaka ɓi naŋ na, da ki tohom ndra ɓi ngi degezer kumo le toh toh na kuy.

²³Ndra ti ka, i tuhukum ɓi ani: ginew ati zlili ndrahaya, gam taŋ kaɓa i ngi kumoy, yo ngi kumoyo kwana ndr’i sa gam taŋ kaɓa i ngi ndrahay aya. Ndra mawuɗam anja ɓi ndra mawulukaka na, mijiviɗ ndrahay a ɓukum di daˀ le na vurˀe.»

²⁴Zonataŋ a pura na, madiɗa ngi soje ngi Demetriyusoy a moko le nga kiɗa vu ati naŋ. Sojehey ada haɗa fineˀ misi zleˀe.

²⁵A bi ti Zeruzaleme, ɓa a ra zlir ti taŋ kini tir ruwuy Hamata. Asi mike na, a wuɗ a pula taŋ a cam ng’asi ruwuy naŋ ta.

²⁶A slin mijiɗa lihey ng’ar walahay guɗuk taŋ. Mijiɗa lihey a moko, a ɓakaŋ mesenehey a ra wam vu ɓa a sa ndiloko ɓuyoh ng’ar kum ti duvuɗu.

²⁷Pas midiɗ na, Zonataŋ a ɓa soje naŋhaya ɓa a hinjam ti duvuɗo ta wãˀ, yo a jaka gwat ngi vurum taŋhaya avi haŋ avi haŋ, weˀ vu ngi kiɗa vu. A pi mijigina lihey gun walahay guɗuko ma.

²⁸Mesene ngi Zonataŋhay mupuraka soje naŋhay a roko weˀ vu na, zluwun a ga taŋ. Didak mumuɗa taŋ na, a bulam vuhoy ar walahay guɗuko, dar a kilam.

²⁹Amma Zonataŋ ati mizli naŋhay a sa sinaka a kilam le na, seŋ ngi mi priki. Asi mike vuhoy a ra tuɓam duvuɗo kap wãˀ.

³⁰Zonataŋ a bi nga sipi taŋ, ko a luma taŋ ta, asi a tuwuɗaka mizaw Eletere le.

³¹Dar Zonataŋ, ngi kiɗa vu, a zli mizli Zabadihey, muy ngi Arapay. A kiɗa taŋ dar a hila gwat taŋhaya.

³²Naŋ mubo tiŋkeh na, a ru nga Damas, joˀ a guno li vay nana gar.

³³Simoŋ kwana, a bi ya, a ru seŋseŋ a Askaloŋ ati walahay mekelem muguno ti moholoy misi a ciki naŋhaya. A dirba naŋ, a ru kini nga Zafa dar a tuɓa.

³⁴Walahay muguno ti moholo, mizli ngi digahay a wuɗam a vulaka da mizli ngi Demetriyusoy na, Simoŋ a sina le. A pi mizli sek ngi jigin nah.

³⁵Zonataŋ a mo nga Zeruzalem amuŋ. A kuso mizli micawwahaya, dar a ɗuvaka a kwacay taŋ ɓa a ndiram walahayay asi ruwuy Zude waɗ a gunoko taŋ ti moholoy,

³⁶a slikiɗaka mohol ngi Zeruzaleme, a slikiɗaka mohol madiɗa mugwaha li ɗum a ti walahaya ɓa li ɗum a ndir yaŋ pal naŋ. Kanah na, naɓa mizli ngi Demetriyusoy anta sa hiɗikam gwat da taŋ ta, a hiɗikam avra ta.

³⁷A kusom gar taŋ ɓa a slikiɗaka moholo ngi Zeruzaleme so, asi misi kini tisi pas ngi miprike a mbizli le. A ndiraka mohol ngi slala mazilaka Kafenata ma.

³⁸Simoŋ a ndira walahay Adida, asi Ruwuy Muzugudum. A guno ti mohol waɗ a caŋ miviŋ misi faɓuruhoy.

³⁹Trifoŋ a wuɗ sey a cifi buy ngi ruwuy Siri Madiɗa, ɓa a juwakanda ngi buyo, waɗ ɓa a kiɗa buy Antiyokuso.

⁴⁰Amma a ra zluwun Zonataŋ masa pulaŋ vu ta, yo a sa kiɗaŋ. Joˀ a sipi jiviɗ ɓa a jaŋ, a kiɗa vagay. A cuh nga Bet-Saŋ.

⁴¹Zonataŋ a sipaŋ ti mizli misinaka kiɗa vi lehey durmuk mufaɗ, a ra ndil a Bet-Seyaŋ.

⁴²Trifoŋ mupura Zonataŋ a ndil ti mizli haɗi aseˀe na, ko a ngum zuɓa haŋ ng’ar naŋ mata.

⁴³A tuɓa girdeˀ girdeˀ kuy kuy, a buga da ngama naŋhay gar. A vulaŋ gwat ngatarahay, waɗ a ɓa ngama naŋhay, mizli naŋhay ati soje naŋhaya ɓa a cinaka mi da Zonataŋ kaɓa taŋ macinakaŋ di da naŋ na ya.

⁴⁴A ɓa Zonataŋ: «Ko vurum anta ar wala ndra ta, na ki vula gir da mizli hanayna gar vur mike?

⁴⁵Pula taŋ a mam nga hay taŋhay. Anja ki so ɓa i ram nga Ptolemayis takwa, wini mizli cah ɓa a kisukuw. Walahay nana ati muguno ti mohol mekelemeye, i sa vuluw taŋ daka, jom ti mizli ati migi slra ngi raˀahaya gar. A dirba naŋ, i sa mawa amuŋ, asi ya muso ng’aka vuna vurˀe.»

⁴⁶Zonataŋ a pula vu mbak vurˀe, a gakaɓa naŋ miɓaŋ di vuna. A pula soje naŋhay a mam nga ruwuy Zuda amuŋ.

⁴⁷A pul mizli durmuk makir aseˀe, a pula mizli durmuk cuw a cam nga Galile, mizli durmuk pal mekelemey, a ki saŋ.

⁴⁸Amma ti Zonataŋ mici nga Ptolemayis na, mizli ngi digahay a gicaka miviŋheye, a jakaŋ, a kiɗaka mizli micam aseˀeheye vagay vagay ti maslalam.

⁴⁹Waɗ mana, Trifoŋ a slin ti mizli ati mukuro pilisey nga Galile waɗ ng’ar li Madiɗa Micaya ɓa a kiɗaka mizli ngi Zonataŋhaya ceke.

⁵⁰Masay madiɗa a jaka le, yo a kiɗaka le jom ati mizli naŋhaya na, mizli a cinaka ɓi naŋ so. Mbur gar a vul gidaŋ da cala, joˀ a ram jobolo ngesl ngesl, weˀ vu le ngi kiɗa vu.

⁵¹Mizli masipaka taŋ a mupuraka a sa kiɗam vu hã vagayay ɓaˀ ɓaˀ na, a mam amuŋ.

⁵²A ndilam leleŋ leleŋ asi ruwuy Zude, a tuwaka wagay ngi Zonataŋ ati mizli naŋhaya, dar zluwun a ga taŋ. Ruwuy Israyel gar a gi vagay madiɗa.

⁵³Sukwi ngi mizli mugun hirnga taŋ a sipam jiviɗ ɓa a ngizlaka taŋ. A ɓam: «Zudeheye, buy taŋ anta mata, ko mbur mijiniˀis asi taŋ anta. Zukum taŋ wurenna ngi kiɗa vu, kanah na, ko mbur masa wuluk keŋ ar taŋ anta mata.»