Read South Giziga 1 Mak 13 Bible Online

1 Mak 13 - South Giziga bible

1 Mak 13

¹Simoŋ a cina na, Trifoŋ a kus sojehey le haɗa ɓa a ram nga ngizla ruwuy Zuda.

²Naŋ mupura mizli a ra zluwunam na, a ru nga Zeruzalem, a kuso mizli Zudeheye.

³A ɓa taŋ na: «Ya ati sukum ɗuwoy waɗ mizli ngi hay cine ɗuwoyo, gwat ndra migaka vur ɓimuɗuva ati hay ngi Buymisemuŋ na, ki sinaka le. Yo vurum ati bonoy ndra misaka na, ki sinaka le ma.

⁴Sukum ɗuwoy mumucam gar na, ngi laha Israyel na, vurˀe. Ani wurenna yi ndir le pal ɗu.

⁵Ko da bonoy a so ka wanaka na, y’anta ɓi ɓi ngi laha hutuŋ ɗu mata. Ya puɗaw fineˀ sukum ɗuwoy vuna wal kwa?

⁶Amma sona, i sa pula cuwal ngi sukwi ɗuwoyo, ngi hay ngi Buymisemuŋ ati ngi ngwas kumoy waɗ ngi ziri kumoyo. Asi mike na, sukwi ngi mizli gar a jumom le ɓa a ngizlam ndra.»

⁷Mizli micinaka mi ngi Simoŋ na, a mburoko vu mbor,

⁸yo a mbiɗakaŋ di ˀay paɗ a muŋ: «Ki buy ndra ar li ngi Zudas waɗ ar li ngi sukum ɗik, Zonataŋ.

⁹Ki sa ndra ng’ar vurumo, yo gwat ka masa ɓa ndra di gar na, i sa gakaŋ.»

¹⁰A kuso sojeheyo cek, yo a wus vu ngi ndira mohol ngi Zeruzalemeye, a guno gun gun ti mohol.

¹¹A slina Zonataŋ, mangal ngi Absalomo nga Zope. Mizli haɗi maki sa kaŋ. Zonataŋ a ɓula mizli ngi digahaya, a cifi wãˀ adiga.

¹²Trifoŋ a pula Ptolemayise ti sojehey hiɗim hiɗim aseˀe ɓa a ru nga ruwuy Zuda. A ru ti Zonataŋ, naŋ mija tuwa a haŋ.

¹³Simoŋ a ra pa walahay guɗuk naŋ a Adida, hiri dac da li micay.

¹⁴Trifoŋ a cina na, Simoŋ a ra zuma li ngi Zonataŋ, sukum naŋ, yo a ra juwo vu ɓa ngi sa gi vurum ati naŋ. A slin mizli ɓa a ra ɓakaŋ ɓi ani:

¹⁵«Ti sukum ɗik magi slra zle na, anja a slin ti dala ng’ar zlili ngi buyo. Naŋ mungum ta na, i jaka aseˀe.

¹⁶Wurenna, ka slino ti ɓiri bara kilo durmuk cuw ti kilo skat skat tarnaˀ waɗ ki jo ziri naŋhay cuw. Asinta, da i pulaka le na, a sa sli himaˀ kwani.»

¹⁷Mingiɓi hana i ngi gaŋ gilaw na, Simoŋ a sina le. Amma a slin ti slin a ra wuɗakaŋ ɓiri bara ati ziri tuwa. Naŋ vuna, a ra zluwun ti mizli masa mbuɗam hirnga ng’ar naŋ,

¹⁸a sa ɓam: «Zonataŋ mumuc na, asi mike ɓiri bara ati ziri naŋhay na, Simoŋ a slinaŋ taŋ da Trifoŋ ta.

¹⁹A slin ti ziri ati ɓiri bara so, amma Trifoŋ a tikinaŋ, a pula Zonataŋ ta.

²⁰A dirba naŋ, Trifoŋ a cuh nga ndaha hirwuyo, yo ɓa a ngizlakaŋ. A cuh bal ti jiviɗ ngi walahay Adora, amma ar jiviɗ naŋ muwuɗ cuh le ti nga gar na, Simoŋ ati migi vurum naŋhay a tikakaŋ.

²¹Waɗ mana, mizli mutuɓaka walahay muguno ti mohol tuwa, a slinam ng’avi Trifoŋ, a wuɗam ɓa a ra luma taŋ kutum kutum tir li mikirɗak kirɗaka, yo ɓa a slina taŋ ti gwat ngi zumoy ma.

²²Trifoŋ a ɗiyi vu ti mukuro pilis naŋhaya cek, amma ngi duvuɗ naŋ, kutuɓ a gi, ko a cuh gu mata. A cuh kinih tir vay ruwuy Galaˀata.

²³Naŋ mindil a Baskama na, a kiɗa Zonataŋ, dar a dikaka adiga.

²⁴Trifoŋ a mo ng’asi ruwuy naŋ amuŋ.

²⁵Simoŋ a slin mizli ɓa a ra zuɓakaŋ vagay ngi sukum naŋ Zonataŋ, dar a sa dika a Modiŋ, walahay ngi dideˀ naŋhay.

²⁶Israyeley gar a tuwakaŋ hin mbeˀ mbeˀ, waɗ a gam madiɗa.

²⁷Simoŋ a ndira zivi ngi sukum naŋhay ati ngi cine naŋ ng’amuŋ, ɓa a pur zar kileŋ. Zivi nah, ti mbuŋ ti dirba gar i mindira ti mbiri mingirzla.

²⁸A ndir li ngi dika mizli tarnaˀ, a ciki cala, a ciki cala, da cine, da mumuŋ, waɗ da sukum naŋhay mufaɗay na ma.

²⁹A ndir gwat ti ɓamtal musuburoy gun hirnga naŋ. Yo a ga ngweɗe da ɓamtalay tuwa ti gwat ngi vurum ngi sojeheye cek ɓa a sa Makabeheye keŋ avaˀa. A ciki gwat ngi vurumoy na, a ɗiyi palamay, mbur gar mazuɓ mulak tir mubuliye a pura taŋ gu.

³⁰Simoŋ mindira zivi nana a Modiŋ na, n’ada hã dana aruŋ.

³¹Dambalaka Trifoŋ a ra gi wer angi gawla buy Antiyokuso. Dar a sa kiɗa vagay.

³²A cifi ar li naŋ, a zum buy ngi ruwuy Siri-Madiɗa, amma a gi gwat malambaˀ asi ruwuyo haɗa.

³³Simoŋ a ndira walahay Zude hiri naŋ amuŋ, a guno ti hay musuburoy waɗ mohol madiɗahay. A gica miviŋheye ti faɓuru migidaŋhay. A pa gwat ngi zumoyo sek ara.

³⁴A dirba naŋ, Simoŋ a slin ɓa a ra ɓaka buy Demetriyus Mucuwo, buutu, Zudehey mavulaka na, a pula ɓi naŋ, asi mike na, Trifoŋ a hil di i gwatay tewle.

³⁵Buy Demetriyus a mbuɗaŋ mi naŋ. A tohoŋ letir ani:

³⁶«Buy Demetriyus a ja haŋ da Simoŋ, masay madiɗa, waɗ da sukwi Zude gar.

³⁷Loppol ngi ɓiri hirnga ati gwat ngi ɗuva hirnga kum mislinoko ndra di na, i lumaka taŋ le. Ndr’i ngumamgi leleŋ le ngi wãˀ ati kumo. Yo i wuɗam i tohom gwat da migi slrahaya ɓa a pulukum ɓi ngi buutu kum mawurkaka na ma.

³⁸gwat gar ndra mujuwaka vur kum na, i miɓa le njah, yo hay muguno ti mohol kum mindiraka taŋ na, i ngi kumoy amuŋ.

³⁹Gwat malambaˀ ati zluɓ kum migaka taŋ hã dana ani na, i pulukum taŋ le avra. Kum anta sa wurkam buutu da buy mata, yo da gwat ada ngi vul nga Zeruzaleme na, ndr’anta sa tukukum ˀay ngi vul naŋ mata.

⁴⁰Da mizli misina jigina hay ngi buyo ada cah asi kum na, anja a tohoko slimiɗ taŋhaya, yo anja leleŋ a gi ar wala ndra.»

⁴¹Ar vi miskat ti kukur tarnaˀ naŋ na, Israyeley a ra musukam vu avi tika ˀay ngi mizli Zude tahaya.

⁴²Joˀ mizli a zlaka toho gwat ar ɗerewol, yo a cicaka ɓiheye ar «Vi mudumbuŋ ngi zuma buy ngi Simoŋ.»

⁴³Ti di nah na, Simoŋ a cifa buy naŋ a Gezer, yo a pi sojehey tika tika. A ndir hay madiɗa, misi sar. A ru di, a ra zli walahay madiɗa pal ngi kiɗa vu, dar a tuɓa.

⁴⁴Mizli misi ar walahay madiɗa misi sara a hiloko sar nga ruwuy, dar mizli ngi digahay a zlidam hirnga.

⁴⁵Mizli ngir walahayay ati ngwasay waɗ ziri taŋhay a jiɗam ng’ar moholoy, a ngiraka zana taŋhay dar a wudam ˀay ngar ngar ng’avi Simoŋ ɓa a vula taŋ leleŋ.

⁴⁶A ɓakaŋ: «Ki gi ti ndra weˀe avi moˀore ndra na ta, amma pura ndra ircece.»

⁴⁷Simoŋ aɗiyi ɓi ati taŋ dar a kiɗa taŋ mata. Amma a ɓula taŋ tir walahay avra. Hay misi kulihey ar taŋ na, a buna dili taŋ avra. Naŋ mikiɗa mi naŋ na, a ci ng’ar walahaya, ti dimis ngi hunum ati ngi ɗuwula mihey.

⁴⁸A susuyumo gwat misi dili gar avra, joˀ a cifi mizli macinam mi da ɓimujuwa. A ndir li hin waɗ a guno ti mohol.

⁴⁹Mizli Zeruzalemey misi ar walahay muguno ti moholo, ɓa a boko nga hiɗika gwat da taŋ malla nga hiɗika gwat avra na, a tikaka taŋ le. Dar a sam bonoy ngi may, yo may a kiɗ mizli le haɗa.

⁵⁰A wudam ng’avi Simoŋ ɓa a tuɓa ɓi ngi leleŋ ati taŋ, joˀ Simoŋ a tuɓa ɓi naŋ. A ɓula taŋ tir li nana, yo a buna dili ngir hay muguno ti moholo.

⁵¹Ar hin mukur cuw nga makir ngi kiya mucuw naŋ ar vi miskat ti kukur tarnaˀ ngaŋkaˀ naŋ na, Zudehey a cam ng’ar walahaya ti salalayay waɗ ti kalaf ngi dibinojihey. A ra kiɗam garaya, jãwjãw ati ŋkakuhoy asi a paka hirnga le da mesene taŋ madiɗa, yo a ɓulaka le tisi ruwuy Israyele.

⁵²Simoŋ a ɓa mizli ɓa a gaka muguzlum naŋ vur vi gar ti mumul. A guno muwã ngi hay ngi Buymisemuŋ ti mohol, hiri dac da walahay muguno ti moholo, joˀ a pam akẽh ati mizli naŋhaya.

⁵³Simoŋ a pura na, mangal naŋ Zaŋ a gi mbur le. A cifaŋ a i madiɗa angi ngay ngi sojehey gar. Dar Zaŋ a cifi a Gezer.