Read South Giziga 1 Mak 14 Bible Online

1 Mak 14 - South Giziga bible

1 Mak 14

¹Buy Medi mija Demetriyus Mucuw naŋ Ar vi Miskat ti kukur tarnaˀ naŋ na, buy Demetriyus Mucuw naŋ a kuso soje naŋhaya, yo a cuh nga Medi. A wuɗ a sipi mijiniˀis ngi kiɗa Trifoŋ.

²Arsas, Buy ngi ruwuy Perse ati ngi ruwuy Medi a cina na, Demetriyus a co le ng’asi ruwuy naŋ. A slin madiɗa ngi sojehey ati sojehey haɗa ɓa a jakaŋ, a sakaŋ di titiri kine.

³Madiɗa ngi sojehey a ru, a kiɗa soje ngi Demetriyuso. A jo buyo, a so di da Arsasa, joˀ Arsas a caŋ ng’ar dangay.

⁴Ar hin ngi Simoŋ mazum buyo, hirwuy Zude a ndir setette. Yo Simoŋ a wuɗ ɓa sukwi ngi mizli a ndiram ar li mumul. Zuma buy naŋ ati gi dudok naŋ na, Zudehey a ra ŋhiyaka vur hin gar.

⁵Jom ti naŋ mazil slimiɗ tuwa na, a tuɓa walahay Zafa ma. A pula jiviɗ da Zudehey ɓa a cam ng’ ar matura ngi cikeˀeheye.

⁶A buto makway ngi sukwi naŋ ava ma, waɗ a ja ruwuyo kaw kuy kuy.

⁷A so ti misli mija ar vurumoy haɗa ma. Ruwuy Gezer ati Bet-Sur waɗ walahay Zeruzalem muguno ti moholo, a tuɓa taŋ da naŋ, yo a hila gwat taŋhaya pay. Ko mbur mitikaŋ gu anta.

⁸Mizli a ra huvam ti leleŋ, hirwuy a ra gi, widisey a ra yam zingahay.

⁹Mizli micawwahaya, taŋ micifam le jojoˀ na, a ɓam ɓi ngi ru ti ruwuy nga mbuŋ. Ziri gawla ati diylihey a kaka zana taŋ ngi sojehey, yo a luwaka gwat ngi vurum taŋhaya, ti singir avi mi.

¹⁰Simoŋ a ra so ti gwat ngi zum da mizli ngir walahayaya, yo a vula taŋ gwat ngi vurum ngi cika vu ma. dar slimiɗ naŋ a zil ti mezle, hã seŋseŋ asi ruwuy mira kiɗo mi.

¹¹A ga ɓa ruwuy a cifi ar leleŋ, yo Israyeley a ra mumulom haɗa.

¹²Mbur gar a musuk vu a susuɗuk ngi gudubun ati ngi uruf naŋ. Ko mbur anta ngi muɗa taŋ didak ta.

¹³Mesene taŋhay a ngizlam le pay asi ruwuyo, yo buyoy i mumuskuɗohoy le tur tur ar hin tayna.

¹⁴Simoŋ a vula gidaŋ da mihĩya ngi si ruwuy naŋhaya cek. A ga ɓa mizli a cinaka mi da ɓimujuwa, yo a susuyumo Zude miteŋteŋ tahay ati misi moˀoreheye gar.

¹⁵A vula gidaŋ naŋ wãˀ da hay ngi Buymisemuŋ, yo a pi gwat ki sa mipalay haɗa ng’ara.

¹⁶Zle a Roma hã seŋseŋ a Sparte, mizli a cinaka ɓi ngi muc ngi Zonataŋ le, joˀ a likaka haɗa.

¹⁷Amma a sa cinaka na, sukum naŋ Simoŋ a ra zuma li naŋ, yo li vay ɓuh ati walahay Zude, i naŋ mawa taŋ.

¹⁸A tohokoŋ letirey toh toh ar beleler ngi ɓiri gazahay, ɓa ɓi ngi Zudas mijam ngam, yo taŋ mujumom ˀay Zonataŋ ngama ati ngi, a maka hiri naŋ amuŋ.

¹⁹A slufaka letir tuwa a mihiri ngi mizli gar.

²⁰Letir Spartehey mislinoko di vuna, mingiɓi ngi raˀa n’ani: «Buyoy ati madiɗa ngi soje ngi ruwuy Spartehey a ra jaka haŋ da Simoŋ, masay madiɗa ati mizli micawwahay, da masayay waɗ da mizli Zudehey gar.

²¹Ɓi ngi zila slimiɗ kum ati ɗi ngi mizli macunukum mi na, mizli, buy kum mislino taŋ ng’avi mizli ndrahay a ndrahay a ɓam ndra di le. So taŋ a cira ndra hiri le.

²²Ɓi taŋ miɓam ndra di na, i tohoko le toh toh ar ɗerewol ngi mingiɓi ngi mizli ndrahay. I tohoko kaɓa ani: Numeniyus, mangal ngi Antiyokus ati Antipater, mangal ngi Jasoŋ, a soko le a hay ndar ɓa i maka hiri ngi ji ngama ndra ati taŋ amuŋ.

²³Mizli ndrahay mukusom tidi nah na, hiri a cira taŋ le ngi tiɓa mizli tayna, yo ɓa mingiɓi taŋ a caka kulaˀ a wuzla ɗerewol miweˀ vuhoy. Kanah na, Spartehey a sa ndiram di keŋŋe. Waɗ mana, i slinam di le toh toh da Simoŋ, masay madiɗa ma.»

²⁴A dirba naŋ, Simoŋ a slina Numeniyuso, nga Roma ti mbaray madiɗa ngi ɓiri hirnga. Cikili naŋ i mupurla ati cikili ngi ɓiri gaza kilo skat skat makir. A slinaŋ ɓa a ɓa ɓi ngi jumoˀay taŋ njah wãˀa.

²⁵Zudehey micinaka ɓi naŋ na, a ɓam: «Ɓa i ra wuɗaka Simoŋ ati ziri naŋhaya na, i bugaka ka wana ska?

²⁶Asi mike, taŋ ati sukum naŋhay waɗ mizli ngi hay cine naŋhaya, a pulaka cika vu ar ndra daˀ ta. A ɓula mesene ngi Israyeleye ti maslalam, hã a ga ɓa i cifam ar diimu.» A tohom gwat nguɗ nguɗ ar ɓiri gaza waɗ a diraka taŋ dar dar avi ɓamtalay a muwã Siyoŋ.

²⁷Mingiɓi taŋ mutohoko vuna n’ani: «Ar hin mukuruˀ nga dangafaɗ ngi kiya Elul, ar vi miskat ti kukur tarnaˀ nga cuwo, naɓa i vi mimakir naŋ ngi Simoŋ, masay madiɗa mazum buy.

²⁸Ar kus madiɗa ngi masayay, ngi mizli ngi si ruwuyoy, ngi buy ngi sukwi ngi mizli ati ngi mizli micawwahaya, a ɓam ndra ɓi ani:

²⁹Vurumoy a gam le asi ruwuy ndra haɗa. Simoŋ mangal ngi Matatiyas, dideˀ ngi Yoyaripe, taŋ jom ati sukum naŋhaya, a pulaka vu taŋ mbak da mesene ngi sukwi taŋhaya. A cikam vu vur hay ngi Buymisemuŋ ati ɓimujuwa. Ŋha a vulaka dudok da sukwi ndra.

³⁰Zonataŋ a kuso sukwi ngi mizli naŋhaya, yo a cifi masay madiɗa, dar a mo ng’avi mizli naŋhay amuŋ.

³¹Mesene ngi Israyeley a wuɗam a cam ɓuyoh ng’asi ruwuy taŋ ɓa a ngizlakakap waɗ a wahaka hay ngi Buymisemuŋ avra.

³²Akẽh, Simoŋ a ru, a ra cik vu ar sukwi naŋ. A tika vendeke ngi zlili naŋ, a vul di gwat ngi vurum da soje naŋhaya, waɗ a vula taŋ dala ma.

³³A guno walahay Zuda ati Bet-Sur walahay ngir makwaya. A paka gwat ngi vurumoy adiga zle.

³⁴Zafa, walahay ngi mi mubuliy, waɗ Gezer, migweˀ a ciki li vay Asdoto, a guno taŋ ti mohol. Mesene taŋhay taŋ adiga zle. A pi Zudehey sek adiga, yo a gwat ngi vula zuy ngi vu ati ngi hay taŋhaya, a vula taŋ di ma.

³⁵Mizli a puraka na, Simoŋ naŋ teŋteŋ avi taŋ, yo a ra wuɗ a vula dudok da sukwi naŋ. A cufakaŋ i buy, yo i masay madiɗa ma. Hana gar vur gwat naŋ miga, naŋ migi jeŋ, yo naŋ mutuɓa sukwi naŋ na. Ɓa sukwi Zuda a tiri i sukwi madiɗa na, Simoŋ a wuɗ le haɗa wãˀ.

³⁶Ar hin ngi siifa naŋ na, Simoŋ a ɓula mizli matuɓaka ɓi ngi Buymisemuŋ tahaya, ti ruwuy Zude avra, jom ti mizli misi a Zeruzalem, mutuɓaka walahay madiɗa ngi Davit na ma. Mizli tayna, a ɗiyam li ɗum le adiga, a boko ti ra nga hirya hay ngi Buymisemuŋ. yo a hiryaka naŋ mipal tuwa.

³⁷A cifi soje Zudahay adiga, a guno ti mohol ɓa hirwuy ati walahay a ndiram setette. A sikiɗa mohol ngi Zeruzaleme ng’amuŋ.

³⁸«A dirba naŋ buy Demetriyus mucuw naŋ a ɓa Simoŋ njah, naŋ i masay madiɗa.

³⁹A cifaŋ awuzla ngama naŋhay, yo a ɗuvaŋ hirnga haɗa.

⁴⁰A cin zleˀe na, mizli Romahay a gam ti Zudeheye le kaɓa ngama taŋhay, kaɓa mizli mujumohoy, yo waɗ kaɓa sukumuŋhoy. A tuɓaka mislin ngi Simoŋhoyo le kuy kuyo ma.

⁴¹Zudehey ati masayay a puraka na, suwen taŋ macifaka Simoŋ, i buy taŋ, yo i masay madiɗa hã ar hin, mijiviɗ mijeŋŋe ngi Buymisemuŋ muso le.

⁴²Simoŋ a tiri i madiɗa taŋ, yo i madiɗa ngi hay ngi Buymisemuŋ ma. I naŋ macifa migi slra ngir hay ngi Buymisemuŋ, i naŋ mavula taŋ ngi wi ruwuyo. A cifa madiɗa ngi sojehey ati ngi hay muguno ti moholoyo ma.

⁴³Simoŋ i madiɗa ngi slra ngir hay ngi Buymisemuŋ. Sey mbur gar a ɗuvaŋ cinaŋ mi. Ɗerewol mupuɗaway gar, ngi si ruwuy naŋ, sey a tohoko taŋ ti slimiɗ naŋ. Yo zana gagaza ngi muguzlum ati gwat ngi wuya mipa ti ɓiri hirngahaya, a ka taŋ zuy.

⁴⁴A wuzla mizli, yo awuzla masayaya, vur gwat ngi ki tayna, ko mbur loŋ mangilaŋ mi anta. Naŋ miɓi le na, mbur mangilaŋ mi anta. Mbur magi kus asi ruwuyo, manja a vula ɓi naŋ ko loŋ anta. Ko mbur maki zana gagaza ngi muguzlum, malla gwat ngi wuya mipa ti ɓiri hirngaoy ko loŋ anta.

⁴⁵Mbur gar micina mi da ɓi hanayna ta malla mimbiɗi le pal asi taŋ na, a sa kutakaŋ ti bonoy.

⁴⁶Ɓa Simoŋ a ga gwatayakanah na, mizli gar a tuɓaka le.

⁴⁷Ɓa ngi cifi masay madiɗa, madiɗa ngi sojehey, buy ngi sukwi Zude ati ngi masayay, yo ɓa ngi cifi a hirnga mizli gar na, Simoŋ a tuɓa le.

⁴⁸«Zudehey a ɗuvaka a kwacay taŋ ɓa a tohoko ɓi hana nguɗ nguɗ ar beleler ngi ɓiri gazahay, ɓa a sa paka taŋ ar wazlaray ngi hay ngi Buymisemuŋ, ar li misi mbur gar a puraŋ.

⁴⁹A tohom mekelemey toh toh sek ar hay ngi pi slili, ɓa Simoŋ ati ziri naŋhay a puraka taŋ.»