Read South Giziga 1 Mak 15 Bible Online

1 Mak 15 - South Giziga bible

1 Mak 15

¹Zle tir matura Grekeye, Antiyokus mitarnaˀ naŋ, mangal ngi Demetriyus mudumbuŋ a slin ti letir da Simoŋ, masay madiɗa, buy ngi sukwi Zude, waɗ da Zudehey gar.

²A toho mingɓi naŋ ani: «Buy Antiyokus a ra ja haŋ da Simoŋ, masay madiɗa, yo madiɗa ngi sukwi Zuda waɗ da sukwi Zude vuna.

³Mizli misi werey a tuɓaka li zuma buy ngi dideˀ ɗuwoyo le, ani i rawuɗ sey i ga ɓa a tiri kaɓa misi zleˀe amuŋ. Vurˀe, yi wuɗ mizli le haɗa, yo i hil palalam ngi vurumoy le ma.

⁴Yi juwa le a mevel ɗu ɓa i mo ng’asi ruwuy ɗu amuŋ, yo ɓa mizli mitiram di diŋ, yo mimbuzlam walahayay haɗa na, i sipa taŋ, i kiɗa taŋ.

⁵Wurenna, ɓi ngi dideˀ ɗuwoy mupulaka ɓi ngi buutu, yo taŋ muɗuvukuw hirnga ar gwat mekelemey gar na, yi ja ɓi naŋ le kaw aya.

⁶I puluw jiviɗ le ɓa ki gi suloy ɗik ti haŋ ɗiki, ɓa a gi slra asi ruwuy ɗiki.

⁷Zeruzalem ati hay ngi Bumbulvuŋ, gwat maga taŋ anta. Gwat ngi vurum misi avi ka, walahay, ka muguno taŋ ti moholoy ati walahay ka misi ar taŋ gar i ngiɗikey.

⁸Duvus ngi buutu misi wurenna ati misi timbuŋ, yi puluw taŋ le zle wurtenna, hã ngi sete.

⁹Ya misa ɗiya li zuma buy ɗu le hiri naŋ amuŋ sona, i sa ɗuvuw hirnga daka waɗ da sukwi ɗik gar, hã duniya gar a sa puraka madiɗa ɗike.»

¹⁰Ar vi miskat ti kukur tarnaˀ nga mufaɗ naŋ na, Antiyokus a cuh ng’asi ruwuy ngi dideˀ naŋhay. Mizli gar a jumoko ng’ava, hã mizli a ndiram avi Trifoŋ njiraˀ kini.

¹¹Antiyokus sipaŋ, dar Trifoŋ a kil, a ra ɗum a Dor.

¹²Mendere a ra so ng’ar naŋ asi mizli mupulakaŋ na, Trifoŋ a sina le.

¹³Antiyokus a so pa walahay guɗuk naŋ a ciki walahay Dor, ti sojehey durmuk skat ti kukur cuw waɗ mukuro pilisey durmuk dangafaɗa.

¹⁴A guno walahaya, yo palalamay a ndohoko di ti mi mubuliy. A ndaha walahaya, tiruwuy waɗ tir mubuliy, mbak ko mbur mabi malla maci ng’ara anta loŋ ta.

¹⁵Ti Numeniyus ati cil naŋhay, mimoko ti Roma, letir mutoho da buyoy ngi ruwuy taŋhay kaw kaw a haŋ. A tohoko mingiɓi naŋ ani:

¹⁶«Lisiyus, mbur madiɗa ngi Roma a ra ja haŋ da buy Ptoleme.

¹⁷Mijiviɗ ngi buy Zudeheye, Simoŋ masay madiɗa ati mizli Zudehey gar, a slinoko taŋ le, yo a soko ng’asi ruwuy ndra ti ɓi ngi ji ngama ati ɓi ngi jum. A wuɗam ɓa ɓi ngi jumoˀay ati ɓi ngi ji ngama misi zleˀe na, i maka hiri naŋ amuŋ.

¹⁸A soko ti mbaray ngi mbiriɓiri hirngamisi cikili naŋ mupurla cikili ngi ɓiri bara kilo skat skat zlum kaw a haŋ.

¹⁹Vurˀe, hiri a ciriy le ngi toho letir da buy ngi si ruwuyoyo, ɓa a gam gwat malambaˀ da Zudeheye ta, a kiɗam vu ati taŋ, ati walahay taŋhay ta malla ati ruwuy taŋhay ta. Yo waɗ a jumom ng’avi mesene ngi Zudehey ta ma.

²⁰Ya kwana, mbaray taŋ musoko di na, i tuɓa le.

²¹Ani mizli misi werey mikilam tisi ruwuy taŋ ng’avu kum na, pulaka taŋ asi haŋ ngi Simoŋ, masay madiɗa, ɓa a kuta taŋ weˀe avu ɓi taŋ mujuwaka.»

²²Letir nana vuna, a tohoko le da buy Demetriyus, buy Atal, buy Ariyarat, waɗ da Arsas.

²³A tohom le ng’asi ruwuyoy gar, kaɓa ani: Samsame, Sparte, Delos, Mindos, Sisiyon, Ker, Samos, Pamfili, Lisi, Halikarnas, Rodes, Faseli, Cos, Side, Arvat, Gortiŋ, Snit, Sipre, Siren.

²⁴A tohom le pal da Simoŋ, masay madiɗa.

²⁵Dambalaka na, buy Antiyokus a pa walahay guɗuk naŋ le a Dor, tir vay muɓuh. A ra slin ti sojehey ngi kiɗa vu ko mbak le ta. Yo a ra ɗiyi masin ngi kiɗa vuhoy ma. A tika mizli ngi Trifoŋhoyo, mbak ko mbur maci ng’ar walahaya gu anta, yo mabi gu anta.

²⁶Simoŋ a slinaŋ ti sojehey durmuk cuw ɓa a kiɗam vu ti seˀe. Yo a slinaŋ ti ɓiri bara, ti ɓiri hirngawaɗ ti gwat mupuɗaw puɗaw mekelemey.

²⁷Amma Antiyokus a ngum tuɓa gwat tayna ta, yo a pula ɓi ngi taŋ mujuwaka tuwa avra ma. Dar gi ti Simoŋ kaɓa i mesene naŋ.

²⁸A slinaŋ Atenobiyus, ngama ngi buy ɓa a ra ɓaŋ na: «Zafa, Gezer ati Zeruzalem walahay muguno ti moholo, ki tuɓaka taŋ le da kum, dambalaka i walahay ngir li zuma buy ɗuwoy ngbaŋ.

²⁹Hirwuy ɗu, ki tiram di le i diŋ. Ki gam gwat malambaˀhay le haɗa asi ruwuy ɗu, yo ki tiram le kum i madiɗa ngi walahayay mbeˀ mbeˀ ar li ya mazum buy ara.

³⁰Walahay kum mutuɓaka taŋ na, mikiy taŋ, yo wurkaka buutu ngi li vay kum mutuɓaka taŋ ti duba Zude na.

³¹Da ki ngumom ta na, vilikiy ɓiri bara kilo durmuk kuruˀ nga makir ar deɗe ngi walahaya, waɗ kilo durmuk kuruˀ nga makir ar deɗe ngi kum mumbuzlaka gwatay na, waɗ vur buutu li vay tayna mawurkaka na ma.»

³²Ti Atenobiyus, ngama ngi buy mindil a Zeruzaleme, a pura zlili ngi Simoŋ, i ki sahay mbaf mbaf ti ɓiri hirngaati ɓiri bara, tataˀ ar tabul waɗ gwat ngi cifi mezlehey ma. A gaŋ ngirkik, joˀ a ra ɓaŋ ɓi ngi buy tuwa.

³³Simoŋ a mbuɗaŋ di ani: «Ndr’i tuɓam di i li ngi mulakay ta, malla i li ngi mbur mekelem ta. I tuɓam di i li ngi dideˀ ndrahay, mesene ndrahay mutuɓaka taŋ ti zlezle.

³⁴Ndr’i zlaka naɓa li naŋ kaslsla ɓa i tuɓaka gwat ngi dideˀ ndrahaya.

³⁵Walahay Zafa ati Gezer ka macufuɗa taŋ na, i walahay magam gwat malambaˀ haɗa da mizli ndrahay ati ruwuy ndra. Vur taŋ, i sa vulukuw ɓiri bara kilo durmuk cuw ti kilo skat skat tarnaˀ.» Atenobiyus a mbuɗaŋ mi pal ta.

³⁶A mi ti mevel ng’avi buyo. A ɓaŋ ɓi ngi Simoŋ, ɓi ngi zlili naŋ ati gwat naŋ mupura taŋ gar. Dar buy a zuɓ huma fõh fõh.

³⁷Trifoŋ a ci palalam, dar a kil.

³⁸Joˀ Buy Antiyokus a ca Kendebe, i ngi hirnga madiɗa ngi soje ngir vay mi mubuliyey. A vulaŋ soje misi saray waɗ mukukuro pilisey.

³⁹A ɓaŋ ɓa a pam aciki walahay Zude. Ɓa a paka walahay Kedroŋ hiri naŋ amuŋ, a cakaŋ miviŋheye gidaŋ gidaŋ, waɗ a gam vurum ati mizli Zudehey. Buyo, a ru ti sipi Trifoŋ.

⁴⁰Kendebe a ru nga Zamniya, a ga bonoy Zudeheye. A ci gurjik ng’asi ruwuy Zude, a hilo dangayay, malla a ngizl mizli.

⁴¹A ndira Kedoŋ hiri naŋ amuŋ. A pi soje misi saray ati mukukuro pilisey sek adiga ɓa a boko, a zlaka Zudeheye ngi kiɗa vu a jiviɗ, kaɓa buy miɓaŋ di tuwa.