Read South Giziga 1 Mak 16 Bible Online

1 Mak 16 - South Giziga bible

1 Mak 16

¹Zaŋ a ru nga Gezer ɓa a ra ɓa ɓi ngi gwat Kendebe maga na, da cine naŋ Simoŋ.

²Simoŋ a kuso ziri naŋ madiɗahaya cuw taŋ, a ɓa taŋ: «Ya ati sukum ɗuwoy waɗ hay ngi cine ɗu, i kiɗam vu le ati mesene ngi Israyeleye, zle ti gawla ndra hã wurenna. Ndr’i lahaka Israyeleye le is mbeˀ mbeˀe.

³Ya, i gi gal le muduba, amma kumo, mbele mezle ngi Buy muŋ, ki roko ti gidaŋ ngi vu kum aruŋ. Zuɓaka li ɗu ati ngi sukum ɗu so, a ra kiɗam vu vur sukwi ndra. Anja Buymisemuŋ a junukum.»

⁴Asi ruwuyo, a wini sojehey durmuk kukur cuw, waɗ mukukuro pilisey, dar a ram nga kiɗa vu ati Kendebe. A jaka hiikuɗo a Modiŋ.

⁵Taŋ mislikiɗam ngi miprik prik na, a ram kini tir li micay, keɗ na, soje misi saray ati mukukuro pilisey sikinih, a ra soko ng’ar taŋ. Zlazlar ada ɓaˀ ar wala taŋ aruŋ.

⁶Zaŋ ati mizli nfi seˀehey a cicam hiri taˀ ng’ar taŋ. A puraka na, mizli tuwa a ra zluwunam ngi tuwuɗa zlazlara, Zaŋ a tuwuɗa tuweɗ dumbuŋ. Mizli naŋhay mupurakaŋ na, a tuwuɗam aseˀe.

⁷A wuɗuka soje naŋhaya, a pa mukukuro piliseye a wuzla misi saray. Asi mike na, mukuro pilis ngi mesene taŋhaya, taŋ haɗa.

⁸a ɓa mizli naŋhaya, a fam tulumoy, dar a kiɗaka Kendebe ati soje naŋhaya. Mizli a mucam haɗa, yo mindiramaya, a kilam ng’ar walahay muguno ti mohol.

⁹Zudas, sukum ngi Zaŋ, a lum waˀa le ar li kiɗa vu. Amma Zaŋ sipa taŋ hã seŋseŋ a Kedroŋ, walahay, Kendebe mindira hiri naŋ amuŋ tuwa.

¹⁰mizli makilamay tuwa, a ram seŋseŋ ar hay musuburoy misi aciki Asdot, ar li ɓuh. Zaŋ a wura taŋ, yo mesene taŋhay mumucama, mizli durmuk cuw. Zaŋ a mo nga Zude ti leleŋ.

¹¹Ptolome, mangal ngi Abuboso, a tiri le, i miwi li micay ngi Zeriko. Ɓiri bara ati ɓiri hirngaada ava haɗa,

¹²asi mike na, i jomo ngi Simoŋ, masay madiɗa.

¹³Naŋ a cir di hiri haɗa, yo a wuɗ a tiri madiɗa ngi si ruwuyo wãˀ, dar a gi wer ngi susuyumo Simoŋ ati ziri naŋhaya.

¹⁴Dambalaka na, Simoŋ a ra guno walahay ngi si ruwuy naŋhaya, asi a ra wuɗ a sina gwat walahay miro ti may naŋ. Ar kiya sebat, malla kiya mukuruˀ ngaŋ kaˀ naŋ ngi vi miskat ti kukur tarnaˀ nga tarnaˀ naŋ na, a ram ati ziri naŋhay Matatiyas waɗ Zudas nga Zeriko.

¹⁵Mangal ngi Abubos a tuɓa taŋ ti wer ng’ar hay meciɗek muguno ti mohol, a zilaka hay nah Dok. I naŋ vuna mindira. A da taŋ ɗaf madiɗa, amma a pul mizli ɗum a hay tuwa.

¹⁶Ti Simoŋ ati ziri naŋhay miwam na, Ptolome ati mizli naŋhay a hilaka gwat ngi wurumoy, a kilam ng’ar Simoŋ ar hay ngi zumo, dar a kiɗaka taŋ vagay vagay jom ati ziri naŋhaya waɗ mizli cah asi migi slra naŋhaya ma.

¹⁷Ptolome a njik di i vu naŋ wãˀa, gwat mezle migakaŋ di na, a ma ti malambaˀa.

¹⁸A dirba naŋ, gwat naŋ miga hana, Ptolome a slin di da buy Antiyokuso toh toh ti tuhu. A cufuɗaŋ ɓa a vulaŋ mizli ngi mijiniˀisey ɓa a tuɓakaŋ walahay ati li ɓuhoy.

¹⁹A slin ti mizli mekelemey nga Gezer, ɓa a ra susuyumoko Zaŋ. A slin ti letir madiɗa ngi sojeheye, a ɓa taŋ ɓa a ram ng’ava, a wunuka taŋ ɓiri bara ati ɓiri hirngawaɗ gwat ngatarahay.

²⁰A slina mekelemeye nga tuɓaka walahay Zeruzalem ati muwã ngi hay ngi Buymisemuŋ.

²¹Amma mbur pal a kil a mbuŋ nga Gezer, a ra ɓa Zaŋ cine naŋ ati sukum naŋhay a mucam le, yo ɓa a ɓaŋ: «Ptolome a slino mizli le ɓa a sa kiɗuw ka vuna ya.»

²²Zaŋ mici ɓi hana na, a gaŋ wele. A ja mizli musoko nga kiɗ naŋ tuwa, dar a kiɗa taŋ vagay vagay.

²³Mambaˀ ngi ngi gwat Zaŋ miga taŋ, naŋ mikiɗ vu, gwat madiɗahay naŋ miga taŋ, mohol migidaŋ naŋ mindira taŋ ati gwat naŋhay mekelemeye,

²⁴i mutohohoy le gar ar ɗerewol miweˀ ngi naŋ muzum buy, zle ar hin naŋ mici masay madiɗa ar li ngi cine naŋ.