Read South Giziga 1 Mak 2 Bible Online

1 Mak 2 - South Giziga bible

1 Mak 2

¹Ar hin tayna, Matatiyas, mangal ngi Zaŋ, dideˀ ngi Simeyoŋ, i masay ngi wuzla ziri ngi Yoripey. A slikiɗ ti Zeruzaleme, ɓa a ra cifi a Modiŋ.

²Naŋ ti ziri zum. Zaŋ, a cakaŋ slimiɗ mekelem, a zilaka Gati,

³Simeyoŋ, a zilaka Tasi,

⁴Zudasa, a zilaka Makabe,

⁵Elazara, a zilaka Avaraŋ, Zonataŋ, a zilaka Apus.

⁶Naŋ mupura magam gwat malambaˀ muwãˀhay asi ruwuy Zuda ati Zeruzalem na,

⁷a ɓi: «Kay, ya ar bonoy! A yikiy ngi pura mangizlaka mizli ɗuwoy ati walahay mipal kwa? A yikiy ɓa yi cifi joˀ aka, mbak mizli ɗuwoy asi haŋ ngi mesene taŋhay, yo mbak hay ngi Buymisemuŋ asi haŋ ngi mulakay kwa?

⁸Hay ngi Bumbulvuŋ a tiri le kaɓa mbur ma kam slimiɗ ar naŋ mata.

⁹Gwat naŋhay mavulakaŋ dudoko, a hilaka taŋ le ar vurum, a ra ngizlaka ziri memeɗe ndrahaya, yo ziri gawla ndrahaya, a ra diɗam sunok sunok asi mesenehey taŋhay a ra kiɗaka taŋ ti maslalam.

¹⁰Mizli duniyhay a tuɓaka walahaya le vur mijingaˀ vur mijinagaˀ yo a kilam ti zliliheye le.

¹¹Gwat ngi wuya naŋhay gar, a turoko taŋ le avra. Naŋ zleˀe i diimu, ani wurenna, naŋ ar dangay.

¹²Hay mipal mukuy teˀ na, a ra vula ndra mumul zleˀe, ani wurenna, a tiri le kirɗak kirɗak, yo mizli duniyahay a hiryaka le.

¹³Na, i sa ndir ti siifa vuna ngi gi mi aruŋ maka?»

¹⁴Matatiyas ati ziri naŋhaya, ti taŋ misi ar bonoy tuwa, a ngiraka zana taŋhaya, a kam zana ngi vagay, joˀ a tuwam vagay kaɗam kaɗam.

¹⁵Ngi pas numuŋ ada na, mijiviɗ ngi buy Antiyokusoy, matikaka ˀay da mizli ɓa a pulaka ɓimujuwa ngi Moyis tuwa, a soko nga Modiŋ ɓa a tikaka ˀay da mizli ngi gi mikuli ngi mizli duniyahay.

¹⁶Mizli Israyeley haɗa a ram tisi taŋ, amma Matatiyas ati ziri naŋhaya, a cifam baˀ pal taŋ, arleˀe.

¹⁷Mijiviɗ ngi buyoy a ɓaka Matatiyasa: «Ka ki mbur mupuɗaw, yo ki mbur madiɗa asi ruwuy hana, ziri ɗikey ati mizli ngi hay ɗikey a ra vulukuw gidaŋ.

¹⁸Ka so dumbuŋ ngi gi gwat buy miɓa ɓi naŋ daˀ daˀ le na. Sukwi ngi mizli ati mizli Zudahay waɗ mizli misi a Zeruzalem aruŋ na, a gaka le si. Ka ati ziri ɗikeye, ki sa tiram ngi wuzla ngama ngi buyoy, a sa ɗuvukum hirnga, a vulukum ɓiri bara ati ɓiri hirnga waɗ gwat mekelemey ngataraŋ.»

¹⁹Matatiyas a mbiɗaŋ di ˀay paɗ a muŋ: «Ko da sukwi ngi mizli gar misi ar li buy miwa a ra cinakaŋ mi, mbur gar a pula sirik ngi dideˀ naŋhaya, ɓa a sipam ɓi naŋ miɓa na kwana,

²⁰ya ati ziri ɗuwoy waɗ sukum ɗuwoyo, ndr’i sa sipaka ɓi ngi jumoˀay ngi Buymisemuŋ miga ati dideˀ ndrahaya aruŋ na si.

²¹Anja Buymisemuŋ a vula ndra gidaŋ ɓa ɓimujuwa naŋhay a ti ɓimuɗuva naŋhaya, i pulaka taŋ ta ndidaˀ wãˀ.

²²Buy miɓi ɓa i pulaka sirik ndrahaya na, anja i sa cinakaŋ mi ta.»

²³Ti Matatiyas mikiɗa mingiɓi naŋ sina, mbur Zude mekelem ada, a so a mi hiri ngi mizli gar ɓa a gi kuli ngi Modiŋ kaɓa buy miɓa tuwa.

²⁴Matatiyas mupura na, a jijik ti membezleŋ ngi vu naŋ wãˀ. A ji mevel, joˀ a kil, a ra slaŋ ˀay ar li ngi gi mikuli vuna.

²⁵A kiɗa mijiviɗ ngi buy, matika ˀay da mizli ngi gi mikuli tuwa vagay ma, joˀ a putukuso li taŋ ngi gi mikuli avra.

²⁶May jini ˀis asi ɓimujuwa ngi Moyis a ra jaŋ haɗa haɗa kaɓa naŋ mija Pinas, ti naŋ mikiɗa Zimri, mangal ngi Salu na.

²⁷A dirba nah, Matatiyas a bula walahaya ti widi ˀay bok, a ɓi: «Anja mizli gar misi ti may ngi jini ˀis asi ɓimujuwa ngi Moyis, yo macinaka mi da ɓimuɗuva na, a sipikiy.»

²⁸Naŋ vuna, ati ziri naŋhay a kilam nga muwã, a pulaka gwat taŋhay gar ar walahay.

²⁹Dar mizli mawuɗam a cifi ar siifa taŋ jeŋŋe kaɓa ɓimuɗuva ngi Moyis mawuɗ na, a kilam ng’ar li papala, ɓa a cifam adiga,

³⁰taŋ vuna, ziri taŋhay, ngwas taŋhay waɗ ginew taŋhaya, asi a ra sipaka taŋ nder nder.

³¹Mizli ngi buyoy ati sojehey micifam a Zeruzalem, ar walahay madiɗa ngi Davite, a cinaka na, mizli ada, a pulaka ɓi buy miɓa tuwa le, a kilam le nga ɗum ar li papala.

³²Dar zigiduw a kilo nga sipi taŋ. Taŋ mulumaka taŋ na, a paka walahay guɗuk taŋ hiri taˀ ng’ar taŋ, joˀ a juwam vu ngi sa zla taŋ ngi kiɗa vu ti hin ngi sabat vuna si.

³³A ɓaka taŋ: «Muk muduba! Boko tir li ɗum kumoyo, cinaka mi da mingiɓi ngi buy miɓa, naɓa ki sa lahaka hutuŋ kumoyo.»

³⁴Zudehey a mbiɗaka taŋ di: «Ndr’anta bam ta, yo ndr’anta cinaka mingiɓi ngi buyo ta. Ndr’anta wuɗam i hiryaka hin ngi sabata ta.»

³⁵Sojehey a zlaka taŋ ngi kiɗa vu.

³⁶Amma ko taŋ a wuɗam cika vu ta, a hizigam ɗugur ng’ar sojeheye ko pal le ta, yo ko t’anta gicaka miviŋ ngi li ɗum taŋhaya ta ma.

³⁷A ɓam na: «Sey i mucam cek ar ɓi mikaslsla ndra si. Kum makiɗam ndra vagay vagay manja i cam ar ɓi na, muŋ ati ruwuyo i sedewo ndrahay.»

³⁸Dar a zlaka taŋ ngi kiɗa vu ar hin ngi sabata, a mucam cek, taŋ vuna, ngwas taŋhay, ziri taŋhay waɗ ginew taŋhaya. Jom gar na, mikiɗa vagayaya a gi gwat ngi mizli durmuk gu.

³⁹Ti Matatiyas ati ziri naŋhay micinaka ɓi nah na, a tuwaka taŋ haɗi wãˀ.

⁴⁰Dar a ɓam ar wala taŋ: «Da i gaka gar kaɓa sukum ndrahay migaka na, malla da i kiɗam vu ati sukwi ngi mizli ngi laha hutuŋ ndra ati sirik ndrahaya ta na, naɓa a sa susuyumom ndra tisi ruwuyo kutum.»

⁴¹Ti hin nana vuna sina, a juwam ɓi a mevel taŋ, a ɓam: «Mbur gar masa zla ndra ngi kiɗa vu ti hin ngi sabat na, kuɗukum di, naɓa ndr’anta sa mucam gar kaɓa sukum ndrahay mumucam ar li ngi ɗum taŋhay na ta.»

⁴²Dar mizli Hasidihey a jumoko kiŋ ng’avi taŋ. Taŋ i mizli migidaŋ ngi si Israyeley, yo i mizli micika vu vur ɓimujuwa ngi Moyise ma.

⁴³Waɗ mana, mizli gar mawuɗam a laham avi ɓi malambaˀ na, a jumom ng’avi taŋ. Dar a sikam, yo a lumam gidaŋ ma.

⁴⁴A kusom sojehey. Mevel maja taŋ tuwa, a kiɗaka mizli Zudahay, migi gwat malambaˀ vur ɓimujuwa, yo mizli mekelemey a laham nga wuzla sukwi ngi mizli duniyahay.

⁴⁵Ti Matatiyas ati ngama naŋhay a gunoko walahaya ngi putukuso li ngi gi mikuliheye.

⁴⁶Taŋ mulumaka ziri le asi ruwuy Israyele, da i manja ci mizaway na, a caka taŋ ti gidaŋ si.

⁴⁷A juwam ɓi ngi ɓula muhuhumo vuhoyo, dar gwat ngi gi taŋ a cuh ɗalla.

⁴⁸Sukwi ngi mizli ati buy taŋhay a ra wuɗam kiɗa ɓimujuwa ngi Moyise. Taŋ a lahaka ɓimujuwa tisi haŋ taŋ. Ko a pulaka mesene ngi Buymisemuŋ a lum bugawla ta.

⁴⁹Matatiyasa, hin ngi siifa naŋ a ra ru nga kiɗa mi. Dar a ɓa ziri naŋhaya: «Puraka ɗi, ani wurenna i hin ngi huhumo vu ati hirsa vu, i hin ngi ngizla vu ati ji mevel.

⁵⁰Na ziri ɗuwoy, wurenna sey ki cikam vu asi ɓimujuwa kuy kuy, sey ki cikam vu asi ɓi ngi jumoˀay Buymisemuŋ mujumo ati dideˀ ndrahay na.

⁵¹Gwat dideˀ ndrahay migaka taŋ ar hin taŋ na, wulukaka keŋ, ɓa ki sa lumam dudok, yo slimiɗ kum a sa zil ngi sete.

⁵²Abrahama, ti Buymisemuŋ mici a kwacay naŋ na, a cifi le teŋteŋ ta kwa? Vurˀe, Buymisemuŋ a tiri di le i mbur mijeŋŋe.

⁵³Zozefe, ko ar hin ngi bonoy naŋhay kwana, a sipa ɓi mujuwu ngi Buymisemuŋ le, dar a tiri madiɗa ngi ruwuy Ezipte.

⁵⁴Dideˀ ndra Pehãsa, ti naŋ macik vu asi ɓi ngi Buymisemuŋ na, Buymisemuŋ a ɓaŋ daˀ le, ɓa dideˀ naŋhay a sa tiram masayay ndrehhe.

⁵⁵Zozuwe miga slra naŋ kuy kuy na, a tiri migi kiita ngi ruwuy Israyel.

⁵⁶Kalepe, vur naŋ magi sedewo minjah na, a lum ruwuy mi nga naŋ le tivi jum ngi mizli.

⁵⁷Davit micifi teŋteŋ na, a lum li cifi ngi buy ngi sete.

⁵⁸Eli micik vu hirdam hirdam ar ɓimujuwa ngi Buymisemuŋ na, a slikiɗ faw ng’amuŋ.

⁵⁹Ananiyas, Azariyas ati Mikayel, muvulaka vu taŋ da Buymisemuŋ na, a laham le avu irne ngi vu matiɓi njilim njilime.

⁶⁰Daniyele, naŋ migi gwat mikaslsla na, a lih le avi balam ngi moboroyo.

⁶¹Cinaka kuy kuy, vur dideˀ vur dideˀ gar na, mizli gar manjaham hiri asi Buymisemuŋ anta ŋhiŋhiyam ta.

⁶²Mbur migi mungra mamburukum huma na, ki zluwunam di ta, asi gi ɗongor naŋ a sa zĩˀĩ, dar mumuyuŋhoy a zumakaŋ.

⁶³Dana, a ra hunumakaŋ, amma tipirike, a lumaka mata, asi a tiri mereɓ le amuŋ yo gwat naŋ muɗuva taŋ ngi gi ngi gi na, a tiram le i ngataraŋ.

⁶⁴Ziri ɗuwoy, tiram gidaŋ gidaŋ, yo mburom mbor ɓa ngi cika vu ar ɓimujuwa ngi Buymisemuŋ, asi mike na, masa vulukum dudok ngi vu i naŋ.

⁶⁵Wurenna sona, Simeyoŋ, sukum kum ani, i sina le i mukuta vu mezle. Vur hin gar na, cinakaŋ mi, a sa tiri kaɓa cine kum.

⁶⁶Zudas mazilaka Makabe, naŋ gidaŋ zle ti gawla naŋ, a sa cifi i buy ngi soje kumoy, a sa ru ti kum nga gi vurum ati mizli mekelemey.

⁶⁷Kumo sona, mizli majaka ɓimujuwa a hirnga na, kusoko taŋ gun hirnga kum, yo pulaka cuwal ngi mizli kumoyo.

⁶⁸Mizli duniyahay mugukum malambaˀ le na, maka taŋ di, yo cinaka mi da ɓimujuwa vur hin gar.»

⁶⁹A ɗuwula taŋ mi, dar a mucu.

⁷⁰A muc ar vi miskat ti kukur mufaɗ nga merkeɗe. Dar ziri naŋhay a dikaka ar vigiɗ ngi mizli ngir hay ngi Modiŋhey. Israyeley gar a tuwuka vagay naŋ haɗa wãˀ.