Read South Giziga 1 Mak 3 Bible Online

1 Mak 3 - South Giziga bible

1 Mak 3

¹Mangal naŋ Zudas mazilaka Makabe, a cifi i madiɗa ar li ngi cine naŋ Matatiyasa.

²Sukum naŋhay gar ati mizli ngi si cine naŋhaya a jinam is aseˀe, yo a ciram hiri haɗa ngi kiɗa vu vur Israyeleye.

³Zudas a ga hã mizli naŋhay a zilam slimiɗ nga mbuŋ ava ma. Naŋ mika libiti ɓaˀ avu vu na, a tiri kaɓa mbur migila jeke. A hila gwat ngi vurum naŋhaya, dar a zla kiɗa vu. A laha hutuŋ ngi mizli naŋhaya ti maslalam naŋ.

⁴A ga gwat madiɗa naŋhaya kaɓa mobor, kaɓa gwat miŋsah mi matuwuy ng’ar gwat naŋ mawuɗ ngi ji.

⁵Mizli macinam mi da ɓimujuwa ta na, a sipa taŋ, joˀ a ɓula taŋ. Mizli magaka ngaˀa da mizli naŋhay na, a pa taŋ ng’ar vu.

⁶Mizli miteŋteŋ tahay a ngizlam kup asi a ra zluwunam di. Mizli gar macinam mi da ɓimuɗuva ta na, a sinaka ɓa a gam kini ta. Mbele Zudasa, mizli a ra laham ti jiviɗ naŋ.

⁷A ga hã buy madiɗa mekelemey a lumam bonoy. Gwat madiɗa naŋ maga taŋ a cira hiri le da ziri Israyeleye. Mizli a sa wulukam ar naŋ keŋ, a hunumaka Buymisemuŋ ti dimisi.

⁸A guno walahay Zudahaya kurzuˀ, a ngizla mizli misi moˀoreheye pay. A ga, hã Buymisemuŋ a pula ji mevel naŋ ar taŋ.

⁹Slimiɗ naŋ a zil hã asi ruwuy mikiɗ mi, yo a kuso mizli miziza ngi Israyeleye.

¹⁰Soje ngi mizli matuɓaka ɓi ngi Buymisemuŋ ta ati ngay ngi Samariheye, Apoloniyus a kuso taŋ ɓa a ra kiɗam vu ati Israyeley.

¹¹A faka ɓi naŋ da Zudasa, a bo nga zlir taŋ dibiɗ, a kiɗam vu, dar a kiɗa taŋ vagay vagay. Mizli a mucam sunok sunok, yo mizli milahahay a kilam.

¹²Zudehey a hilaka gwat taŋhay, Zudas a zuɓa maslalam ngi Apoloniyuso, dar a kiɗ di vu, hã ar hin ngi muc naŋ.

¹³Seroŋ, madiɗa ngi soje Seriheye a cina na, Zudas a kus mizli migi vurumoy le waɗ mizli miwam vu le ngi kiɗa vu.

¹⁴Dar a ɓi: «I wuɗ ɓa slimiɗ ɗu a zil, yo ɓa a ɗuvikiy hirnga asi ruwuyo. Zudas ati mizli ngi seˀehey mahirsaka mi ngi buy madiɗa miɓa na, sey i ra kiɗ vu ati taŋ.»

¹⁵Naŋ a ru ya so. Mizli misi moˀorehey haɗa a ram aseˀe. Taŋ a wuɗam ɓa a pulaka cuwal ngi mizli Israyeleye.

¹⁶Ti taŋ mandilam ng’ar li miɗingir ngi Bet-Horoŋ na, Zudas a bo nga zlir di dibiɗ, ti mizli njiraˀ aseˀe.

¹⁷Mizli ngi Zudasay mupuraka sojehey masoko ngi zlir ti taŋ dibiɗ na, a ɓaka Zudasa: «Ndra minjiraˀ kini na, i sa kiɗam vu ati mizli mihaɗa tayna mbri mbrike? Ani i giram le, yo may a ra ja ndra ma.»

¹⁸Zudas a mbiɗa taŋ di: «Ɓa mizli mihaɗa a mucam asi haŋ ngi mizli mi njiraˀ kini na, naŋ tuwaˀ ta. Ɓa ngi luma bugawla na, Buymisemuŋ a pur di i mizli mihaɗa malla mineˀ kini ta.

¹⁹Asi luma bugawla ar li kiɗa vu na, n’anta vur haɗa ngi sojehey ta, amma sey ti gidaŋ, Buymisemuŋ masa vula.

²⁰Mesene ndrahay a soko nga zlir dibiɗ ti ndra ti huhumo vu taŋ waɗ ti moˀore taŋ ɓa a ngizlam ndra, ndra vuna ati ngwas ndrahay, ziri ndrahay, yo ɓa a hilaka gwat ndrahaya.

²¹Amma ndra i kiɗam vu vur siifa ndrahay waɗ vur ɓimujuwa ndrahay.

²²Buymisemuŋ a sa muskuɗo taŋ a mbuŋ ndra. Kumo sona, ki zluwunam ti taŋ ta.»

²³Naŋ mikiɗa mi ngi ɓi sina, a ndilam gurjik ng’ar taŋ. Seroŋ ati soje naŋhay a ngizlam kuɗup a mbuŋ Zudasa.

²⁴A sipaka taŋ hã ar muzugudum ngi Bet-Heroŋ waɗ seŋseŋ ar li micay. Mizli mumucahaya, skat skat dangafaɗa. Mizli mekelemeye, taŋ a kilam ng’asi ruwuy ngi Filistihey.

²⁵Zudas ati sukum naŋhaya, a ra gaka zluwun da mizli mugun hirnga taŋhaya, hã jijikam.

²⁶Zila slimiɗ naŋ a ndil seŋseŋ avu Antiyokus buy madiɗa, yo walahayay gar a ra kiɗam slir ti kiɗa vu naŋhaya.

²⁷Ti Antiyokus buy madiɗa micina ɓi naŋ na, a ji mevel kaɓa ngi bi hirnga. Joˀ a ɓa mizli, a kusoko soje migidaŋ ngir li naŋ mazum buy ar taŋ cek, i soje migidaŋhay.

²⁸A wuna li pi zlili naŋ, joˀ a wurka soje naŋhaya ngi vi pal. Yo a ɓa taŋ ɓa a wam vu weˀ vur gwat mugurjikey gar.

²⁹A dirba nah, a pura na, dala anta ar li pi zlili naŋ mata, yo buutu mawurkaka ar li naŋ mazum buy ara, anta bo ti gwat haɗa ta, asi naŋ muzluɓ ɓi, yo naŋ muso ti mendere asi ruwuy, ti naŋ mususuyumo ɓimujuwa misi zle ngi set tuwa.

³⁰A sirik le zle ngi gi slra ti dala, yo ngi vula dala da mizli fineˀ buy mekelemey micifam dumbuŋ ar naŋ. Dar zluwun a gaŋ vur naŋ masa ga gu mata.

³¹Joˀ didak a muɗaŋ, a juwa a mevel naŋ, ɓa a ru nga Perse, a tuɓo buutu ar li naŋ mazum buy ara waɗ a tuɓo dala haɗa.

³²Slra naŋhay ngir li zuma buy ar wala ngi Efrat hã seŋseŋ ar makway ngi Ezipte, a vula taŋ da Liziyas mbur mupuɗaw, yo i muy ngi buy vuna.

³³Yo a vulaŋ slra ɓa dubuna gwat da mangal naŋ Antiyokuso, hã naŋ masa mawa.

³⁴A pulaŋ reta ngi soje naŋhay ati begene ngi kiɗa vuhoyo waɗ a ɓaŋ daˀ daˀ le vur gwat ngi gi da mizli Zudehey ati Zeruzalemeye.

³⁵Sey Liziyas a slin ti sojehey ngi kiɗa soje Israyeley ati mindiram neˀ ngi Zeruzalemeye, yo waɗ a susuyumo gwat taŋ mawulukaka keŋ asi ruwuy nana vuna.

³⁶Sey a cifi mizli mulakay ɓaˀ li, waɗ a vunka taŋ ruwuy taŋ.

³⁷Buy ati reta ngi sojeheye, a ram nga Antiyos, walahay hirnga ngir li zuma buy naŋ. Ar vi miskat ti kukur mufaɗ nga tarnaˀa, a cuh baɗ ti Efrata nga Antiyos, li zuma buy vay muŋ.

³⁸Dumbuŋ naŋ na, Liziyas a wini a wuzla ngama ngi buyoyo, mizli miwirwirey makir: i ti Ptolome, mangal ngi Dorimen, Nikanor waɗ Gorziyas.

³⁹A vula taŋ mizli durmuk mufaɗ waɗ mukukuro pilisey durmuk tarnaˀ ɓa a ram bummoˀ nga ruwuy Zuda, yo ɓa a ngizlaka taŋ kaɓa buy madiɗa miɓa.

⁴⁰Taŋ miram ati sojeheye gar na, a ndilam gweˀ a Emawus, dar a paka walahay guɗuk taŋ ar li micay ngi diga.

⁴¹Migi terere ngi digahaya micinaka slimiɗ naŋ mazil na, a wuɗam ɓiri hirnga waɗ ɓiri bara haɗa waɗ celeluhoy ma. Yo a ram ng’ar walahay guɗuko. A puraka na, kaɓa a sa lumam ziri Israyeley ngi hiɗik ng’ar beke kwani. Soje ngi Sirihey ati ngi ruwuy Filistihey a jumoko ng’avi taŋ.

⁴²Zudas ati sukum naŋhay a puraka na, mendere a ra giɗ ti gidaŋ, yo sojehey a ra pam ar li taŋ. Buy miɓi zleˀe ɓa a ngizlaka mizli wãˀ na, taŋ a cinaka le ya.

⁴³Dar a ɓam ar wala taŋ: «Mizli ndrahay masa ngizlam pay na, luhukum taŋ, yo kuɗukum vu vur taŋ waɗ vur hay Mipal ngi Buymisemuŋ.»

⁴⁴Joˀ mizli a kusom ɓa ngi ɗiya ɓi ngi vurum, ngi diradibiɗ waɗ ngi cufuɗa pura ircece ati gi mezle ngi Buymisemuŋ.

⁴⁵Zeruzalem a tiri le zleˀe kirɗak kaɓa li papala, asi mike na, ziri naŋhaya, ko maci anta, mabi anta. Hay ngi Bumbulvuŋ i mihirya le zleˀe, mulak a tuɓa li ngi ɗumo le. Misi moˀore a ra gi di nga naŋ. Ziri Israyeley a taˀaka ji salalaya le, hurum ngi bozloro ati ngi garayahay a taˀam le.

⁴⁶Israyeley a kusom, a ram nga Mispa, hiri dac ng’ar Zeruzalem, asi mike na, li diradibiɗ ngi ziri Israyeley ada a Mispa zleˀe.

⁴⁷Ngi hin nana, ko a zumam gwat ta, a kam zana ngi vagay, a kurom fucu da hirnga, a ngiraka zana taŋhaya.

⁴⁸A puskaka ɗerewol ngi ɓimujuwa ɓa a slufaka ɓi ngi mizli duniyahay mawuɗam ɓa kuli taŋhay a kutaka taŋ vurˀe vuna.

⁴⁹A soko ti zana ngi mijiviɗey, waɗ gwat micikiɗeffehey ati mukuruˀ ngi gwat taŋhay. A bugoko mizli nazirey mikiɗaka mi ngi hin ngi vula vu taŋ le.

⁵⁰A tumbuloko Bumbulvuŋ ˀay kaˀ a muŋ, a ɓam: «I sa gam mi ti mizli hanaynaka, yo i sa ram taŋ nga maka?

⁵¹Ani hay ɗik mipala , i mihirya le, yo naŋ dili. Migi mikuli ɗikey a roko ar vagay, yo i muvusohoy le.

⁵²Pura sukwi ngi mizli a kusom le ar ndra ɓa a ngizlam ndra. Gwat taŋ mawuɗam a gam ndra di na, ka, ki sina le.

⁵³Da ki kilo widi ndra ta na, i sa cikam vu avi taŋ mbri mbri sika?»

⁵⁴Dar a fam tulum, yo a wudam ti gidaŋ.

⁵⁵A dirba nah, Zudas a wini mizli ɓa a cifam madiɗa ngi mizli, madiɗa ngi mizli durmuk, ngi mizli skat, ngi mizli kukur zlum ati ngi mizli kuruˀu.

⁵⁶Mizli mira ndiraka hay taŋhay, malla mijam mangasl ti ji aruŋ, migam guva ngi gudubun ti gi aruŋ, malla mizli mira zluwunam na, a ɓa taŋ ɓa a mam nga hay taŋhay amuŋ kaɓa ɓimujuwa miɓa.

⁵⁷Sojehey a zuɓaka ru, joˀ a ra pam a Emawus tir vay ruwuy naŋ.

⁵⁸Dar Zudas a ɓa taŋ: «Juwam vu ti gwat ngi vurumoy, yo mburom mbor. Wam vu weˀ ɓa tipirike, sukwi ngi mizli mukusom ɓa a ngizlam ndra, yo ɓa a hiryaka hay ngi Buymisemuŋ ndra na, i sa ra kiɗam vu ati taŋ.

⁵⁹Asi ndra, ɓa i puraka sukwi ndra masi bonoy, yo mahiryaka hay ngi Buymisemuŋ ndra na, zuwen muc ar vurum.

⁶⁰Gwat Bumbulvuŋ mawuɗ na, a sa gi.»