Read South Giziga 1 Mak 4 Bible Online

1 Mak 4 - South Giziga bible

1 Mak 4

¹Gorziyas a hil soje misi saraya, mizli durmuk zlum waɗ mukukuro pilis mezle naŋhay durmuku. A bam ngi duvuɗ

²ɓa a ra cam gurjik ng’ar walahay guɗuk ngi soje Zudeheye, yo ɓa a lumam bugawla ar taŋ. Dar mizli Zeruzalemey ngir walahay muguno ti moholo a ki saka taŋ.

³Zudas micina na, a bam ati mizli musolok naŋhaya nga kiɗa soje ngi buyoy misi a Emawuso.

⁴Naɓa Gorziyas ati soje naŋhay a roko kileŋ avi walahay guɗuko aruŋ.

⁵Gorziyas ati mizli naŋhaya a ndiloko ar walahay guɗuko ngi Zudeheye ngi duvuɗu, a lum mbur ko pal ta. A purakaɓa Zudehey a ra kilam a mbuŋ taŋ, dar a sipa taŋ ng’ar muwãhay.

⁶Ngi mawun na, Zudas a boko ati mizli durmuk makir, amma ko gwat ngi vurum ati maslalamay anta avi taŋ kaɓa taŋ muwuɗam na ta.

⁷A puraka soje ngi mizli duniyahaya, taŋ ti libiti taŋhay, mukukuro pilisey gun hirnga taŋ. Waɗ mana, i mizli mislaka wala ngi kiɗa vu le, yo i mudubunaka gi vurumo le.

⁸Zudas a ɓa mizli naŋhaya: «Ki zluwunam ti mizli misikinih hanayna ta, yo da taŋ mizlam ndra le na, ko ki zluwunam ta.

⁹Dideˀ ndrahay milaham ar mubilih gagaza ti buy madiɗa ngi Ezipte ati soje naŋhay masipaka taŋ na, wulukaka keŋ.

¹⁰Wurenna, ndra tumbulukum Buymisemuŋ ɓa jiniˀis asi ndra. Anja naŋ mujum ˀay ati dideˀ ndrahay na, a wuluk keŋ ara, yo a muskuɗu soje hanayna a mbuŋ ndra.

¹¹Sukwi ngi mizli gar a sa sinaka n’ada cuko Israyeleye tir bonoyo yo n’ada laha taŋ.»

¹²Gurjik sina, mesene ngi Zudehey tuwa a puraka Zudehey a ra soko ng’ar taŋ,

¹³a boko tir guɗuk taŋhay nga kiɗa vu ati taŋ. Mizli ngi Zudasay a fam tulum,

¹⁴joˀ a zlaka kiɗa vu so. Mizli duniyahay a ngizlam kuɗup, waɗ mekelemey a kilam ng’ar li micay.

¹⁵Amma mizli ngi dirbahaya, a mucam pay ti kiɗ ti maslalam. Zudehey a sipaka taŋ hã seŋseŋ a Geser, seŋseŋ ar li micay ngi Idume, ngi Asdot waɗ ngi Zamniya. A kiɗam mizli a gi gwat ngi durmuk makir gu.

¹⁶Ti Zudas mimoko ati mizli naŋhay mumoko tir li sipi mesene tahay na, a ɓa mizli:

¹⁷«Ki hilaka gwat taŋhaya t’aruŋ, asi kiɗa vu mekelem ada kutuko ndra.

¹⁸Goziyas ati mizli naŋhaya t’ani daˀ avi ndra aka, ar muwã na. Wurenna, zliram didak ati mesene ndrahayan kiɗam vu ati taŋ. A dirba naŋ sona, ki sa hilaka gwat taŋhaya ti setette.»

¹⁹Zudas a kiɗa mi ngi mingiɓi naŋ vuna t’aruŋ, keɗ na, sojehey yõˀ, a ra jiɗaka gwat magi a ruwuyo.

²⁰A puraka na, mizli taŋhay a kilam le, yo walahay guɗuk taŋ a ra wur. Cunju mseŋwwe tuwa a buga taŋ di le njah wãˀ.

²¹Taŋ mupurakakanah na, zluwun a ga taŋ haɗa. A puraka mana, soje ngi Zudasay a roko ar li micaya, weˀ weˀ vu le ngi kiɗa vu.

²²Dar a kilam cek ng’ar walahay ngi Filistihey.

²³Ti Zudas a moko ng’ar walahay guɗuko so. A hilaka gwataya pay. A hilam ɓiri tapasl tapasl, ɓiri bara miliɗeɗe, zana mindezze wit witi, waɗ zana gagaza cuhho. A hilaka taŋ haɗa. A hilaka zlili taŋhaya le ma.

²⁴A moko bal ti hunuma Buymisemuŋ, waɗ ti ɗuwulaŋ mi, asi naŋ kuy, yo wuɗa vu naŋ anta kiɗ mi ta.

²⁵Hin nana, i hin ngi laha vu madiɗa avi Israyeleye.

²⁶Mizli mulakay lilahahay a soko faka ɓi ngi gwatay migam na cek da Lisiyasa.

²⁷Naŋ micina ɓi nah na, a mbuɗaŋ hirnga, a funaŋ gidaŋ le, asi mike na, gwatay a cohom avi Israyeleye kaɓa taŋ muwuɗama ta. Yo kiɗa mi naŋ a mbiɗi pal ar mi ngi buy mi ˀa daˀ le tuwa.

²⁸Ar vi mekelem mumbuɗu na, Liziyas a kus mizli durmuk kukur merkeɗ waɗ mukukuro pilisey durmuk zlum ngi kiɗa Zudehey.

²⁹Aram nga Idume, a paka walahay guɗuko a Bet-Sur. Zudas ati mizli durmuk kuruˀ a ram ɓa a ra zliram taŋ.

³⁰Naŋ mupura soje migidaŋ tayna, joˀ a dir dibiɗ kahana: «Milaha Israyeley, sise ngi ɗiki. I ka vuna ti haŋ ɗik milaha gawla ɗik Davit ar vurumo. Yo i ka vuna ti haŋ ɗik mupula walahay guɗuk ngi Filistihey a si haŋ ngi Zonataŋ, mangal ngi Sawulo. I gawla naŋ magaŋ slra, yo majijiraŋ gwat ngi vurumoy.

³¹Pula soje, mesene ndra Hanayna a mucam asi haŋ ngi Israyel mizli ɗikey. Anja a pam mesem jom ti mizli taŋhay mitiɓi lihey waɗ mukukuro pilis taŋhaya.

³²Ga ɓa a zluwunam, vula vu taŋ da gidaŋ taŋ na, anja a kiɗi. Yo anja a jijikam asi taŋ mapuraka taŋ masa lumam bugawla ta na.

³³Ga ɓa a mucam ti kiɗ ti maslalam ngi mizli mawuɗukuw na. Joˀ mizli misinaka slimiɗ ɗike le na, a sa hunumukuw ti dimisi.»

³⁴Kiɗa vu a zli, dar a jam mbur ti ka a jam ti ka. Soje ngi Lisiyasay a mucam gweˀ ng’avi mizli durmuk zlum.

³⁵Soje naŋhay makilam, yo ngi Zudasay micicam gidaŋ gidaŋ na, Lisiyas a pura le. Waɗ mana, soje ngi Zudasay a vulaka vu taŋ le da i ngi lih malla ngi muc kwana, ti mburo vu ma. Dar Lisiyas a kil nga Antiyos, a hilo soje mulakay hiɗim hiɗim ngi tuɓa walahay Zude na si.

³⁶Zudas ati sukum naŋhay a ɓam: «Wurenna, mesene ndrahay a mucam le, akum nga Zeruzalem ɓa i ra zuɓaka dili ngir hay ngi Buymisemuŋ avra, yo ɓa i vulaka da Buymisemuŋ hiri naŋ amuŋ.»

³⁷Sojehey a kusom cek, yo a jiɗam nga muwã Siyoŋ.

³⁸A puraka na, hay ngi Buymisemuŋ i miwaha le, li ngi gi mikuli i mihirya le, miviŋhey i muwurahay le. Kalaf memeɗehey a gilam le a mamayakaɓa awuzla vidisey malla a hirnga muwã. Yo hayay i mumbuzlahay le ma.

³⁹A ngiraka zana taŋhaya, dar a tuwam vagay waɗ a kuroko fucu da hirnga taŋhaya.

⁴⁰A hurukom midibiɗ durus da ruwuy, yo da a faka tulumo le na, a wudam curuw curuw ngi tumbulo Buymisemuŋ.

⁴¹A dirba naŋ, Zudas a ɓa soje naŋ mekelemeye ɓa a kiɗaka mizli misi ar li dumoyo. Naŋ, a ra zuɓa dili ngir hay ngi Buymisemuŋ.

⁴²Waɗ a wini masay manja dilihey, yo muvulaka vu taŋ le wãˀ da ɓimujuwa ngi Moyisi.

⁴³A zuɓaka dili ngir hay ngi Buymisemuŋ, waɗ a zuɓaka ɗugur misi dili, a rakaka ar li misi dili.

⁴⁴Li ngi gi mikuli, mizli duniyahay mihiryaka na, a sinaka a gam di kini ta.

⁴⁵A sa lumam wuluk mezle ngi wuh naŋ avra, vur hiryi nana masapa taŋ mesem, asi mike mizli duniyahay a hiryaka le. A wahaka avra

⁴⁶waɗ a paka ɗugur naŋhaya ng’ar li naŋ mikaslsla, a hirnga li miɗingir ngi hay ngi Buymisemuŋ, sey da mijiviɗ ngi Buymisemuŋ misa ɓi ɓi le ar taŋ far.

⁴⁷A zuɓam ɗugur manja ciɗey, joˀ a ndiram li gi mikuli mekelem mibam vu ati magala vuna kaɓa ɓimujuwa miɓa.

⁴⁸A ndiraka hay ngi Buymisemuŋ, a ɗiyaka huroˀo naŋ, waɗ a zuɓaka dili ngi mamayaya ma.

⁴⁹A ɗiyam gazlanga mekelem mipalay, yo gwat ngi ɗuva lampe, li wura urdihey ati tabul ngi pi peŋ muvula da Buymisemuŋhoyo a cam taŋ nga hur hay ngi Buymisemuŋ.

⁵⁰A wuram urdi ar li ngi gi mikuli, a bulam lampehey ar li ɗuv taŋhaya ɓa a wucuɗam ar hay ngi Buymisemuŋ.

⁵¹A ɗuvaka peŋhey ar tabulo, a sirtaka godo ngi miviŋ, joˀ a kiɗaka mi ngi gwat taŋ mizlaka gi naŋ.

⁵²Ngi vi skat ti kukur mufaɗ nga dangafaɗ, ar hin mukukur cuw nga zlum naŋ, ngi kiya midangafaɗ naŋ mazilaka kiya Kislew na, Zudehey a slikiɗam ngi li.

⁵³A gam mikuli ar li ngi gi mikuli nawaya, taŋ mindiraka tuwa, kaɓa ɓimujuwa ngi Moyis miɓa.

⁵⁴Ar hin purla ngi vi, hin ngi mizli matuɓam Buymisemuŋ tahay mihiryaka li ngi gi mikuli magala na, a vulaka li gi mikuli nawaya da Buymisemuŋ ti kiɗa ŋkaku ati garayahay.

⁵⁵Mizli gar a diɗam midibiɗ durus da ruwuy ngi gi dudok da Buymisemuŋ, dar a hunumaka Buymisemuŋ miki sa taŋ ngi luma bugawla na.

⁵⁶A gaka muguzlum ngi vula li gi mikuli da Buymisemuŋ hã hin dangafaɗa. Yo mikuli mizlam zlam wãˀ, mikuli ngi ngiɓiˀay ati ngi gi dudok da Buymisemuŋ, a vulaka taŋ ti mumul.

⁵⁷A gaka wuya da mihiri ngi hay ngi Buymisemuŋ ti durum mipa ti ɓiri ˀor, ati zanahay. Yo a mizlingrehey ati hayaya, a gaka taŋ nawayahay, waɗ a caka taŋ miviŋhey.

⁵⁸Hiri a cira mizli haɗi teˀe. Mesem maga taŋ vur mizli duniyahay tuwa a susuyum le.

⁵⁹Zudas ati sukum naŋhay waɗ mizli gar a ɓam ɓa a sa gaka muguzlum ngi vula li ngi gi mikuli da Buymisemuŋ, ti mumul, ti ji salalay, vur vi gar, hã hin dangafaɗ, zle avi hin kukur cuw nga zlum ngi kiya Keslew.

⁶⁰Ti hin nana, a ndiram mohol migila subur, waɗ hay musubur migidaŋhay gun hirnga ngi muwã Siyoŋ, vur mizli duniyahay macoko ng’ar li tayna ava ma.

⁶¹Zudas a pi sojehey sek ngi jigin naŋ. A guno walahay Bet-Suro ti mihol ɓa mizli a lumam walahay muguno ti mohol, hiri dac ng’ar walahay Idume.