Read South Giziga 1 Mak 5 Bible Online

1 Mak 5 - South Giziga bible

1 Mak 5

¹Zudeheye, sukwi ngi mizli mugun hirnga taŋhay micinaka a ndiraka li ngi gi mikuli le amuŋ, yo a ɗiyaka hay ngi Buymisemuŋ le kaɓa misi zleˀe amuŋ na,

²mevel a ja taŋ haɗa, joˀ a juwaka a mevel taŋ ɓa a ngizlaka dideˀ ngi Zakopoy misi a wuzla taŋ na pay. Dar a kiɗaka taŋ, a susuyumoko ti wuzla mizli.

³Mizli Idumehey a gunoko Israyeleye le zleˀe. Zudas a ra kiɗa taŋ a Akrabateŋ, dar a a kiɗ mizli haɗi. A ɓula taŋ, waɗ a hila gwat taŋhaya ma.

⁴A dirba nah, a wuluk keŋ ar moˀore ngi muy ngi Bayahay magaka, kaɓa ani: a pam hiri ɗum a jiviɗ vur ziri Israyeleye, waɗ a pam mazaɓa.

⁵Zudas a ɓula taŋ ng’ar walahay taŋ muguno ti muholoyo, yo a tuɓa walahaya. A hudum ngi ngizl taŋ ngirnin wãˀ, joˀ a wura hay taŋ muguno ti moholo jom ti mizli ngi raˀhaya.

⁶Waɗ mana, a ru ng’avi ziri Amoŋhoy. Adiga, a zlir ti migi vurum migidaŋhay, yo taŋ haɗa ma. Timote i madiɗa taŋ.

⁷A kiɗam vu ati taŋ sar mbeˀ mbeˀ, a kiɗa taŋ waɗ a muskuɗu taŋ tur.

⁸A tuɓa walahay Yazer ati li mugun hirnga taŋhaya. Dar a mo nga Zude amuŋ.

⁹Sukwi Galaˀatay a jumom nga kiɗa ziri Israyeley micifam asi ruwuy taŋ, ɓa a susuymoko taŋ avra. Amma Israyeley a ra ɗumom ar walahay muguno ti mohol, a Datema.

¹⁰Dar Israyeley a slinoko ti letir ani da Zudas ati sukum naŋhaya: «Mizli duniyahay a jumom le ng’ar ndra ɓa a ngizlam ndra.

¹¹Migi vurum taŋhaya, madiɗa taŋ i Timote, ani a ra juwam vu ɓa a sa tuɓaka walahay muguno ti mohol, ndra muɗumom ara vuna.

¹²Soko tuɓam ndra, asi mizli haɗa awuzla ndra i mikiɗahay le.

¹³Sukum ndra Zudehey misi asi ruwuy ngi Tobi, a mucam le ceke. A jaka ngwas taŋhay ati ziri taŋhaya le ng’ar beke, yo a hilaka gwat taŋhaya le.

¹⁴Zudas ati sukum naŋhay a ra slufaka letir tuwa aruŋ, mijiviɗ mekelemey a ndiloko ɓuyoh ti Galile, zanahay ngar ngar, a soko di i mingiɓi misi purla.

¹⁵Mingiɓi taŋ n’ani: «Mizli duniyahay, a jumom le ɓa a ngizlam ndra, i mizli ngi ruwuy Ptolemays, ngi ruwuy Tir, ngi Sidoŋ waɗ mizli mulak ngi Galileheye ma.»

¹⁶Ti Zudas ati mizli naŋhay mislaka wala ngi mingiɓi hanayna na, kusom mizli haɗa. Aram nga jiniˀis asi sukum taŋhay masam bonoy, mizli duniyahay mizlaka taŋ na.

¹⁷Zudas a ɓa sukum naŋ Simoŋ na: «Wini mizli ɓa ki ra lohoko sukum ndrahay misi a Galile na. Ya ati sukum ɗu Zonataŋ, i sa ram nga ruwuy Galaˀata.»

¹⁸Zozef, mangal ngi Zakari, ati Azariya madiɗa ngi mizli vuna, waɗ mindir is ngi sojehey a ndiram asi ruwuy Zude ɓa ngi jigina li.

¹⁹A ɓa taŋ daˀ daˀ ani: «Waka ruwuyo amma mizli duniyahay na, ki gam vurum ati taŋ ta, hã ndra masa moko.»

²⁰Mizli durmuk makir a ram ati Simoŋ nga Galile, yo mizli durmuk dangafaɗ a ram ati Zudas nga Galaˀata.

²¹Taŋ mindilam a Galile na, Simoŋ a kiɗ vu is mbeˀ mbeˀ ati mizli duniyahaya. A kiɗa taŋ joˀ mekelemey a kilam.

²²A sipa taŋ seŋseŋ a mizlingre ngi walahay Ptolemays. A kiɗ mizli duniyahaya, durmuk makir, yo a hila gwat ngi vurum taŋhaya.

²³Zudehey misi a Galile waɗ a Arbata, Simoŋ a kuso taŋ jom ti ngwas taŋhay, ti ziri taŋhay waɗ gwat ngi lum taŋhaya. Dar a so taŋ nga Zude ti zluzluɓu.

²⁴Zudas mazilaka Makabe ati sukum naŋ Zonataŋ, a tuwuɗaka mizaw Zurdeŋ, yo a gam hin makir ar li ru ar li papala.

²⁵A zliram ti mizli Nabatehey, Nabatehey a tuɓaka taŋ ti mumul, a slufaka taŋ ɓi ngi gwat migi avi taŋ ti taŋ mindilam a Galile na cek.

²⁶Waɗ a ɓaka taŋ, Israyeley misi a Bosor ati Bosor, Alema, Sasfo, Maket, waɗ karnayim na, mizli a roko ɗum ɗum, a ra jiɗaka taŋ. Walahay tayna, i mugunohoy ti mohol makini.

²⁷Mizli mekelemey ada mije ar dangay ar walahay ngi ruwuy Galaˀata ma. A ɓaka taŋ mana, mesene taŋhay a juwaka a mevel taŋ ɓa li masa wuno, a soko gurjik ng’ar walahay muguno ti mohol vuna ma. A tuɓaka taŋ, a ngizlaka mizli misi ar taŋhaya gar ar hin purla si.

²⁸A hahãŋ sina, Zudas ati migi vurum naŋhay a mbiɗaka jiviɗe, a ram nga Bosoro tir jiviɗ ngir li papala tuwa. A tuɓaka walahaya, yo a kiɗaka mizli mizileheye pay ti maslalam. A tuɓaka gwat taŋhaya waɗ a wuraka walahaya.

²⁹A mam ngi duvuɗu, yo a ram hã seŋseŋ a ciki walahay muguno ti mohol ngi Zudehey misi a Datema.

³⁰Li muwun na, a puraka mizli hiɗim hiɗim, ko a slufam ta. A ra sosoloy ati masin ngi vurum ɓa a tuɓaka walahaya. Vurumo a zli le si.

³¹Zudas a pura na, vurum a zli le, yo mi muwuwwo, ˀay ngi tulum, ati widi ngi vurum mabo tir walahaya a cin seŋseŋ a muŋ.

³²Joˀ Zudas a ɓa mizli migi vurum naŋhaya: «Dana, kum kiɗam vu ngi laha sukum ndrahaya.»

³³A wuɗka migi vurum naŋhaya taˀ taˀ makir, dar a sa zliram ati mesene taŋhaya ti dirba. A fam tulum waɗ a diraka dibiɗe ˀay ngar ngar.

³⁴Migi vurum ngi Timotehey misinaka i Zudas mazilaka Makabe masoko sina, a kilam. Zudas a kiɗa taŋ haɗa wãˀ. Ti hin nana, mizli a mumucam ar li kiɗa vu durmuk dangafaɗ.

³⁵A dirba nah, Zudas a mbiɗa soje naŋhaya pulaˀ ng’ar walahay Alema, a tuɓa, a kiɗa mizli mizileheye, a tuɓa gwat taŋhaya, waɗ a wura walahaya.

³⁶A ru baɗ ti keŋ, a ra tuɓa walahay Sasfo, Maket, Bosor ati walahay mekelemey ngi Galaˀata.

³⁷A dirba gwat tayna migam na, Timote a kus migi vurum mekelemey, a cicam hiri dac ar walahay Rafoŋ. Ti duba yam mapo sar ti muwã na.

³⁸Zudas a slin mizli ɓa a ra jiɗaka walahay guɗuko, joˀ a sa sakaŋ ti mingiɓi ani: «Sukwi ngi mizli gar mugun hirnga ndra na, a kusom le, taŋ i migi vurum mihaɗahay. Madiɗa taŋ i Timote.

³⁹A hilam Arapay le ngi jini taŋ, ɓa a sa wurkaka taŋ. Ani a pam le ti duba mizaw mekelem, taŋ gweˀ ɓa a sa zlukuw ngi kiɗa vu.» Zudas a kil nga zlir ti taŋ.

⁴⁰Dar a kirohoko nga miyama ati migi vurum naŋhaya. Timote a ɓa madiɗa ngi migi vurum naŋhaya: «Da Zudas a tuwuɗo le dumbuŋ na, naɓa ndr’anta sa cicam zlak a mbuŋ naŋ gu ta, a sa lum bugawla ar ndra.

⁴¹Amma da zluwun a gaŋ le, a cici le ti duba mizaw ti diga na, ndr’i sa tuwuɗam, i sa lumam bugawla ar naŋ.»

⁴²Ti Zudas mindiloko a mi yam na, a cica madiɗa ngi mizli deŋ deŋ silaɓɓa a mi mizawa, waɗ a ɓa taŋ: «Ki pulam mbur a cici pal le ta, amma anja i ram cek nga kiɗa vu.»

⁴³Zudas a tuwuɗa mizawa ngavi mesene naŋhaya dumbuŋ, mizli naŋhaya a sek aseˀe, dar a ram nga kiɗa vu

⁴⁴Mizli ngisi Zudahay a tuɓaka walahaya ɗagay, yo a wuraka hay ngi Buymisemuŋ jom ti mizli ngi raˀahaya. A ngizlaka ruwuy Karnayime kuɗup, zle tapasa, mizli anta lumam bugawla a mbuŋ Zudahaya mata.

⁴⁵A dirba nah, Zudas a kuso mizli Israyeleye cek a ruwuy Galaˀat. A ru taŋ hiɗim hiɗim nga ruwuy Zude. A hila taŋ jom ti ziri ati ngwasay waɗ zlili taŋhaya.

⁴⁶A ndilam a Efroŋ, walahay mupuɗaw, yo i migidaŋ ma. I walahay mipa a jiviɗi. Israyeley a cohom ti hazum gu ta, ti gula gu ta, sey a ngiraka walahaya na si.

⁴⁷Mizli ngir walahaya a tikaka taŋ ngi cuho, yo a dislaka mizlingre ngi ci ng’ar walahaya ti ɗuguroy gizl gizl.

⁴⁸Zudas a slina taŋ mingiɓi ngi cifi zuy ani: «I wuɗam i ngiraka walahay kumo ɓa i cohom ng’ar walahay ndra. Ko mbur masa gukum malambaˀ anta, ndr’i cohom ti cuh si.» Amma mizli a ngumom wunaka miviŋheye ta.

⁴⁹Zudas a ɓa mizli migi vurum naŋhaya ɓa mbur gar a wi vu daˀ ar li naŋ mideŋ anga.

⁵⁰Sojehey a juwam vu, joˀ a zlaka kiɗa vu. A kiɗam vu hiipas ti duvuɗ naŋ wãˀ a dirba naŋ a tuɓaka walahaya.

⁵¹A kiɗaka mizli mizileheye pay ti maslalam, a mbuzlaka walahaya ngurof ngurof. Mizli Israyeley a ngiraka walahaya, a cohom bir ar vagay ngi mizli mikiɗahay tuwa.

⁵²A tuwuɗaka mizaw Zurdeŋ, a ndiloko ar Li Madiɗa Micay, hiri dac ar Bet-Seyaŋ.

⁵³Zudas a ru ani, a mawa ani, ngi kuso mizli maram gu tahay na. Yo a ra vula taŋ gidaŋ bal a jiviɗe hã seŋseŋ a ruwuy Zude.

⁵⁴A jiɗam ng’ar li miɗigir ngi Siyoŋ ti mumul waɗ ti zlulzuɓu. A gam mikuli ti ginew zlam zlam da Buymisemuŋ, asi mike na, a moko le ti zuy manja mbur ngi si taŋ a mucu.

⁵⁵Ar hin, Zudas ati Zonataŋ miroko ar walahay Galaˀat, yo sukum naŋ Simeyoŋ miro a ruwuy Galile, a mbuŋ Ptolemays aruŋ sina,

⁵⁶Zozef, mangal ngi Zakari ati Azariya, madiɗa ngi sojehey, a cinaka taŋ mulumam bugawla ar li kiɗa vu na le.

⁵⁷Dar a ɓam ar wala taŋ: «Gukum gwat ɓa slimiɗ ndra a zil vuna ya. Yo akum, i ra kiɗam vu ati walahay mugun hirnga ndrahay na.»

⁵⁸A tikaka ˀay da mizli taŋ miwaka taŋ na, dar a ram ɓa a zlaka Zamniya ngi kiɗa vu.

⁵⁹Gorziyas a boko ati mizli naŋhay tir walahaya nga kiɗa vu.

⁶⁰A gidiɗaka mizli ngi Zozef ati ngi Azariya. A sipaka taŋ hã seŋseŋ ar makway ngi Zudehey. Ti hin nah, a kiɗam asi Israyeleye, gwat ngi mizli durmuk cuw.

⁶¹A kiɗam asi mizli Israyeleye haɗa, asi mike na, Zozef ati Azariya a cinaka mi da ti Zudas ati sukum naŋhaya ta. Taŋ a wulukam kaɓa a sa gam gwat mimezlehey vuna ya zleˀe.

⁶²Amma, sukwi ngi mizli Buymisemuŋ cifa taŋ ngi laha Israyeley na, taŋ asi taŋ ta.

⁶³Zudas, mbur migidaŋ waɗ sukum naŋhaya, mizli a puraka taŋ kaɓa buyoy. Yo ar sukwi ngi mizli gar na, a zilam di i slimiɗ taŋ na si.

⁶⁴Mizli a soko hoyo hoyo gun hirnga taŋ ɓa ngi ga taŋ sise.

⁶⁵Zudas ati sukum naŋhay a ram nga gi vurum ati ziri ngi Ezaway kini ng’ar vay ruwuy. A tuɓaka walahay Hebroŋ jom ti ruwuy naŋ miwa taŋ ceke. A wahaka makwayaya waɗ a wuraka mohol mugun hirnga walahaya.

⁶⁶Joˀ a zuɓaka jiviɗe kini ng’ar ruwuy ngi Filistihey. A tuwuɗaka walahay Marisa.

⁶⁷Ti hin nana, masayhay mawuɗam a gam kaɓa migidaŋhaya, a ram ng’ar vurumo ti ɓi ngi kuw na, a kiɗaka taŋ le ar vurum nah vuna sunok sunok.

⁶⁸A dirba nah, Zudas a mbiɗi kini nga Asdot, walahay ngi Filistihey. A putukusoko li gi mikuli taŋhaya, a wuraka kuli ɓamtal taŋhaya, a hilaka gwat ngir walahaya, dar a moko nga ruwuy Zude amuŋ.