Read South Giziga 1 Mak 6 Bible Online

1 Mak 6 - South Giziga bible

1 Mak 6

¹Ti Antiyokus mabula li zuma buy vay muŋhoyo, a cina na, a ruwuy Perse, walahay mekelem ada a zilaka Elimayis. Ar walahay nah, ɓiri bara ati ngi ɓiri hirnga ada haɗi hã a zil slimiɗ teˀe ti naŋ.

²Hay ngi Bumbulvuŋ ngi diga, zlili ara haɗa, gwat ngi ɓiri hirnga ara haɗa, libitihey ati gwat ngi vurumoy, i Alekzandir, mangal ngi Filip mupula taŋ, Alekzandir i buy ngi ruwuy Masedowan, i naŋ muzum buy dumbuŋ ar Grekeye.

³Antiyokus a ru nga Elimayis ɓa a tuɓa, amma ko a tuɓa gu ta. Asi mike na, mizli ngir walahaya a cinaka ɓi ngi gwat, buy mujuwa a mevel naŋ ngi gi le.

⁴A zliram didak ati naŋ, joˀ a tikakaŋ ˀay ɓa a kiɗakaŋ. A kil ti diga ti mevel, dar a mi nga Babiloŋ amuŋ.

⁵Akẽh, mbur a kilo nga Perse, a ɓaŋ, mizli miram nga asi ruwuy Zuda tuwa, a kiɗaka taŋ le.

⁶Liziyas a ru le ng’adiga ti sojehey haɗa, amma mizli Zudahay a kiɗaka taŋ le. A dirba Zudahay mufunaka migi vurum ngi buyoy ti gidaŋ na, a tuɓaka gwat ngi vurum taŋhaya, ati gwat mekelemey haɗa ma. Gwat tayna, a sika gidaŋ taŋ ava ma.

⁷Gwat mukuyta wãˀ, Antiyokus mindira ar hay ngi Buymisemuŋ a Zeruzalem tuwa, a mbizlaka le avra, yo li taŋ mipala, a gunoko le ti mohol migila musuburoy, waɗ Bet-Sur, walahay ngi buyo kanah ma.

⁸Ti Antiyokus micina ɓi naŋ cin na, didak a muɗaŋ, a gaŋ welele, hã akaŋ jiji ɓaˀ. Jiji a kiɗaŋ vu tay tay, asi gwatay a cohom kaɓa naŋ muwuɗ mata.

⁹A ndir kupuyah adiga hin mbeˀ mbeˀe. Naŋ mupura a ra wuɗ a sa muc na,

¹⁰a kuso ngama naŋhaya, joˀ a ɓa taŋ: «Y’anta hinje gu ta, yo i ra lik haɗa ma.

¹¹I wuluk ti kwacay ɗu, i ɓi na, i ci ng’ar lik mandiy yik kaɓa mekepel hana vuna ngi gi mike? Asi ti ya migidaŋ zleˀe na, i ra mumul, yo mizli a ra wiɗikiy ma.

¹²Ani wurenna, gwat malambaˀhay ya miga taŋ a Zeruzalem na, i ra wuluka taŋ. Gwat mipa ti ɓiri hirnga waɗ ti ɓiri barahay gar, misi adiga na, yi hila taŋ le, yo i slin le ɓa a ra ngizlaka mizli Zudahaya manja a gam gwata si.

¹³Yi sina le muduba, bonoy malumiy hana na vurˀe, yo i ra muc ti muɗa didak asi ruwuy mulak ani.»

¹⁴A zilo ngama a naŋ Filipi, joˀ a cifaŋ i buy ar li naŋ miwa gar.

¹⁵A vulaŋ loppol naŋ, jibe naŋ ati gwat ngi ɗuva haŋ naŋhaya ma. Waɗ a cifaŋ ɓa a ja haŋ ngi mangal naŋ Antiyokuso ma, yo ɓa a gila ngi sa zuma li naŋ tumbuŋ.

¹⁶Buy Antiyokuso a muc a Perse adiga, ar vi Miskat ti kukur mufaɗ nga ngoltir naŋ.

¹⁷Ti Liziyas micina ɓi ngi muc naŋ na, a cifa mangal gawla Antiyokuso, i buy ar li naŋ. A gila zle ti zuŋ, joˀ a caŋ slimiɗ mekelem, a zila Epator.

¹⁸Ti hin nana, mizli mulakay misi a Zeruzalem, walahay muguno ti mohol na, a tikaka Israyeleye ɓa a laˀam ar li ngi gi mikuli pusak vu ta. Ar gwat taŋ migaka le gar na, mizli mulakay na, a wuɗam a gaka taŋ malambaˀ na si, yo ɓa mizli duniyahay a sikam.

¹⁹Zudas mazilaka Makabe a juwa le a mevel naŋ, ɓa a ngizla taŋ kuɗup wãˀ. A zilo mizli cek ɓa a tuɓaka walahaya.

²⁰Mizli Israyeley a kusom, joˀ a tuɓaka walahay muguno ti moholo ar vi miskat ti kukur zlum naŋ. A ndiram masin ngi mula vu ti ɗugur, waɗ masin ngi mbizla hayaya ma.

²¹Amma mesene taŋhay, taŋ muguno taŋ gun tuwa, mekelemey a laham le gu, jom ati Israyel mekelem mizirɗa mihey.

²²Aram nga hay buy Antiyokuso, a ɓakaŋ na: «Ɓa ngi ga bonoy da mesene ndrahay, yo ɓa ngi laha sukum ndrahay na, ki sa kutuk hã ti vunaka?

²³Ndra, ndr’i zilam mi le zleˀe ngi gi slra da bunuko, i gaka gwata kaslsla kaɓa ɓi naŋ miɓa le, yo i cinaka mi da ɓi majuwa naŋhaya ma.

²⁴Vurˀe, mizli ndra misi asi ruwuy purla, a puram ndra kaɓa mesene taŋhay. wãˀ naŋ mana, mizli ngi si ndrahay taŋ malumaka taŋ gu na, a kiɗaka taŋ le, yo a hilaka gwat ndrahaya le.

²⁵Taŋ muguzuvuram vuna, i ndra pal ta, amma a zlaka midigwi ɗikeye le ya.

²⁶Wurenna, a ra ndahaka li ngi ɗum misi a Zeruzaleme, ɓa a tiram madiɗa ngi digahay, waɗ mana, hay ngi Buymisemuŋ ati walahay Bet-Suro, a gunoko taŋ le ti mohol.

²⁷Da ki ci ar ɓi naŋ wurenna ta na, a sa gam gwat mufineˀ hana, hã ki sa ja taŋ gu mata.»

²⁸Ti buy Antiyokus micina na, a zuɓ himaˀ, yo a kuso ngama naŋhaya cek, madiɗa ngi sojehey ati madiɗa ngi mukukuro piliseye.

²⁹Mizli migi slra ngi dalahay a soko tir li zuma buy ngi cikihey waɗ tir maturahay gar ma.

³⁰Migi vurum naŋhaya, a gam gwat ngi soje misi saray durmuk skat, misi pilisey durmuk kukur cuw, waɗ misi begene ngi vurumoy kukur makir nga cuw.

³¹Buy ati mizli naŋhaya a cohom baɗ a Idume, yo a ndahaka Bet-Suro, dar a kiɗam vu adiga hin mbeˀ mbeˀe. A ɗiyam gwat ngi vurumoy le, amma mizli taŋ mindahaka taŋ tuwa, a ɗiyam li bi, dar a ɗuvaka vu da masinaya, joˀ a kiɗam vu kaɓa mizli migidaŋhay.

³²Akẽh, Zudas a bi tir li dum ngi Zeruzaleme, dar a cifi ti mizli naŋhaya a Bet-Zakariya, hiri taˀ ar walahay guɗuk ngi buy.

³³Ngi miprik, li naŋ muwun na, Buy a cuh ti migi vurum naŋhaya kutum kutum, tir jiviɗ maru nga Bet-Zakariya na. Mizli a cinjaham ngi kiɗa vu, joˀ a fam zara.

³⁴A vulaka mbazla ngi gudubun lahaɗ ti yam ngi yi ngi widis mazilaka mure, da begeneheye, ɓa a ga taŋ kiɗa vu kiɗa vu.

³⁵A wuɗkaka taŋ da soje misi saray. Avi begene gar na, a cicam mizli durmuku. A juwaka vu kaˀ kaˀ ti libiti ngi ɓiri, yo gandaf ngi ɓiri gaza tiɗeˀ teɗeˀ a hirnga. Waɗ mana, mizli misirka hĩˀĩ ngi mukukuro pilisey skat skat zlum sesek asi begene gara ma.

³⁶Taŋ a cicam ar li begene micici le deŋ ara gar, da a ra ru na, taŋ a sipakaŋ, ko a kiraham kileŋ ava ta wãˀ.

³⁷A duba begene gar na, dum ada cahal cahal gunno, mujuwa kaˀkaˀ ti zeweɗe, ɓa ngi ɗum. A hur dum micihila a duba begene gar na, sojehey ada makir makir ngi kiɗa vu waɗ mukukuro begene vuna.

³⁸Buy a cinjaha is ngi misi piliseye a ciki sojeheye tika tika, ɓa a zlaka Zudahay ngi kiɗa vu, yo a ra jiginaka misi saraya cicima.

³⁹Pas mawuciɗa mbaray ngi ɓiri hirngahay ati ngi ɓiri gazahay na, taŋ kwana, a wucuɗaka muwãhay aya, dar muwãhay a wucuɗam kaɓa irne vu.

⁴⁰Migi vurum ngi buyoyo, a cicam ngi kiɗa vu, mekelemeye sek a hirnga muwã, numuŋhoyo kwana dedeŋ a ruwuy. A kiraham manja zluwun, yo ti sila ti sila.

⁴¹Mizli maram hiɗim hiɗim na, a ra gam mi wuwwo, yo gwat ngi vurumoy mazliram ar wala taŋ, a ra hurmom. Mizli macinaka na, a jijikam ngbaˀ ngbaˀ. Migi vurum tayna, taŋ haɗa, yo taŋ gidaŋ gisiŋ.

⁴²Zudas ati migi vurum naŋhay a kiraham nga kiɗa vu so. A kiɗam mizli skat skat merkeɗ awuzla soje ngi buyoyo.

⁴³Elazar mazilaka Avaraŋ a pura na, begene ada pal, ɗum ti gwat ngi vurum ngi buyoy, a muzlumbur le fineˀ mekelemeye. Naŋ a pura kaɓa buyo n’ada joˀ ara zleˀe.

⁴⁴Joˀ a wuluk ɓa a vula vu naŋ ngi laha mizli naŋhaya, yo ɓa slimiɗ naŋ zil ko teˀ le ta.

⁴⁵A kil ti wuzla soje misi saraya, jik dibiɗ ng’ar begene madiɗa tuwa, ɓa a ra kiɗaŋ. A kiɗ mizli ti gula ti hazum, hã mesene naŋhay a baˀam tika tika.

⁴⁶A ci silaŋ nga si begene, joˀ ti seˀe vuna sina, a kiɗa vagay. Begene a diɗ grop ng’ar Elazara, Elazar a muc daˀ ara.

⁴⁷Ti Zudehey mupuraka soje ngi buyoyo, taŋ gidaŋ haɗa na, a pulaka ɓi ngi vurumo.

⁴⁸Soje ngi buyoy a pulaka walahay guɗuko, a ram kini nga Zeruzalem, ɓa a ra kiɗaka Zudehey adiga. Buy a tuɓa ruwuy Zude ati muwã Siyoŋ.

⁴⁹A jumˀay ati soje ngi Bet-Suroyo. Soje ngi Bet-Suroy a boko tir walahay taŋ, asi mike na, ɓa a ndiram giceˀ hã hin mbeˀ mbeˀ na, gwat ngi zum anta avu taŋ haɗa ta. Yo mana, i vi mitarnaˀ naŋ. [1]

⁵⁰Buy a tuɓa ruwuy Bet-Suro, dar a pi sojehey sek ɓa a jiginakaŋ.

⁵¹A ndaha hay ngi Buymisemuŋ hã hin mbeˀ mbeˀ, yo a ɗuv gwat ngi pi zinga ngi vuhoy, masin ngi mbizla moholoy, budugaruhoy, masin ngi hiziga ɗuguroy, ati masin ngi laha luvutoy waɗ vẽvẽluhoy.

⁵²Zudehey a ɗiyam masin mekelemey ɓa ngi ngizla masin ngi mesene taŋhaya. Dar a gaka vurumo hã hin mbeˀ mbeˀe.

⁵³Amma sona, gwat ngi zum anta weˀ di vu le ar hay ngi Buymisemuŋ ta, asi mike i vi mitarnaˀ naŋ. Yo Israyeley miram taŋ nga Zude ati mizli duniyahay na, a zumaka gwat miwam taŋ vuhoyo le.

⁵⁴May maja mizli mindahahay tuwa ti gidaŋ sina, a pulam mizli neˀ kini ar hay ngi Buymisemuŋ. Mizli mekelemeye, mbur gar a cuh nga hay naŋ.

⁵⁵Buy Antiyokus mumufaɗ naŋ, ti naŋ misi ti siifa aruŋ na, a wini mbur le ngi gilaŋ Antiyokuso ɓa a sa zuma li naŋ, i Filipi. Liziyas a pura na,

⁵⁶Filip a mo le ti ruwuy Perse waɗ ti Medi. Mizli mikisaka buyo hiɗim hiɗim aseˀe. Yo a ra wuɗ ɓa a cifi madiɗa ar gwat ngi li buy mazuma taŋ gar ma.

⁵⁷Ti Liziyas micina ɓi naŋ na, a juw vu kutum ɓa a ru ng’adiga. A ɓa buy ati madiɗa ngi sojehey waɗ sojeheye na: «Vur hin gar na, ndr’i ra ŋhiŋhiyam ti gidaŋ, gwat ngi zum ndra a ra tiki ma. Li ndra mindahaka na, i muguno le kuy kuy ti mohol. Yo anja majaka haŋ ngi gwat ngir li zuma buyo i ndra.

⁵⁸Kuɗukum mi ngi gi vurum ati mizli hanayna, jumukumˀay ati taŋ waɗ ati sukwi taŋ gar.

⁵⁹Pulukum taŋ jiviɗ ɓa a gaka gwat taŋhaya kaɓa sirik taŋ misi zleˀe amuŋ. Taŋ mijam mevel, yo taŋ migaka gwat hana gar na, asi ndra mikiɗaka ɓi ngi sirik taŋhay na.»

⁶⁰Mingiɓi hana a cira hiri le da buy ati madiɗa ngi mizli. Liziyas a slin ti ɓi ngi jumoˀay da Zudeheye, dar Zudehey a tuɓaka ɓi naŋ.

⁶¹Buy ati madiɗa ngi mizli a juwaka ɓi naŋ ti hudum. A dirba naŋ, Zudehey a boko tir walahay muguno ti mohol.

⁶²Amma ti buy mindil a muwã Siyoŋ na, a pura i muguno le kuy kuy. A ngila ɓi ngi hudum naŋ tuwa, joˀ a ɓa mizli ɓa a wahaka mohol mugunoko hay ngi Buymisemuŋ ti naŋ na avra.

⁶³Waɗ a mi kutum nga Antiyos. A ra luma Filipe, i buy ngi walahaya si. A zla kiɗa vu ati naŋ, dar Antiyokus a tuɓa walahaya ti gidaŋ.