Read South Giziga 1 Mak 7 Bible Online

1 Mak 7 - South Giziga bible

1 Mak 7

¹Ar vi miskat ti kukur zlum ngaŋ kaˀ naŋ na, Demetriyus, mangal ngi Seleyus a sumuɗ ti Roma, a ru kini ng’ar walahay ngi ciki mubuliy, ti mizli ndac aseˀe. Joˀ a zla virzi ngi zuma buy naŋ adiga.

²Ti naŋ maci ng’ar mugum ngi dideˀ naŋhay na, sojehey a jaka Antiyokus ati Liziyasa ɓa a sakaŋ taŋ.

³A faka ɓi naŋ da Dariyuso. Amma naŋ a ɓa taŋ: «Ki bigikiy mihiri taŋ ta.»

⁴Akẽh, sojehey a kiɗaka taŋ, dar Dariyus a cifi i madiɗa ar li zuma buyo.

⁵Mizli Israyeley miteŋteŋ ta ati micina mi da ɓimujuwahay ta gar, a soko nga pur naŋ. Madiɗa taŋ i Alkim, a ra wuɗ ɓa a cifi masay madiɗa.

⁶Taŋ a wudam ti mizli a mbuŋ buyo, a ɓakaŋ na: «Zudas ati sukum naŋhay a kiɗaka ngama ɗikeye le vagay vagay, yo a ɓulam ndra le tisi ruwuy ndra.

⁷Slin mbur ngisi mevel ɗik, ɓa a ra puro gwatay taŋ mingizlaka taŋ asi ruwuy ndra waɗ ar zlili ngi buy na. Ɓaŋ ɓa a ra kuta Zudas ati sukum naŋhay waɗ mizli mijini taŋhaya.»

⁸Buy Demetriyus a wini Bakides, ngama ngi buyoy zleˀe, yo a zum buy ar Siri-Madiɗa. I mbur madiɗa ngir li zuma buyo, yo i mbur miteŋteŋ ngi buyo ma.

⁹Demetriyus a slinaŋ ati Alkim, mbur misi moˀore. A cifaŋ i masay madiɗa. A ɓa taŋ ɓa a ra pulaka cuwal ngi gwat malambaˀ Israyeley migaka na.

¹⁰Bakides ati Alkim a ram ti mizli haɗi asi taŋ. Taŋ mindilam a ruwuy Zude na, a slinam mijiviɗey ti mingiɓi ngi jumoˀay, dambalaka i slir.

¹¹Amma Zudehey mupuraka taŋ a soko ti sojehey haɗa asi taŋ na, ko a ngumam tuɓa ɓi ngi jumoˀay taŋ na ta.

¹²Mizli mupura ɓimujuwahay a kusom a ciki Alkim ati Bakidese kine si, da a lumam mingiɓi neˀ kwana.

¹³A wuzla Zudeheye, muwuɗam jumoˀay dumbuŋ i Asidihey.

¹⁴Taŋ a ɓam na: «Alkim, mbur muso ti sojehey na, i masay, muy ngi Aroŋ. Gwat mijeŋ ta na, ko anta sa ga ndra di ta.»

¹⁵Alkim a vula taŋ mingiɓi ngi leleŋ, waɗ a ɓa taŋ di ti hudum: «Ndr’anta wuɗam gi malambaˀ da kum ta, da ngama kumoy ta.»

¹⁶Amma zle ti taŋ muvulakaŋ mevel taŋ sina, a ji mizli kukur merkeɗ awuzla taŋ, yo a kiɗa taŋ vagay vagay kaɓa mutohoko ɓi naŋ ani: [2]

¹⁷«Vagay ngi mizli ɗikey mipal ati pumbus taŋhay a paka taŋ le gun hirnga ngi Zeruzaleme, ko mbur midik taŋ anta.»

¹⁸Akẽh, mizli gar a ra zluwunam, a ra jijikam. A ɓam na: «Ɓi mikaslsla, yo ɓi mijeŋŋe anta avi mizli hanayna ta, ani ɓi taŋ mujuwaka ati taŋ muhudumom tuwa, a ngilaka ɓi naŋ le.»

¹⁹Bakides a bi ti Zeruzaleme, a ra pa walahay guɗuko a Bet-Sayte. A slin, a ra jakaŋ mizli haɗa, mujumoko ng’avi naŋ na, waɗ mizli Zudehey cah ma. A sla ˀay taŋ, waɗ a pa taŋ ng’ar vigiɗ madiɗa ngi yam.

²⁰A vula li zuma buyo da Alkime, yo a pulaŋ sojehey ɓa ngi sa jinaŋ, dar a mi ng’avu buyo so.

²¹Zle ti nana, Alkim a zla cika vu ngi tiri masay madiɗa.

²²Mizli gar mahiryaka mizli, a jumoko ng’avaŋ. A waka ruwuy Zude, yo a gaka gwat malambaˀ da Israyeleye haɗa.

²³Zudas a pura na, Alkim ati mizli ngi seˀehey a ra gaka malambaˀ da Israyeleye ti gidaŋ fineˀ mizli duniyahaya jaka.

²⁴A liˀi asi ruwuy Zude zlar wãˀ. A kuta migi malambaˀhaya ti bonoy, yo a tika taŋ ɓa a laˀam pusak vu asi ruwuyo mata.

²⁵Alkim a pura na, Zudas ati mizli naŋhay a tiram le gidaŋ haɗa, yo a sina le n’anta a sa cik vu gu mata. A mi nga hay buy amuŋ, dar a kupa taŋ ɓi malambaˀ madiɗahay haɗa.

²⁶Buy a slin Nikanor, mbur ngi wuzla madiɗa ngi soje naŋhay, yo i mbur mupuɗaw ngir zuma buy vuna. Nikanor vuna a ra wuɗ gi malambaˀ da Israyeleye haɗa haɗa. Buy a slinaŋ, a ɓaŋ ɓa a ngizla mizli.

²⁷Nikanor a ru nga Zeruraleme ti mizli haɗi aseˀe. A tikina Zudahay ati sukum naŋhaya ti mingiɓi ngi jumoˀay. A ɓa taŋ na:

²⁸«Anja kiɗa vu a gi ar wala ndra ati kumo ta, yi wuɗ i sa ru ng’avu kumo ti sojehey njiraˀ ɓa i ɗiyam ɓi ngi jumoˀay.»

²⁹Ti Nikanor mindil avi Zudas na, a jam haŋ kaɓa ngamahay. Amma mesene ngi Zudahay a roko weˀ vu ngi ngizl taŋ.

³⁰Zudas mupura Nikanor a so ti ɓi ngi tikina vu na, ko a ngum tuɓa ɓi ngi jumoˀaya mata.

³¹Nikanor a pura na, wer naŋ miga tuwa a njik le. A cuh ti Zeruzaleme, a ru nga zla Zudasa ngi kiɗa vu, gweˀ avi walahay Kafarsalama.

³²Mizli ngi Nikanoroy a mucam, a gam gwat ngi mizli skat skat zlum gu, mizli mekelemey a kilam ng’ar walahay madiɗa ngi Daviti.

³³A dirba gwat tayna micohom na, Nikanor a jiɗ nga muwã Siyoŋ. Masayay a boko tir li mipala ɓa a jakaŋ haŋ kaɓa i ngamahay, yo ɓa a bugakaŋ gwat ngi mikuli mizlam zlam wãˀ mavulaka da buyo.

³⁴Amma Nikanor a pura taŋ hiris le, a singir ar taŋ, yo a ɓa taŋ mi ngi sliŋ.

³⁵A hudum ti mevel, a ɓa taŋ: «Da wurenna, ki vulikiy Zudas ati migi vurum naŋhaya a si haŋ ɗu ta, yo da i mo le manja ɓi ngi cifi zuy a ɗiyi na, i sa ɗuva vu da hay hana vuna.» Dar a bi ti mevel.

³⁶Masayay a mam nga mamay amuŋ, yo a cicam dedeŋ, hiri tataˀ da li ngi gi mikuli waɗ da hay ngi Buymisemuŋ. Dar a ɓam ti tuwuy a hiri:

³⁷«Aw Buymisemuŋ, i ka muwuna hay ɗik hana ɓa slimiɗ ɗik a zil ara, yo ɓa a tiri i hay ngi diradibiɗ ati ngi tumbul ɗiki.

³⁸Mbur hana ati migi vurum naŋhaya, kuta taŋ ti bonoy, yo ga ɓa a mucam ar li kiɗa vu ti maslalam. Wuluk keŋ ar taŋ muzukuw tuwa, yo ki pula taŋ ɓa a ndiram ti siifa ta.»

³⁹Nikanor a bo ti Zeruzaleme, yo a a ɗuva walahay guɗuko a Bet-Horoŋ. Migi vurum ngi Sirihey a soko, a jumom ng’avi taŋ.

⁴⁰Zudasa kwana, a ɗuva walahay guɗuk naŋ a Hadasa, naŋ ti mizli durmuk makir aseˀe. Dar a dir dibiɗ ani:

⁴¹«Aw Bumbulvuŋ, ngi pas numuŋ ada na, mijiviɗ ngi buyoy a zukuw le. A hahãŋ sina, modro ɗik a bawa, a kiɗ asi taŋ mizli durmuk skat skat zlum ti kukur dangafaɗ ngaˀ zlum.

⁴²Sojehey misi a mbuŋ ndra na, kiɗa taŋ dana, kanah ya. Mizli masa ndiram ti siifa a sa sinaka, ki kuta taŋ asi taŋ mizaka hay ɗik mipal na. Ga taŋ kiita weˀe avi gi malambaˀ taŋ.»

⁴³Sojehey a zlaka kiɗa vu ar hin mukuruˀ nga cuw naŋ ngi kiya Adar. Dar a kiɗaka migi vurum ngi Nikanoroyo. Naŋ vuna, a kiɗaka cikiɗef dumbuŋ ar li kiɗa vu.

⁴⁴Soje ngi Nikanoroy mipraka a muc le na, a hizigaka gwat ngi vurum taŋhaya, joˀ a kilam.

⁴⁵Zudehey a sipaka taŋ hiipas, sle a Hadasa hã seŋseŋ a Gezer. A ra fam zara a dirba taŋ cici.

⁴⁶Mizli a soko tir walahay ngi Zudehey mugun hirnga taŋ gar, a zlaka mesene taŋhaya tika tika ngi kiɗa vu, dar a kiɗaka taŋ vagay vagay. Soje ngi Nikanoroy a mucam cek ti kiɗ ti maslalam, ko mbur pal milih anta.

⁴⁷Zudehey a hilaka gwat taŋhay ati gwat ngi vurum ngi mesene taŋhaya. A bukoko hirnga ngi Nikanoro ati haŋ naŋ hazum naŋ mududuɓa ngi huhumu vu tuwa. Aram taŋ, a ra bugaka taŋ a mihiri ngi mizli Zeruzalemey gar.

⁴⁸Mizli a mumulom haɗi, joˀ a gaka muguzlumo ti hin nana, i hin ngi cira hiri madiɗa.

⁴⁹Hin nana, hin mukuruˀ nga makir naŋ ngi kiya Adara, a ɗuvaka ɓa vur vi gar na, Zudehey a gaka muguzlum nah.

⁵⁰Hirwuy Zuda a musuk vu ngi hin neˀ so.