Read South Giziga 1 Mak 8 Bible Online

1 Mak 8 - South Giziga bible

1 Mak 8

¹Slimiɗ ngi Romahay mazil na, Zudas a cina le. A ɓam i migi vurum migidaŋhay, mizli gar maram tisi taŋ kuy kuy na, a tuɓaka taŋ, a jam ngama ti mizli gar masoko ng’avi taŋ, yo i mizli migidaŋhay.

²Ɓa ngi buga gidaŋ taŋ da Zudas na, a slufakaŋ ɓi ngi vurum taŋ migaka, waɗ taŋ mulumam bugawla avi mizli Goloy na. Mizli Romahay a kiɗaka taŋ le, yo a tikaka taŋ ˀay le ngi wurka buutu mutuwaˀ tuwaˀhay.

³A kiɗam vu le zleˀe a ruwuy Espaya, ɓa a tuɓaka li misi ɓiri hirnga ati ɓiri bara da taŋ.

⁴Ko ti taŋ mikileŋ avu ruwuy Roma na kwana, a tuɓaka ruwuy nah le gar, mbele wer taŋ ati tumo vu taŋ. Buyoy masoko tir ruwuy mikileŋhey ngi kiɗa bu ati taŋ kwana, a lumam bugawla le ar taŋ na si. Taŋ Romahay a kiɗaka taŋ le gu, yo a ngizlaka taŋ gwatay haɗa ma. Amma mizli mekelemey a ra wurkaka taŋ buutu vur vi gar.

⁵A kiɗa buyoy le ma: i ti buy Maseduwan, buy Filipi ati buy Perse waɗ mizli gar maslam himaˀ ar taŋ, a jaka taŋ le asi haŋ taŋ.

⁶Antiyokus, Mbur madiɗa, i Buy Asiri. A zla Romahaya le zle ngi kiɗa vu ti begene skat ti kukur cuw, ti pilisey, ti mota ngi pilisey ati sojehey mbeˀ mbeˀe. Amma, Romahay a kiɗaka taŋ le.

⁷A jakakaw titiri, dar a tikakaŋ ˀay da naŋ ati mizli naŋhaya ngi wuruka buutu mutuwaˀhay, yo ɓa a vula taŋ bekehey ma.

⁸A tuɓaka ruwuy Inde, Medi, ati Lidi waɗ ruwuy mimezlehey cah ngir li zuma buyo avu buy Antiyokuso, ɓa a vulaka taŋ da buy Emene.

⁹Mizli Grekey a ɗuvaka a kwacay taŋ ɓa a ra ngizlaka taŋ.

¹⁰Ti Romahay micinaka ɓi naŋ na, a slinam ngi kiɗa vu ati taŋ i madiɗa ngi sojehey pal tewle. A kiɗ mizli Grekeye sunok sunok, a ja ngwas ati ziri taŋhaya cek. Mizli Romahay a hilaka gwat taŋhaya, a tuɓaka ruwuy taŋ, a wahakla li ɗum taŋhaya, yo ar hin nana, a tikaka taŋ ˀay ɓa a wurukam buutu mifineˀ gidaŋ.

¹¹Li zuma buy mekelemey ati maturahaya, Romahay a ngizlaka taŋ le, joˀ mizli ngi Dagajay a tiram beke taŋhay.

¹²Amma ngama taŋhay ati mizli majumom ng’avi taŋ na, Romahay a ndiram teŋteŋ avi taŋ. A tikaka ˀay le da buy migweˀ gweˀ ati mikileŋ kileŋheye, dar mizli macinaka slimiɗ taŋhay, a zluwunam ti taŋ.

¹³Mbur taŋ muwuɗam le ɓa a cifi buy na, a vulakaŋ buyo amma mizli taŋ muwuɗam ɓa a cifam buyoy taŋ na, a muɗaka taŋ tir buyo avra. A ndilaka hirnga ngi zuma buyo le wãˀ.

¹⁴Ko ti nah gar tekeɗe kwana, ko mbuir Roma matuwuɗ loppol anta pal le ta, yo anta ki zana ngi buyoy ɓa a gi di ɗongor ta ma.

¹⁵A ɗuvam kus madiɗa le, i kus ngi mizli skat skat makir ti kukur cuw. Mizli tayna, a kusom, a ngilam wuy ar ɓi ngi mizli gar, ɓa a ɗiyakakasl kasla.

¹⁶Vur vi gar na, a vulaka ɓi ngi wi Romahay ati ɓi ngi cica ɓi asi ruwuyo da mbur purl asi taŋ. Taŋ gar a cinakaŋ mi, ko mbur mawuɗ ɓa anja i naŋ macifi anta, yo magi di suloŋ anta.

¹⁷Epolem, mangal ngi Zaŋ, dideˀ ngi Hakos, waɗ Jasoŋ mangal ngi Elazara, Zudas a wunaˀa taŋ, a slina taŋ nga Roma, ɓa a ra jam ngama, yo a jumomˀay ati mizli Romahaya.

¹⁸Zudas a wuɗ ɓa a laha Zudeheye, asi a pura na, lizuma buy Grek ngi ruwuy Siri a ra gi beke ti Israyeleye.

¹⁹Ti Epolem ati Jasoŋ a ram nga Roma, jiviɗ a gi jek, yo ti taŋ mindilam ar kus madiɗa na, a zlaka a ɓam:

²⁰«Zudas mazilaka Makabe, ati sukum naŋhay waɗ mizli Zudeheye a slinoko ndra ng’aka ɓa i jumom ˀay ati kum, yo i ɗiyam ɓi ngi leleŋ. I wuɗam ɓa i tiram mizli ngi si kumoy njah wãˀa.»

²¹Mizli ngir kusoy a tuɓaka ɓi nah le.

²²A tohom letir nguɗ nguɗ ar beleler ngi ɓiri gazahay, a slinam nga Zeruzalem ɓa ɓi ngi leleŋ ati ngi jumoˀaya, a sa wulukaka keŋ ava. Mingiɓi ngi raˀa n’ani:

²³«I wuɗam anja Romahay ati mizli Zude ngi ruwuy ati ngi miyamay a mumulom vur hin gar. Anja a ndiram ɗum avi mesene taŋhay waɗ avu vurumo.

²⁴Amma da vurum a zli le gurjik ng’ar ruwuy Roma vuna, malla ng’ar ruwuy pal awuzla ngi seˀehey kwana,

²⁵mizli Zudehey a sa kiɗam vu ti mevel taŋ wãˀ tisi taŋ, weˀe avi gwat ngi gi tapasa.

²⁶Ruwuy Roma a wuɗ na, alkamari, gwat ngi vurum, ɓiri bara ati palalam kwana, a vulam da mbur ta, a didiɗam ta ma. Yo anja a jaka gwat ngi gi hanayna manja a luma gwat minjeˀe.

²⁷Da vurum a zli dumbuŋ i mizli Zudehey kwana, mizli Romahay a sa kiɗam vu ti mevel taŋ wãˀ tisi taŋ, weˀe avi gwat ngi gi tapasa.

²⁸Ruwuy Roma a pula jiviɗ da Zudeheye, ɓa alkamari, gwat ngi vurum, ɓiri bara ati palalam kwana, a vulam da mesesne taŋhaya takaɓa taŋ mujuwaka ɓi naŋ. Amma anja a jaka ɓi gwat ngi gi taŋhayakaɓa mujuwaka ɓi naŋ.

²⁹Mizli Romahay mujuwam ɓi ati Zudehey tuwakahana so.

³⁰Da ti mbuŋ, jum mucuw tayna, a jumom ˀay le, ɓa a pam nga meˀe malla ɓa a susuyumom gwat na, a gaka ka taŋ mawuɗam. Taŋ kwana, a gaka gwatakasl kasl ka taŋ mujuwaka tuwa.

³¹Waɗ mana, ɓi ngi buy Demetriyus miga ndra bonoy na, i tohokoŋ ɓi naŋ ani: «Ngama ndrahay Zudehey, ngi si ndrahay na, ki guzuvura taŋ kine asi mike?

³²Da a ra ɓam ar ka aruŋ na, ndr’i sa kiɗam vu ati ka a ruwuy waɗ ar mubuliy.›»