Read South Giziga 1 Mak 9 Bible Online

1 Mak 9 - South Giziga bible

1 Mak 9

¹Ti Demetriyus micina a kiɗaka Nikanoro le ati migi vurum naŋhaya na, a slina Bakides ati Alkime jom ti sojehey mbeˀ mbeˀ nga ruwuy Zuda ava ma.

²Ti Bakides ati Alkime a zuɓam jiviɗ ngi Galile, a ra ndahaka walahay Mesaloto misi a Arbelese. A tuɓaka, yo a kiɗam mizli adiga haɗa ma.

³Ar kiya mudumbuŋ, ngi vi miskat ti kukur zlum nga cuw naŋ na, a paka walahay guɗuk taŋ a mbuŋ walahay Zeruzalem.

⁴A dirba naŋ, a cohom, a ram kinih nga Berete. Aram ti mizli misi saray durmuk kukur cuw waɗ mukukuro pilisey durmuk cuw.

⁵Zudasa, a pa walahay guɗuk naŋ a Elasa. Naŋ ti migi vurum mimezlehey durmuk makir.

⁶Taŋ mipuraka mesene taŋhay mihaɗa na, zluwun a ga taŋ. Mizli haɗa a kilam le, mbak misa ndiram i mizli skat skat dangafaɗa.

⁷Zudas a pura na, mizli naŋhay a ra kilam le, amma vurumo a ra wuɗ ɓa zli virzi. Didak a muɗaŋ le haɗa asi n’anta kuso hirnga ngi soje naŋhaya gu mata.

⁸Gidaŋ mifinaŋ tuwa na, a ɓa mizli mindiramaya: «Da i gaka gu na, akum i ra ziram didak ati mesene ndrahaya, ɓa i kiɗam vu ati taŋ.»

⁹Taŋ a ngilakaŋ mi, a ɓakaŋ: «Kay! Wurenna ndr’anta gam gwat neˀ le gu ta, sey i laham siifa ndra. Ɓa i maka hiri ngi kiɗa vu na, sey i sa moko ati sukum ndrahaya.»

¹⁰Zudas a ɓa taŋ: «Ɓa i kilam le na, naŋ kuy ta. Da i hin ngi muc ndra muso na, anja i mucam vur sukum ndrahaya, yo anja i pulaka dudok ndra a kiɗ ta.»

¹¹Mesene taŋ migi vurumoy a boko tir walahay guɗuk taŋhaya, dar a ra zliram dibiɗi ti taŋ. Mukuro pilis taŋhay a wuɗkam wuzla cuw. Soje misi vẽvẽluh ati lekeye, taŋ a ram ɓaˀ a mbuŋ migi vurumoyo. Jobol mudumbuŋhoyo, i migi vurum migidaŋhay.

¹²Bakidese, naŋ a ro tir vay hazum. Migi dunguroy a ram ti makaw cuw bal ti fi zarahay. Mizli Zudahay kwana a fam zarahay aya.

¹³Migi vurunoy tika tika, magam mi wuwwo cuw taŋ na, dar hirwuy a jijiki. Kiɗa vu a zli zle ngi mipriki amma a zik hã pastaˀ.

¹⁴Zudas a pura na, Bakides ati migi vurum migidaŋ naŋhay a roko tir vay hazum. Dar soje ngi Zudasay, mutuso meveley a soko gun hirnga naŋ.

¹⁵A jikam jik ng’ar vay hazum ngi soje Siriheye, yo a ɓulaka taŋ seŋseŋ nga muwã Azara.

¹⁶Mizli vay gulahay mupuraka a vay hazumoy a ra gam masafaya na, a jaka is da Zudas ati soje naŋhaya ti dirba ya.

¹⁷Kiɗa vu a bul vu culok, hã mizli haɗa a mucam tika tika.

¹⁸A kiɗaka Zudas vuna le vagay aya, joˀ mizli naŋhay mindirama, a kilam.

¹⁹Zonataŋ ati sukum naŋ Simeyoŋ a zuɓaka vagay ngi sukum taŋ Zudasa, a ra dikaka ar zivi ngi dideˀ taŋhay a Modiŋ.

²⁰Israyeley gar a tuwam, a likaka vagay naŋ hã hin mbeˀ mbeˀe. Joˀ a ɓam:

²¹«Mbur migidaŋ hana, masa laha Israyeley tuwa a muc mbri maka?»

²²Gwat mekelemey, Zudas miga taŋ, kiɗa vu naŋhay, gwat madiɗa naŋhay ati gwat ngi vulaŋ slimiɗ ngi ɗongoroyo haɗa teˀe, i mutohoko taŋ gar ta.

²³A dirba muc ngi Zudasa, mizli mupulaka ɓimujuwa ngi Buymisemuŋ zleˀe a moko amuŋ, yo mizli misi moˀorehey a zuɓaka hirnga amuŋ.

²⁴Ti hin nah na, may ngi zlamba magi asi ruwuy na, mizli gar a jum ng’avi taŋ.

²⁵Dar Bakides a wini mbur pal awuzla misi moˀoreheye ɓa a wa ruwuyo.

²⁶Mizli tayna a sipaka ngama ngi Zudasaya, joˀ a ɓulaka taŋ avra. A soko taŋ ng’avi Bakidese, Bakides a huhum vu, yo a ga ɓa a ŋhiŋhiyam.

²⁷Zle avu mupulaka sipi Mijiviɗ ngi Buymisemuŋhoy na, ko Israyeley a lumam sipi minder nder nana daˀ mata.

²⁸Ngama ngi Zudasay gar a kusom, a ɓaka Zonatana:

²⁹«Zle ti sukum ɗik mumuc na, ɓa ngi kiɗa vu ati mesene ndrahay, ati Bakides waɗ ati mizli mahirsaka sukwi ndra na, ko mbur kaɓa naŋ anta mata.

³⁰Wurenna sona, ndr’i wunuˀukuw le zle dana, ɓa ki cifi buy ndra, waɗ madiɗa ndra ar li gi vurum ndrahay gar.»

³¹Dar Zonataŋ a tuɓa ɓi ngi wi taŋ, waɗ a cifi ar li ngi sukum naŋ Zudasa.

³²Ti Bakides micina ɓi naŋ na, a sipi jiviɗ ɓa a kiɗa Zonataŋ vagay.

³³Amma ti Zonataŋ ati mizli naŋhay waɗ sukum naŋ Simoŋ a cinaka ɓi naŋ le. A kilam ng’ar li papala ngi Tekowe, dar a pam gweˀ ami yam Asfar.

³⁴Bakideses a cina ɓi naŋ ngi hin ngi sabata, a soko ati ati soje naŋhaya gar nga dubazaw Zurdeŋ. ( li toho verse 9.34 na, ngila mi ada ra asi i mupurla ati verse 43.)

³⁵Zonataŋ a slino sukum naŋ Zaŋ, miwi mizli mikiɗa vu tahaya ɓa a ra cufuɗa mizli Nabatay, ngama taŋhaya, da a ngumom ɓa a paka gwat taŋhay mihaɗa na, a hay taŋhaya kwana.

³⁶Amma mizli Madebahay, ziri ngi Zaburihey a ndiloko ɓuyoh, a jaka Zaŋ, a tuɓakaŋ gwataya cek, joˀ a kilam taŋ.

³⁷Neˀ a dirba naŋ, a sa ɓaka Zonataŋ ati sukum naŋ Simoŋ na, mizli Zaburihey a wuɗam ɓa a gam muguzlum madiɗa ngi ki sa ngasa. Mangasla, i zuŋ ngi mbur mupuɗaw wãˀ ngi Kanaˀan, a kisoko di hiɗim hiɗim ti ruwuy Nabata.

³⁸A wulukam keŋ ar muc ngi sukum taŋ Zaŋ, Zaburihey mikiɗaka tuwa. Dar a kilam, a ra ɗumom ar wala muwã muwãhay.

³⁹A zuɓaka hiri na, a puraka gawla ati ngama naŋhay waɗ sukumuhoy a ra soko kini ng’avi taŋ bal ti kiɗa gangaŋhay waɗ gwat ngi gi dunguroy. Yo taŋ hiɗim hiɗim, kaˀ kaˀ vu le ti gwat ngi vurumoy haɗa ma.

⁴⁰Ti Zonataŋ ati mizli naŋhay miroko ɗum ɗum tuwa, a boko ng’ar taŋ, joˀ a kiɗaka taŋ. Mizli a mucam le haɗa, yo mekelemey a kilam kini nga muwã. Zudehey a hilaka gwat taŋhaya, a cohom taŋ cek.

⁴¹Akẽh, muguzlum ngi ki sa ngwasa, a tiri i hin ngi vagay, yo dunguro, a tiri i liki.

⁴²Zonataŋ ati sukum naŋ Simoŋ a mupulaka cuwal ngi sukum taŋ kahana so, dar a mam nga mizaw Zurdeŋ amuŋ.

⁴³Bakideses a micina ɓi naŋ na, naɓa i hin ngi sabata, a soko ati ati soje hiɗim hiɗim nga mi muazaw Zurdeŋ.

⁴⁴Zonataŋ a ɓa mizli naŋhaya: «Akum, i ra kiɗam vu ngi laha hutuŋ ndra, asi hin misi dana n’anta kaɓa misi ngi daambu ta, yo kaɓa misi ngi tapasa ta ma.

⁴⁵Ani ti mbuŋ ndra, i mesene ndrahay, yo ti dirba ndra, i mizaw Zurdeŋ. Gun hirnga ndra, i zlazlar ati widis ngiriɗi, ko li ɓa i kilam ti raˀa anta.

⁴⁶Wurenna sona, wudukum ng’avu Bumbulvuŋ ɓa i laham avi mesene ndrahaya.»

⁴⁷Kiɗa vu a zli so. Zonataŋ a zuɓa haŋ ngi kiɗa Bakidese, amma Bakides a mi nga dirba, ko kiɗ a lumaŋ ta.

⁴⁸Joˀ ti Zonataŋ ati mizli naŋhay a cam nga mizaw Zurdeŋ, a kaka yama, a ndilam seŋseŋ a dubazaw vay diga. Amma ko mesene taŋhay a tuwuɗaka mizawa, ɓa a sipaka taŋ ta.

⁴⁹Ti hin nana, mizli ngi Bakidesey a mucam le, a gi gwat ngi mizli durmuk gu.

⁵⁰Bakides a mi nga Zeruzalem amuŋ. A guno walahay ngi si ruwuy Zudehey ti mohol musuburoy, yo a gica miviŋheye ti faɓruhoy. Walahay mugunohoyo i walahay Zeriko, Emawus, Bet-Heroŋ, Betel, Timna, Faratoŋ, waɗ walahay Tefoŋ.

⁵¹Dar a pul sojehey ar walahay tayna gar ɓa a jiginaka taŋ, yo ɓa a gaka bonoy da Zudehey.

⁵²Walahay Bet-Sur ati Gezer waɗ li ngi ɗum misi a Zeruzaleme, a guno taŋ ti mohol ma. A pul sojehey ar taŋ waɗ gwat ngi zum taŋhaya.

⁵³A hila ziri ngi buy ngi si ruwuy tayna, joˀ a ra pa taŋ ar dangay ar li ngi ɗum misi a Zeruzalem tuwa.

⁵⁴Ar kiya mucuw naŋ ngi vi miskat ti kukur zlum nga makir naŋ na, Alkim a ɓa mizli ɓa a mbuzlaka mohol mugun hirnga ngi hay ngi Buymisemuŋ. A wuɗ na, ɓa gwat mijiviɗ ngi Bumbulvuŋhoy migaka na, a kiɗ avra. Mizli a zlaka mbizla moholo si na,

⁵⁵Alkim a ki jiji ɓaˀ, dar slra a cici. Mi a gici kap, yo a ndir hilaɓ hilaɓ a ruwuy. Zle ti nana ko anta wuna mi gu ta, yo anta ɓi ɓi a hirnga hay tuwa gu ta ma.

⁵⁶A dirba naŋ jiji tuwa a gaŋ bonoy haɗa wãˀ hã a muc di.

⁵⁷Bakides micina, Alkim a muc le na, a mi ng’avu buy Demetriyus amuŋ. Dar walahay Zude a musuk vu setette ngi vi cuw.

⁵⁸Mizli macinam mi da ɓi ngi Buymisemuŋ tahay a kusom gar, a ɓam na: «Ani Zonataŋ ati mizli naŋhay a roko ar leleŋ, yo taŋ setette ma. Akum i ra ziloko Bakides wurenna ɓa a ja taŋ hiikuɗ purla si.»

⁵⁹Aram, a ra kiɗaka slir naŋ ati Bakidese so.

⁶⁰Bakides a ru ti sojehey haɗa aseˀe. A tuh ɗerewol yaŋŋa da mizli naŋhay misi asi ruwuy Zude, a ɓa taŋ ɓa a jaka Zonataŋ ati mizli ngi seˀeheye. Amma ko gwat taŋ mawuɗam gi naŋ nana a gi mata asi mike, Zonataŋ a cina ɓi naŋ le.

⁶¹Waɗ jak mana, Zonataŋ ati mizli naŋhaya, a jam mizli kukur zlum awuzla mizli mujuwoko ɓi nana vuna, a kiɗa taŋ gar vagay vagay.

⁶²A dirba naŋ, Zonataŋ ati Simoŋ waɗ mizli taŋhaya a ra ɗumom ar hirwuy manja mizli a ra, hirwuy Bet-Basi. A paka haya hiri naŋ amuŋ, waɗ a gunoko taŋ ti mohol.

⁶³Ti Bakides micina ɓi naŋ na, a kuso soje naŋhaya cek, waɗ a zilo mizli ngisi naŋhay misi a ruwuy Zude ɓa a sa lumakaŋ.

⁶⁴A sa pam a ciki Bet-Basi. A kiɗam vu adiga ti masin ngi vurumoy hã hin mbeˀ mbeˀe.

⁶⁵A pula sukum naŋ Simoŋ ar walahaya, joˀ taŋ a bam ati mizli ngac neˀ nga miɓuhu.

⁶⁶A kiɗa ti Odomera ati muy naŋhaya, waɗ sukwi ngi Fasiroŋhoy ar walahay guɗuk taŋhaya. Mizli tayna a wuɗam a kiɗam vu tisi Zonataŋ, dar a zlaka kiɗa vu, waɗ a cam nga wuzla mizli.

⁶⁷Somoŋ a bo ati mizli naŋhaya, yo a ɗuva vu da masin ngi vurumoy tuwa.

⁶⁸A zlaka kiɗa vu ati Bakidese, hã a vaŋ haŋ wãˀ. Bakidese naŋ mujuwa ɓi a mevel ngi gi vurum tuwa, a gi kanah mata na, mevel a ra jaŋ ara, joˀ a kil.

⁶⁹Zudehey macinam mi da ɓimujuwa tahay na, mevel a ra jaŋ ar taŋ. A kiɗ mizli sunok sunok, joˀ a ɗuva a mevele ɓa a mi le ng’ar hirwuy naŋ amuŋ.

⁷⁰Ti Zonataŋ micina ɓi naŋ na, a slin mijiviɗey ɓa a ra ɓaka taŋ ɓi ngi jumoˀay, yo ɓa a ɗiyaka ɓi ngi pula dangayaya.

⁷¹Bakides a tuɓa ɓi naŋ, joˀ a ga gwatayakaɓa Zonataŋ mucufuɗa. A hudum ɓa ar hin ngi siifa naŋ mindire, a ga gwat malambaˀ da Zonataŋ mata.

⁷²A vulaŋ mizli naŋhay, naŋ mija taŋ ng’ar dangay a ruwuy Zude na. Ko a mo daˀ ng’asi ruwuy Zude mata.

⁷³Dar maslalam a musuk vu ar ruwuy Israyele, waɗ Zonataŋ a cifi wãˀ a Mikmasa. A cifi buy ngi mizli naŋhaya, yo ar ruwuy Israyele, mizli macinaka mi da ɓimujuwa ngi ta na, a ngizla taŋ pay avra.