Read South Giziga 2 Mak 1 Bible Online

2 Mak 1 - South Giziga bible

2 Mak 1

¹Mizli Zude ngi Zeruzalemey ati mizli ngi si ruwuy Zude gar a ra jaka haŋ da sukum taŋ, Zudehey misi asi ruwuy Ezipte. Anja a lumam zuy, yo a sikam.

²Anja Buymisemuŋ a ga taŋ gwat mezle naŋhaya, yo naŋ mujumˀay ati Abraham, Izak waɗ ati Zakop, gawla naŋ miteŋteŋhey na, anja a wuluk keŋ ara.

³Anja a ga ɓa ki wuɗam hunum naŋ gar kumo, yo ɓa ki gaka gwat naŋ mawuɗo ti mevel mezle waɗ ki pulaka vu kumo mbak vurˀe.

⁴Anja a wunukum mevele baŋ ngi cina ɓimujuwa ati ɓimuɗuva naŋhay, yo anja vulukum leleŋ.

⁵Anja a tuɓa diradibiɗ kumo, a pulukum mungra kumoy, yo ar hin ngi mendere na, a pulukum ta.

⁶Ndra wurenna i ra diram dibiɗ ar kum, vur ɓi tayna vuna.

⁷Ti Demetriyus mazum buyo, ar vi miskat ti kukur merkeɗ nga ngoltir naŋ na, ndra Zudehey i tuhukum letir ani: «Zle ti Zasoŋ ati mizli ngi seˀehey mupulaka hay mipal ati Buy ndra misemuŋ na, ndr’i roko likam haɗa haɗa.

⁸A ɗuvaka vu da miviŋ madiɗa ngi hay ngi Buymisemuŋ, waɗ a kiɗaka mizli micam ar ɓi tahaya. Dar ndr’i diram dibiɗ da Bumbulvuŋ, a cina ndra di le. I vulam gwat ngi mikulihey, i gam mikuli ti kalafay, i bulaka lampe ngir hay ngi Buymisemuŋhoyo, waɗ i paka peŋheye sesek da Buymisemuŋ adiga.»

⁹Ani wurenna, i ra tuhukum letir ɓa muguzlum ngi mazlaɓay magaka ar kiya Kislew na, ki gaka ya.

¹⁰Vi miskat ti kukur dangafaɗ nga dangafaɗ naŋ. Mizli Zude ngi Zeruzalem ati ngi Zudahay, jom ati jum ngi ngila wuy ngi mizli micawwahay waɗ Zudas a ra jaka haŋ da Aristobul, dideˀ ngi masayay, yo i mingila wuy ngi buy Ptoleme ma. A ra jaka haŋ da mizli Zude ngi Ezipteheye ma, yo a ɓaka taŋ anja a cifam zuy zuy.

¹¹I ra gaka sise da Buymisemuŋ gisiŋ gisiŋ wãˀ, asi a loho ndra le tir ɓi madiɗahay. A jina ndra le ngi kiɗa vu ati buyo.

¹²Asi, mizli mira gam vurum ti mizli ngir walahay mipala na, muɓula taŋ i naŋ vuna.

¹³Naŋ kine, ti Buy Antiyokus, buy taŋ, mucuh nga Perse na, soje naŋhay a puraka vu taŋ kaɓa mizli a kiɗaka taŋ gu ta. Amma masay ngi Naneyahay a gam wer, a kiɗakaŋ jom ati mizli ngi seˀeheye ar hay ngi Buymisemuŋ ngi Naneya vuna.

¹⁴Antiyokus a ram ng’ar li mipal nana vuna ati ngama naŋhay, kaɓa ngi gi muguzlum ngi kisa ngwas naŋ maˀãy Naneya. Dambalaka, a wuɗ a tuɓa zlili madiɗa ngir hay ngi Buymisemuŋ ng’ar maˀãya.

¹⁵Migi mikuli ngi Naneyahay a bugaka taŋ, joˀ Antiyokus a cam ati mizli naŋhaya cah nga hur hay mipala. Amma, buy mici kulaˀ nga haya sina, masayay a gicaka miviŋheye

¹⁶A wunaka miviŋ miyaŋ ngir plafoŋ, joˀ a kiyipoko Antiyokus ati mizli naŋhaya ti ɗuguroy rotototo, ti diga. Dar a bukoko saray ati haŋhay waɗ hirnga pal pal, joˀ a zliɗoko taŋ da mizli misi tiavrahay.

¹⁷Mizli mahirsaka Buymisemuŋ ndra na, naŋ a ga le ɓa a mucam, anja i hunumakaŋ ar gwatay gar.»

¹⁸«Ar hin mukukur cuw nga ngoltir ngi kiya kislewe, i sa gam muguzlum ngi zuɓa dili ngir hay ngi Buymisemuŋ. I wuɗam anja i fukum ɓi nah fẽẽt, ɓa kumo ki gaka ya. Anja ki gaka kaɓa magaka muguzlum ngi mazlaɓay na. Ti Nehemi mindira hay ngi Buymisemuŋ ati li gi mikuli hiri naŋ amuŋ na, a gi mikuli, a dirba naŋ, vu a bul. Tapas muguzlum nana, ki sa wulukaka keŋ amuŋ.

¹⁹Ti mijaka dideˀ ndrahay nga Perse na, masay miteŋteŋhey a zuɓaka vu, a ra ɗumoko yaŋ ar vigiɗ ngi yam mihisika. A caka yaŋ ɓa ko mbur masina li naŋ anta.

²⁰Vi mbeˀ mbeˀ a dirba nah, ar hin Buymisemuŋ mupura kuy na, buy Perse a slino Nehemi nga ruwuy Zeruzalem. Nehemi a slina dideˀ ngi masayaya, ɓa a supoko vu, taŋ muɗumoko tuwa. Amma ti taŋ mimoko na, a ɓakaŋ, a lumam di i vu ta, a lumam i gwat hindr’ikke. Nehemi a ɓa taŋ ɓa a ra nduboko neˀ, a soko di.

²¹Ti taŋ miɗiyaka gwat ngi muguzlumo le wãˀ na, dum ngi zluma gwat ngi mikuli a ro sek ar li ngi mikuli. Nehemi a ɓa masayay ɓa a litaka gwat tuwa ng’ara.

²²A gaka kanah. Gazlavay a sirta pasa le zle, amma neˀ a dirba naŋ na, a pusluɗ ndazl, dar vu madiɗa a bul njilim njilim, a ga weleleˀ le da mizli gar.

²³Ti gwat ngi mikuli mazlum na, masayay ati mizli mise akẽhey gar a ra diram dibiɗi. Zonataŋ a ɓi dumbuŋ, mizli mekelemey ati Nehemi a sa tuɓaka a dirba naŋ.

²⁴Dira dibiɗ naŋ n’ani: «Aw Bumbulvuŋ, Buymisemuŋ Buymisemuŋ ndra, miga muŋ ati ruwuy i ka. Ki gi zluwun da mbur, ka gidaŋ, ka jeŋŋe, ki pur ircece ma. Buy pal i ka, yo ka ti mevel mezle.

²⁵Ki vul haɗa, yo ka jeŋŋe, ka gidaŋ haɗa, yo k’ada caˀ ngi sete. Ki wunaˀa dideˀ ndrahaya le, ki pa taŋ sek pal ɓa a gukuw slra, yo ki ro weˀ vu ngi laha Israyeleye tivi mungra taŋhay gar.

²⁶Tuɓa gwat ngi mikuli hana, i gukuw di ar slimiɗ ngi Israyel, mizli ɗikey. Taŋ misi i mizli ɗikey na, jigina taŋ, yo ga ɓa a ndilaka ter ngi gi slra ɗike.

²⁷Mizli ngi si ndrahay mise ar beke a ruwuy mulak na, laha taŋ, kuso taŋ tir ruwuy taŋ mizlaɗ hirnga vuna. Mizli misi a ra hirsaka taŋ, yo a ra paka taŋ mesem na, pura taŋ ti hiri mezle, ɓa mizli a sinaka ki Buymisemuŋ ndra.

²⁸Mizli maguzuvram ndra, yo mazam ndra na, kuta taŋ ti bonoy.

²⁹Ga ɓa mizli ɗikey a diram dambasl ar li ɗik mipal , kaɓa Moyis miɓa tuwa.»

³⁰A dirba naŋ, masayay a zlam dimis ngi hunuma vu.

³¹Gwat ngi mikulihey muzlumam le wãˀ na, Nehemi a ɓa mizli, a litaka is ngi gwat tuwa ng’ar ɗugur madiɗahay.

³²A dirba naŋ, vu manja irne naŋ a bul. Amma vu ngir li ngi gi mikuli a pusluɗ dum naŋ, waɗ a sa mucu.

³³Ɓi naŋ a zlira ruwuyo zlar wãˀ. Dar mizli a ra ɓaka buy Perse na: ‹Ar li, masayay muɗumoko vu dumbuŋ ar misa jaka taŋ ng’ara tuwa na, gwat mihindr’ikke a bo, dar Nehemi ati mizli ngi seˀehey a zlumaka gwat ngi mikuli ti naŋ.

³⁴buy naŋ mucufuɗa ɓi naŋ sa ɓa mizli, a gunoko haya gun gun ti siviŋ, buy a tiri di li mipal.

³⁵Mizli misakaŋ ti dala haɗa haɗahay gar na, a mataŋ di haɗa nga ruwuy.

³⁶Nehemi ati mizli ngi seˀehey a zilaka gwat mihindr’ik tuwa ‹Naftar›, a mbiɗi avra ‹Zuɓa dili.› Amma vendeke ngi mizli a zilaka ‹Nafte›.