Read South Giziga 2 Mak 10 Bible Online

2 Mak 10 - South Giziga bible

2 Mak 10

¹Zuda Makabe ati mizli naŋhaya, a tuɓaka hay ngi Bumbulvuŋ ati walahay Zeruzaleme amuŋ, asi Bumbulvuŋ n’ada ati taŋ.

²A wahaka li gi mikuli, mizli mulakay mindiraka ar li ngi luma, jom ti li ngi dilik mekelemey a mbuŋ kuliheye ma.

³A dirba taŋ muzuɓaka dili ngir hay ngi Buymisemuŋ avra na, a ndiram li ngi gi mikuli mekelem. A bulaka vu ti nguɗo ɗugur, a nduvuɗakaŋ, joˀ a gam di mikuli, asi a gam daˀ ta, vi a gi le cuw. A wuram urdi, a bulaka vu avi lampeheye, waɗ a paka peŋ sek da Buymisemuŋ adiga.

⁴A dirba taŋ migaka mezegwel tayna na, a tumbuloko Bumbulvuŋ, tup tup murkwacay, ɓa a pula taŋ a gam gwat malambaˀ misi ka tayna mata. Amma da ko a gam mungra le gbaˀ kwana, anja a kuta taŋ ti bonoyo weˀe si. Anja a pula taŋ asi haŋ ngi mizli mulakay mazakaŋ naŋ Buymisemuŋ na ta.

⁵Hin ngi zuɓa dili ngir hay ngi Bumbulvuŋ na, a diɗ kasl ar hin mupurla ati ngi mulakay migam di kaɓa hay muho gar na, i hin kukur cuw nga zlum ngi kiya kislew.

⁶A gaka muguzlumo ti mumul, hã hin dangafaɗ, kaɓa muguzlum ngi guɗukoy, ti wuluk keŋ, hin ngi muguzlum ngi guɗuk mucuh na, a zik t’aruŋ, naɓa taŋ a roko ar butumoy, a muwãkaɓa gwat ngi ɓuhoy.

⁷Vurˀe, a hilam gandayay a haŋ, a nguwam kalafay waɗ kalaf ngi dibinojihey, dar a zlam dimis ngi hunuma Buymisemuŋ ti gidaŋ, ng’avi naŋ mupula taŋ jiviɗ ngi zuɓa dili ngi hay naŋ avra na.

⁸A ɓaka njah a wuzla mizli, a zuɓam haŋ ngi juwa ɓi naŋ da Zudehey gar. Vur vi gar na, a sa gaka muguzlum hana.

⁹Antiyokus mazilaka Epifan tuwa a muc kanah so.

¹⁰Wurenna, i sa ɓam ar Antiyokus mazilaka Epator, mangal ngi mbur misi moˀore. I sa ɓam bawwa ar naŋ muso ti bonoy asi ruwuy ti gi vurumoy.

¹¹Buy nah muzuɓa buy ar li ngi cine tuwa, a cifi mbur ada mazilaka Liziyas, ngi wi gwataya. I madiɗa ngi soje ngi Siri madiɗa ati Finiki ma.

¹²Lisiyas a cifi ar li ngi Pitolome, a zilaka ti migala ‹muzoɗ zoɗ hirnga.› I Pitolome vuna, micifi mbur mijeŋŋe avi Zudeheye, asi migaka taŋ malambaˀ zleˀe, joˀ a titila gi slra ati taŋ ti zuy zuy.

¹³Vurˀe, ngama ngi buyoy, a soko gilakaŋ ɓi avi buy Epator. A zilakaŋ le ‹mitikina vu› sar mbeˀ mbeˀ si.

¹⁴Ti Gorziyas mitiri madiɗa ngi sojehey na, a hil soje mulakay. A ra pur jiviɗ, ngi luma hin ngi kiɗa vu Zudeheye.

¹⁵Hirak ti nah vuna mana, mizli Idumey misi ar li ngi ndil ng’ar taŋ ti tuwaˀ misi ar li mezleheye, a ra hilaka mi da Zudeheye ma.

¹⁶Amma Makabe ati soje naŋhaya, a dirba taŋ midiram dibiɗ da Buymisemuŋ, a tumbulokoŋ ɓa a ci tisi taŋ na, a ram nga zla kiɗa vu ati mizli misi ar walahay muguno ti mohol ngi Idumeye.

¹⁷A zlaka taŋ ti himaˀ kuy kuy, a jaka mizli macikam vu ar walahaya, a ɓulaka mizli makiɗam deŋ deŋ ar moholoyo, miali madiɗam asi haŋ taŋ gar na, a slaka ˀay taŋ, hã a kiɗam mizli fineˀ gwat ngi durmuk cuw.

¹⁸Amma mizli, gwat ngi durmuk ngoltir, a ɗumom ar walahay muguno ti mohol miwãˀ naŋhay cuw. Taŋ ti gwat ngi kiɗa vu ar vurumhirnga puyuku.

¹⁹Ɓa ngi tuɓa liheye, Makabe a pula taŋ Simoŋ ati Zozef waɗ Zake ati mizli haɗa. Naŋ a ru tahaŋ naŋ ng’ar li muroko ti may ngi kila widi.

²⁰Amma soje ngi Simoŋ misi may zlili na, a pulaka mizli cah, mijigina li ngi ndil ng’ara ti waˀhaya, a hiɗikaka taŋ ti dala. A tuɓam suloy gabal kukur tarnaˀ, joˀ a pulam sojehey a kilam cah.

²¹Ti Zuda Makabe micina ɓi naŋ na, a kuso madiɗa ngi sojeheye. A ɓa misi may zlilihaya, a hiɗikaka sukum taŋhaya le ti dala. Vur dala sina, a pulaka mesene taŋhay a kilam, ɓa a sa mbuɗoko ng’ar taŋ teehe.

²²Zuda a ɓa mizli a kiɗaka taŋ vagay vagay, a dirba nah, a tiɓi walahay muguno ti moholoy mucuwo.

²³Ar vurum naŋhay gar, a ra lum bugawla, ar walahay muguno ti mohol mucuwoy na, a kiɗ mizli fineˀ durmuk kukur cuw.

²⁴Dambalaka, Timote, Zudehey mulumam bugawla ar naŋ dumbuŋ tuwa, a hil mizli mulakay haɗa, yo a so ti pilisey haɗa ti Azi. Joˀ a ram ati soje naŋhaya nga tuɓa walahay Zude ti vurum.

²⁵Ti Timote migweˀ ngi ndil na, Makabe ati mizli naŋhay a tumbuloko Buymisemuŋ, hirnga tullo ti mereɓ, waɗ zana ngi vagay hirlak hirlak a dingiriŋ.

²⁶A a hurkom huruk huruk a ruwuy, asi virzi ngi li gi mikuli. A cufuɗaka Buymisemuŋ ɓa a ga taŋ mezleŋ. Anja a tiri mesene ngi mesene taŋhay, yo mizli mazliram ti taŋ ta na, a zlir ti taŋ ta, kaɓa naŋ miɓa ar ɓimujuwa na.

²⁷A dirba taŋ mikiɗaka mi ngi diradibiɗ nah na, a hilaka gwat ngi vurum taŋhaya. A bam, a ram kileŋ avi Zeruzaleme. Taŋ mindilam gweˀ avi mesene taŋhay na, a cicam.

²⁸Put ngi miprik naŋ na, pas mira bo ndurro na, a zlaka gi vurumo tika tika. Ɓa a gaka gwata gu, a lumam bugawla na, Zudehey a njaham hiri asi gidaŋ taŋ, amma wãˀ naŋ na, a njaham hiri asi Bumbulvuŋ. Mizli mekelemeye, a pulaka vu taŋ mbak da himaˀ taŋ mufõh fõh maru taŋ.

²⁹Kiɗa vu mubul vu muduba na, mesene ngi Zudehey a puram misi pilisey zlum, misi lejeŋ ngi ɓiri hirngahay. Mizli naŋhaya taŋ kuyu gwatta, a pam sek a mbuŋ Zudeheye.

³⁰A kaka Zuda Makabe ɓaˀ a wuzla, joˀ a ɗumoko ti gwat ngi vurum taŋhay, ɓa a lum waˀa neˀ ta. A mulaka mizli ti luvut waɗ wucuɗ ngi vuŋ, dar a ga hiri dirzliw da mizli, a muɗa taŋ didak, a waham mber mber.

³¹A slam ˀay ngi mizli misi saraya, durmuk kukur cuw ti mizli skat skat zlum waɗ misi pilisey, mizli skat skat merkeɗe.

³²Timote ti haŋ naŋ, a kil, a ra ɗum ar li miyaŋ majiginaka kuy kuy, a zilaka li nah Gazara, mawa li nah vuna i Kereyas.

³³Amma Zuda Makabe ati mizli naŋhaya, a gunoko li nah ti wirwir taŋ, hã hin mufaɗa.

³⁴Mizli ngi digahaya, a purakakaɓa li nah, i li pula vu. Vurˀe, a ra zaka Buymisemuŋ ngi Zudeheye varvar, yo mizli mizlaka taŋ ngi kiɗa vu na, a ra zaka taŋ ko mbak le ta.

³⁵Li a ra wun muzlum naŋ muduba, gawla ngisi soje ngi Makabehey kukur cuw, a zuɓam himaˀ fõh fõh ng’ar mizli mazaka Buymisemuŋ tuwa. A hurdumom hirdam, mevele ka vu, a ngiram baɗ ar mohol vuna si. A kiɗam mbur taŋ mulumam le gar.

³⁶Mizli mekelmeye, a gaka ka nah ya, a zloko kiɗ taŋ ti dirba. A ɗuvaka vu da li ngi ndil ng’ar taŋ ti tuwaˀhaya, a jam dali vuhoy, a wuraka mizli mizi Buymisemuŋhoy tuwa titiri. Mizli mekelemeye, a ngilaka mizlingre, a pulaka jiviɗ da is ngi sojeheye a cam, mutuɓaka walahaya dumbuŋ i taŋ.

³⁷Timote a ɗum le zle ar vigiɗi, a jaka, a slaka ˀay naŋ waɗ sukum naŋ Kereyas ati Apolofana.

³⁸A dirba gwat madiɗa taŋ migaka hana na, Zudeheye, a gaka sise da Bumbulvuŋ ti dimis, a hunumakaŋ, asi a ga mezle le haɗi da Israyele, yo a vula taŋ bugawla le ma.