Read South Giziga 2 Mak 11 Bible Online

2 Mak 11 - South Giziga bible

2 Mak 11

¹Lisiyas, mbur migila buy, yo i muy naŋ ma, miwa gwat ngir zuma buyo i naŋ, mevel a jaŋ le haɗi, neˀ a dirba naŋ na,

²a kus soje misi saray, gwat ng’avi mizli durmuk kukur dangafaɗ, waɗ mukukuro pilis naŋhaya gar, joˀ a cuh nga zlira dibiɗ ati Zudehey. A juwa a mevele ɓa a tiri ti Zeruzaleme, walahay ngi Grekey.

³A wuɗ ɓa mizli a wurkam buutu vur hay ngi Buymisemuŋ kaɓa mawurkaka vur li gi mikuli ngi sukwi mekelemey na. Slra ngi masay madiɗa, a wuɗ ɓa a hiɗika ti hiɗik vur vi gar.

⁴Ko a wuluk neˀ le ar gidaŋ ngi Buymisemuŋ ta. Amma, a pula mevel naŋ mbak vur soje misi sar naŋhay ada durmuk mbeˀ mbeˀ, mukukuro pilis naŋhay durmuk mbeˀ mbeˀ, waɗ begenehey kukur dangafaɗ na.

⁵A ci nga wlahay Zude, a ndil seŋseŋ a Betsur, walahay muguno ti mohol, a gi avi Zeruzaleme gwat ngi kilometir kukur cuw nga dangafaɗ. A sur di sor ngi kiɗa vu.

⁶Ti Makabe ati mizli naŋhay micinaka, Lisiyas a ndaha walahay muguno ti moholoyo le ngi kiɗa vu na, a kuso mizli cek, yo a jumomˀay gar, a tumbuloko Bumbulvuŋ ti niˀic waɗ ti tuwuy kol kol, ɓa Bumbulvuŋ a slino ti modro mezle, ngi laha Israyele.

⁷Zudas Makabe vuna, a hila gwat ngi vurumoyo dumbuŋ, a vula gidaŋ da mizli mekelemeye, ɓa a pulaka vu taŋ mbak da mendere ati naŋ, ngi kila widi ngi sukum taŋhay. A bam zingif zingif arleˀe ti wirwir ngi vu.

⁸Aram kileŋ avi Zeruzalem vuna t’aruŋ si na, a puram mukuro pilis, zana babara ɓaˀ avu vu, a ki ɓaˀ a mbuŋ taŋ. A ra kucuwura gwat ngi vurum ngi ɓiri hirngahay.

⁹Joˀ taŋ gar, a gaka sise da Buymisemuŋ mupura ircece na. A ga taŋ vu kufaˀ, a juwam vu le ngi zliga vu gor njoŋ, anta i mizli pal mata, amma ko gwat miji vu misi moˀore haɗahay, ko mohol ngi ɓiri.

¹⁰A girjaham, cinjah cinjah ngi gi vurum. Miɓaˀ a mbuŋ taŋ, i mbur muso ti muŋ, Bumbulvuŋ mupura taŋ ircece mislino di ngi kiɗavu tisi taŋ tuwa.

¹¹A kilam jik dibiɗ ng’ar mesene taŋhaya kaɓa moboroy. A kiɗam mizli misi saraya, durmuk kuruˀ ngaŋ kaˀ, mukuro piliseye, durmuk ti mizli skat skat merkeɗe. Joˀ a tikaka ˀay da soje mesene taŋhaya, ɓa a kilam.

¹²Vendeke ngi mizli mikilama, taŋ ti waˀa, manja gwat ngi vurumoy. Liziyas vuna ti haŋ naŋ, a lihi ti kil mesem mesem.

¹³Amma Liziyas vuna, i gilaw ta, a wuluk le ar mikiɗakaŋ gu na. A sina le, Zudehey anta tikamˀay ta. Asi Buymisemuŋ migidaŋ a ra kiɗ vu tisi taŋ. Liziyas a slino mislinay ng’avi taŋ,

¹⁴ɓa a ɓaka taŋ ɓi zuy ti gi gwat mizli gar matuɓaka, ɓa a ra ɗiyam ɓi ati boyo, ɓa a tiri ngama taŋ.

¹⁵Makabe makislimiɗ ar zuy ngi mizli ngisi ruwuyo, a tuɓa mingiɓi ngi Liziyasa gar. Yo gwat Makabe mutoho ti tuh da Liziyas vur ɓi ngi Zudehey na, buy a tuɓa le.

¹⁶Letir, Liziyas mutoho da Zudehey na, n’ani: «Liziyas a ra ja haŋ da Zudehey gar.

¹⁷Zaŋ ati Absalom, mijiviɗ kumoy a vilikiy ɗerewol misenna le, yo a tumbulikiy ɓa i mbiɗi mi ar ɓi ngi raˀahaya.

¹⁸Ɓi ngi ɓi da buy gar na, i ɓaŋ di,yo gwat misi yi ga gu ya na, i i zil mi le.

¹⁹Da kumo kum kuy kuy ati ngumna na, naɓa ya kwana, i sa tum vu tumbuŋ, ɓa i gi slra ɓa i gukum mezle ya.

²⁰Vur ɓi ngi cufuɗ oy miwal wal na, i ɓa le da mislin kumoy ati mizli ɗuwoyo, ɓa a ra ngilam wuy ati kum.

²¹Zikam zuy zuy. ‹Mitoho ar hin mukukur cuw nga mufaɗ ngi kiya Zewus Korente, ar vi miskat ti kukur mufaɗ nga dangafaɗa.›»

²²Mingiɓi ngir letir buy mutoho, n’ani: «Buy Antiyokus a ra ja haŋ da sukum naŋ Liziyasa.

²³Zle ti baha micuh nga luma kulihey na, yi ra wuɗ ɓa mizli ngir li ya mazum buyo, a gaka slra taŋ manja a gaka taŋ ngaˀa.

²⁴Ani i cina na, Zudehey anta wuɗam sirik ngi Grekey, cine ɗu muwuɗ a vula taŋ di na ta. Amma a wuɗam nga taŋ, i sirik mipal kine, a wuɗam ɓa a pulaka taŋ, a sipam ɓimujuwa taŋhay.

²⁵Ya yi wuɗ le ɓa sukwi nana vuna, a ndir manja bonoy. I wuɗ le ɓa a vulaka taŋ hay ngi Buymisemuŋ taŋ amuŋ, yo anja a pulaka taŋ a gaka gwat taŋhay kaɓa sirik ngi dideˀ taŋhay mawuɗu.

²⁶Anja ki slin mbur le ng’avi taŋ na kuy, yo ɓa ki vula taŋ haŋ, da taŋ misa sinaka gwat ngi gi ndra le muduba na, a sa pulam ndra mevel taŋ, a sa vam hiipas ar slra nga taŋhaya ti mevel purla.»

²⁷Letir buy mutoho da mizli Zudeheye n’ani: «Buy Antiyokus a ra ja haŋ da kus ngi mingila wuy ngi Zudehey ati mizli mekelemey gar.

²⁸Yi wana, kum ada zuy zuy, gwat ya maŋhiya na i nah so. Ya kwana, ya zuy zuyo ya.

²⁹Menelas a ɓiy na, ki wuɗam ki mam nga hay kum, ɓa ki ra gam slra kumoy kini.

³⁰Naŋ kine, mbur gar masa mi nga hay naŋ dumbuŋ ar hin kukur makir ngi kiya Zaŋtik [2] na, y’anta sa kutaŋ ta.

³¹Zudehey gar a sa zumam gwat taŋ mawuɗam, a sa sipam ɓimujuwa taŋhay kaɓa misi zleˀe amuŋ. Da mbur pal asi taŋ a gi gwat malambaˀ le manja sin na, anta sa kutakaŋ ti bonoy ta.

³²Yi slina Menelasa le, ɓa a ra tislukum mevel ma.

³³Zikam zuy zuy so. Mitoho ngi hin kuru nga zlum ngi kiya zaŋtik, ar vi miskat ti kukur mufaɗ nga dangafaɗa.»

³⁴Romahay kwana, a tohoko letir ani da Zudeheye: «Kintus Mimiyus ati Titus Maniyus waɗ Maniyus Sergiyus, mijiviɗ ngi Romahaya, a ra jaka haŋ da Zudeheye.

³⁵Gwatay, Lisiyas ‹muy ngi buy› mupulukum jiviɗ taŋ na, ndr’i pulukum di le ya.

³⁶Amma gwat naŋ mupula ɓi naŋ da buy na, da kum muwunjulaka ɓi naŋ le na, slinoko ndra mbur kutum, ɓa i bugaka ɓi naŋ da buyo, i ram ti me tisi kum, asi i ra ram nga Antiyos.

³⁷Slinoko ndra ti mizli kutum, ɓa ndra kwana, i sinaka wuluk kumo ya.

³⁸Zikam zuy zuy so. «Mitoho ngi hin kuru nga zlum ngi kiya zaŋtik , ar vi miskat ti kukur mufaɗ nga dangafaɗa.