Read South Giziga 2 Mak 12 Bible Online

2 Mak 12 - South Giziga bible

2 Mak 12

¹Ti Liziyas mujumomˀay ati Zudehey na, a mo ng’avu buy amuŋ, dar Zudehey a vulaka vu taŋ taˀ ngi gi slra ngi hufu.

²Amma lamuɗo ngi digahay, ti Timote ati Apoloniyus, ziri ngi Geneyus, Hiyeronim ati Demofoŋ waɗ madiɗa ngi soje ngi ruwuy Siprehey bac ng’avi taŋ na, ko anta pulaka Zudehey a muskam vu neˀ ta, yo a pulaka taŋ setette neˀ ta ma.

³Mizli Zafahay a gam moˀore madiɗa mipal kine. A zilaka Zude misi ar walahay taŋhaya, ɓa a jiɗam ati ngwas taŋhay waɗ ziri taŋhaya ar palalamay taŋ miɗiyaka taŋ hĩˀĩ, ɓa a laˀam ar mubuliy. A gam kaɓa taŋ i ngama ngi Zudehey.

⁴Mizli ngir walahay a cicaka ɓi nah le gar taŋ, joˀ Zudehey kwana, a tuɓaka mi taŋ, ngi buga taŋ di, a wuɗam nga taŋ i ndir zuy zuy, yo t’anta ti zluwun a mevel taŋ neˀ. Amma ti taŋ mindilam a wuzla mubuliy na, a paka taŋ cek ng’asi yam. A gam gwat ngi mizli skat skat cuw gu.

⁵Zudas micina, migaka moˀore da sukwi naŋ na, a cikila mizli naŋhaya.

⁶A diram dibiɗ da Buymisemuŋ, migi kiita mijeŋŋe, joˀ a ram ng’avi mikiɗa sukum naŋhay tuwa. Ngi duvuɗo, a ɗuva vu da li pi sar ngi palalamaya, a wura palalamaya, yo mizli muɗumom akẽh na, a kiɗa taŋ vagay vagay.

⁷Zuda a ru ti wuluk, a sa mo kutum ngi ngizla mizli ngi Zopeheye ma, na mana, mizlingreŋ ngi walahay i migicahay.

⁸A cina na, mizli Zamniyahay a ra wuɗam a ngizlaka Zudehey misi ar walahay taŋhaya, kaɓa ngi Zafahay migaka tuwa ma.

⁹A zla mizli Zamniyahaya ngi nduvuɗ vuna ma. A ɗuva vu da li pi sar ngi palalamaya div div, a wura palalamaya, hã vu naŋ a puram njihhe seŋseŋ a Zeruzalem, a gi gwat ngi kilo metir kukur mufaɗ nga zlum gu.

¹⁰A dirba nah, Zudas ati mizli naŋhay a ram nga Zamniya, ɓa a ra kiɗam vu ati Timote. A baˀam avi walahaya gwat ngi kilo metir cuw aruŋ sina, mizli Arapay a soko ng’ar taŋ. Misi saray a gam gwat ngi mizli durmuk zlum gu, yo misi pileseye, a gam gwat ngi mizli skat skat zlum gu.

¹¹Akẽh, kiɗa vu madiɗa a zli. Amma mizli ngi Zudahaya, Buymisemuŋ a jina taŋ, joˀ a lumam bugawla. Mizli Arapay, macifam joˀ ar li purla ta, Zudehey mitikaka taŋ ˀay tuwa, a cufuɗaka Zudasa ɓa a ndiram zuy zuy ati taŋ. A sa vulaka taŋ ginewey, yo a sa gaka taŋ sukwi ngi slrahaya gar.

¹²Zudas mupura keɗ keɗ na, a sa gakaŋ slrahaya haɗa gisiŋ, joˀ a cifam zuy zuy ati taŋ. Taŋ mujumomˀay ar wala taŋ jom si na, Arapay a mam ng’ar guɗuk taŋhay amuŋ.

¹³Zudas a zli walahay mekelem ada ma, a zilaka Sasfo. I muguno le ti mohol, yo mizli ngi raˀahaya, i sukwi wal wal haɗa.

¹⁴Mizli ngi digahay a njaham hiri asi mohol taŋ migidaŋ haɗa, yo gwat ngi zumo ada haɗa, dar a zaka Zudas ati mizli naŋhaya ti zi. Yo bac nga meˀe ma na, a zaka Buymisemuŋ ti mingiɓi misi, a guw mahiri nah ta wãˀ.

¹⁵Amma Zudas ati soje naŋhaya, a zilaka Buy madiɗa miwa duniya kurzluˀo, ɓa a jina taŋ. Ti hin ngi Zozuwe zleˀe na, Buy madiɗa miwa duniya vuna, a mbizla mohol ngi Zeriko manja gwat ngi mbizli naŋ, manja masin ngi mbizla haya.

¹⁶Taŋ mutuɓaka walahaya asi wuɗ ngi Buymisemuŋ na, a ngizlaka mizli ko a slufam ta, hã futuŋ mekelem ada gweˀ na, firndiw naŋ gwat ngi metir skat skat mufaɗa, a pur kaɓa a nih le peɗe peɗe ti pumbus muɓul ng’ara.

¹⁷Taŋ mibaˀam tiŋkeh gwat ngi kilometir skat ti kukur mufaɗ na, a ndilam a Karas, a hay Zudehey mazilaka taŋ Tubihey.

¹⁸A lumaka Timote adiga mata. Asi mike na, a sumuɗ le ti ŋkeh, ko a gi gwat neˀ ɓula, amma a pul soje migidaŋhay le haɗa ar li mekeleme.

¹⁹Ti Dosite ati Sosipater, i zeneral ngi soje ngi Zudas Makabehey. Aram ng’avi mizli Timote mupula taŋ ar li ngi ndil ng’ar taŋ tu tuwaˀ tuwa, taŋ haɗa, a gam gwat ngi mizli fineˀ durmuk kuruˀ gu.

²⁰Zudas Makabe kwana, a wuɗuka soje naŋhaya le ti ngay mbeˀ mbeˀe, a cifi mizli madiɗa taŋhaya, joˀ a ru nga zlir dibiɗ ti Timote. Timote naŋ ti mizli misi saray durmuk skat ti kukur cuw, waɗ misi pilisey durmuk cuw ti mizli skat skat zlum.

²¹Timote micina, Zudas a ra ndilo gweˀ na, a slin ti ngwasay ati ziri waɗ gwat mekelemeye ng’ar walahay Karnayim. I li misi sojehey a ndahaka gu ta, yo ci ng’ara naŋ tuwaˀa, asi jiviɗ maru ng’adiga gar na, naŋ kelew kelew.

²²Amma ngay ngi soje ngi Zudasay a bo dumbuŋ, dar zuwun a ga mesene taŋhaya. Buymisemuŋ, mapura gwat gara, a ra buga taŋ vu muduba, dar a waham ngbuw ti kil. Ŋha mizli haɗa awuzla taŋ a lumam waˀa, mekelemey a zligam vu ar wala taŋ teehe ti mi ngi maslalama.

²³Zudas a bi gur ti mevel asi mizli malambaˀhay tuwa. A ngum asi taŋ ti maslalama, gwat ngi mizli durmuk kukur makir gu.

²⁴Timote ti haŋ naŋ, a diɗ le asi haŋ ngi soje ngi Dosite ati ngi Sosipatereye. A tumbulo taŋ haŋ buɗuˀ buɗuˀ, ɓa a pulakaŋ a cuh leleŋ leleŋ. A ɓa taŋ, cine ati sukum ngi mizli taŋhay teehe, ada haɗa asi haŋ naŋ, da gwat a gaŋ le na, naɓa mizli a sa kiɗaka taŋ.

²⁵A dirba taŋ mikiɗam slir hirnga puyuk na, Timote a ɓa taŋ, a sa vula taŋ mizli taŋhaya, manja gwat a ga taŋ. Dar Zudehey a pulakaŋ a ru, asi ɓi taŋ mujuwaka tuwa, ɓa sukum taŋhay a laham.

²⁶A dirba nah, Zudas a ru nga tuɓa Karnayim ati li ngi gi mikuli naŋ da kuli ngwas Atargatis. A sli ˀay da mizli durmuk kukur cuw nga zlum.

²⁷A dirba Zudas mitika ˀay da mesene naŋhay, yo a ngizla taŋ na, a ru ti soje naŋhaya nga zlira dibiɗ ati walahay Efroŋ ma, Liziyasa naŋ adiga. Efroŋ i walahay muguno ti mohol. Gawla migbim gbimey, a roko deŋ deŋ a mbuŋ moholoyo, yo a ra cikam vu kuy kuy. Masin ngi vurum ati gwat ngi vurum mekelemey ada sesek adiga.

²⁸Amma Zudehey mutumbuloko Buy madiɗa miwãˀ masusuyumo mesenehey ti gidaŋ naŋ na, Zudehey a tiram buy ngi walahaya, yo a paka mizli sululu a ruwuy, gwat ngi mizli durmuk kukur cuw nga zlum.

²⁹Taŋ mupulaka li nana na, a ram nga Sitopolis, naŋ zar avi Zeruzaleme, a gi gwat ngi kilometir skat ti kuruˀo gu.

³⁰Amma mizli Zudehey mipam adiga na, a ɓaka taŋ ɓi ngi Sitopoliseye taŋ kuy kuy ati taŋ, yo da taŋ muroko ar bonoy na, ada jinaka taŋ.

³¹Zudas ati soje naŋhay a gaka sise da mizli tayna, yo a ɓaka taŋ ɓa a ndiram kuy kuy ati Zudehey misi nga mbuŋ. Dar a mam nga Zeruzalem amuŋ, naɓa muguzlum ngi pantekoto naŋ gweˀe.

³²A dirba muguzlum pantekoto, a ram nga zlira didak ati Gorziyas, lamiɗo ngi Idume.

³³Gorziyas a bo ti mizli misi saray durmuk makir waɗ misi pilisey skat skat mufaɗa.

³⁴Taŋ mikiɗam vu ndah ndah na, a kiɗam mizli Zudeheye neˀkini si.

³⁵Mbur mekelem ada, a zilaka Dosite, i mbur miwirwir mukuro pilis ngir geɓe ngi Bakenor. A ja Gorziyasa le kaw avi zana, dar a ɗiɗo di gbor gbor, ɓa a so ti mbur minisa nana vuna titiri kine, amma mbur mukukuro pilis a ɗuvo dibiɗ taˀ ng’ar Dosite, a bukoŋ pepesle njaŋ. Joˀ Gorziyas a kil, a ra ɗum ar walahay Maresa.

³⁶Azariya ati soje naŋhay makiɗam vu diga zlezle tuwa, a giram le kupuyah kupuyah. Dar Zudas a tumbulo Bumbulvuŋ, ɓa a buga naŋ tisi soje naŋhay, yo n’ada a buga taŋ jiviɗ ar vurumo.

³⁷A dirba nah, a hiziga widi ngi vurum kaˀ, yo a zli dimis ti mi taŋ, joˀ mizli ngi Gorziyasay a zliɗam hirnga mber mber.

³⁸A dirba taŋ mikiɗam vu na, Zudas a kuso hirnga ngi soje naŋhaya, a ram ng’ar walahay Adulam. Amma ar hin hin ngi sabat mindilo na, a zuɓaka dili taŋhayakaɓa sirik taŋ, dar a gaka mezegwel ngi sabata adiga.

³⁹Li naŋ muwun na, mizli a sa lumaka Zudasa, asi a ndila le ngi hila vagay ngi mizli mikiɗaka taŋ ar vurumo, yo ɓa a ra dikaka taŋ ati muy taŋhay, ar zivi ngi dideˀ taŋhay.

⁴⁰Amma asi zana ngi vagay ngi mbur gar na, a lumam gwat muvula da kuli ngi Zamniyahay, ɓimujuwa a tika Zudeheye le ngi ja haŋ avi gwat tayna ngbaŋ. Soje tayna a lumaka muc asi ɓi ngi mike na, mizli gar a sinaka le muduba.

⁴¹Taŋ gar taŋ a gaka sise da Bumbulvuŋ, migi kiita mijeŋŋe, mabo ti gwat gwat muɗumohoyo ngbay ar li babaraŋ.

⁴²Waɗ mana, a diram dibiɗ, ɓa gwat malambaˀ taŋ migaka na, a puyam avra wãˀ. Yo Zudas mbur mupuɗawa, a vula gidaŋ da mizli naŋhay ɓa a ndiram manja dili, a cam ar mungra ta. Asi gwat migi ani avi mizli migam mungra na, mbur gar a pura le ti hiri naŋ.

⁴³Zudas a cikil dala avi soje naŋhay purla purla gar, a cikil gwat ngi suloy gabal cuw. A slin di nga Zeruzalem, ɓa a gam di mikuli ngi pula mungra nana. Naŋ mubuga, a tuɓa ɓi ngi slikiɗ ngi vagayaya le na, a gi di i gwat mimezle ngi ɗuva hirnga.

⁴⁴Soje mumucamay na, da a tuɓa a sa slikiɗam zleˀe ta na, naɓa diradibiɗ vur mumucahaya, i ngatara, yo i gwat ngi gilaway.

⁴⁵Zudasa, a sina le, mizli mumucam ti gi teŋteŋ avu Buymisemuŋ na, migir taŋ ada mezleŋ. Naŋ masay vur mizli mumucahay na, ɓa mungra taŋhay a puyam avra.