Read South Giziga 2 Mak 13 Bible Online

2 Mak 13 - South Giziga bible

2 Mak 13

¹Ar vi miskat ti kukur mufaɗ nga ngoltir naŋ na, Zudas ati soje naŋhay a cinam na, Antiyokus Epator a ra ru ɓa a zla ruwuy Zude ngi kiɗa vu, naŋ ti mizli haɗa aseˀe.

²Liziyas, mbur migil naŋ, mislakka asi mbur madiɗa ngi si ruwuyo, n’ada aseˀe ma. Naŋ ti soje Grekey, misi saraya, durmuk skat ti kuruˀu, misi pilisey durmuk zlum ti mizli skat skat makir, begenehey kukur cuw nga cuw, waɗ mota ngi vurum misi mufukuhoy, skat skat makire ma.

³Menelas a jum ng’avi taŋ, joˀ a vulaŋ gidaŋ da buy Antiyokuso ti wer ngi tikin naŋ, ɓa a ru nga mbuŋ, anta ngi laha mizli ta, amma ɓa a luma li ngi slra nga naŋ masay madiɗa amuŋ.

⁴Amma Bumbulvuŋ, Buy madiɗa ngi buy madiɗahaya, a slikiɗa mevel fõh fõh da Antiyokuso ng’ar Menelasa. Liziyas a ɓa buyo, gwat malambaˀhay gar masoko na, tisi mbur misi moˀore hana, buy a ɓa mizli ɓa a ram ti Menelasa nga Bere, ɓa a ra kiɗaka vagay adiga, kaɓa ar sirik ngidiga.

⁵Dambalaka ar walahay nah vuna, hay musubur ada, gil naŋ gwat ngi metir kukur cuw nga zlum, fucu mbaf ara. A hirnga naŋ, masin ada, a ra mbiɗi, a slir ti mburo ng’ar fucu tuwa.

⁶Mbur mihila gwat ngir hay ngi Buymisemuŋ le, yo migi mungra madiɗa mekelem le na, a hizigaka ng’adiga, ɓa a ra muc ar fucu tuwa.

⁷Menelas, mbur malambaˀ hana, a muc kanah so, ko a dikaka ta.

⁸Nah i gwat mijeŋ gisiŋ, asi mike na, a ga malambaˀ le haɗa da li gi mikuli, misi vu ati fucu mipal ay ara na, yo naŋ vuna kwana, a sa luma muco ar fucu ya.

⁹Buy Antiyokus, a ra ru ti wuluk naŋ malambaˀ na nga mbuŋ, a wuɗ ɓa a ga bonoy mukuyta wãˀ da Zudeheye, fineˀ ngi cine naŋ maga taŋ di zleˀe.

¹⁰Zudas micina na, a ɓa mizli ɓa a tumbuloko Bumbulvuŋ kap ti duvuɗ ti papas gar, ɓa a kulo widi ngi mizli musuroko taŋ mi le na muduba, asi a pulaka ɓimujuwa taŋ, ruwuy taŋ waɗ hay mipal ngi Buymisemuŋ taŋ le,

¹¹yo ɓa a pula mizli tayna mulumaka hirnga taŋ ti lum wureˀ aruŋ na ta, naɓa a sa diɗam asi haŋ ngi mizli duniyahay.

¹²Taŋ gar a gaka kanah, a tumbuloko Bumbulvuŋ mupura ircece ti tuwuy kol kol, waɗ ti gi dalyam, huruk huruk a ruwuy ko mbak le ta hã hin makir. Zudas a vula taŋ gidaŋ ti mingiɓi, yo ɓa a ndiram a cikeˀeŋ.

¹³Amma a dirba taŋ mikiɗam slir pal taŋ ati mizli micawwahay na, a juwa a kwacay naŋ ɓa a cohom ati soje naŋhaya, ɓa soje ngi buyoy a sa cam heɓe heɓe ng’ar walahay Zude, a tubaka walahay Zeruzaleme na, naɓa taŋ a cohom le. A gaka gwata gar ti jini ngi Bumbulvuŋ.

¹⁴Zuda a pula ɓi ngi kiɗa vu asi haŋ ngi Migi duniya. Dar a tuso didak da mizli naŋhaya, ɓa a kiɗam vu ti mevel purla vur ɓimujuwahay, vur hay ngi Bumbulvuŋ, vur walahay, vur ruwuy ati ɓimicicahaya ma. A pam sar ati soje naŋhay a ciki walahay Modiŋ

¹⁵A juwam ɓi ati soje naŋhaya, a ɓam: «Buymisemuŋ a sa lum bugawla,» a wini mizli miwirwirey a wuzla gawlahaya, dar ngi duvuɗo, a ra zla slala ngi mesene naŋhay misi buy ara. A kiɗam gwat ngi mizli durmuk cuw ar walahay guɗuko. Mizli a zligaka begene madiɗa gur njoŋ jom ti mukur naŋ,

¹⁶mbak mizli a zluwunam, a kilam kilwuy kilwuy ar walahay guɗuko, Zudas ati mizli naŋhay mulumam bugawla na, a mam amuŋ

¹⁷naɓa li ara wun. Zudas ati mizli naŋhay migaka gwat madiɗa hana, mbele Bumbulvuŋ mijigina taŋ.

¹⁸Buy Antiyokus a pura na, Zudeheye taŋ gidaŋ haɗa, a sipi jiviɗ ɓa a tuɓa li mezle taŋhaya ti wer.

¹⁹A ra zla Betsur, walahay muguno ti mohol ngi Zudeheye, amma a ɓuloko di, a kiɗ vu gu ta, a tikakaŋ ˀay.

²⁰Da mizli ngi Bet-Suroyo, Zudas a vula taŋ gwat taŋ miroko ti may naŋ.

²¹Amma mbur soje Zude ada, a zilaka Rodokus, a fa ɓi taŋ miyaŋŋa da soje ngi mesene taŋhay. A sipakaŋ, a jaka, joˀ a kiɗaka vagay.

²²Ngi pas mekelem mana, buy Antiyokus a kiɗam slir ati mizli Bet-suroyo ma ni. A jumomˀay, joˀ Antiyokus a cuh ti soje naŋhaya.

²³A ra zla Zudas ati soje naŋhaya, a lum bugawla ta. Buy a pula Filipe zleˀe a Antiyos, a pulaŋ gwatay asi haŋ naŋ. Amma Filip a slikiɗ ɓi avaŋ, a ga buyo welele. A zla a kiɗam slir ati Zudeheye, a ɗiyam ɓi ati taŋ. A hudum, ɓa gwat ngi gi taŋ mijeŋŋe gar na, a pula taŋ jiviɗ nah, joˀ ɓa a jumˀay ati taŋ. A gi mikuli waɗ ɗuva hirnga da hay ngi Buymisemuŋ, a vul gwatay haɗi ng’arv li mipal wãˀa.

²⁴A tuɓa Zudas Makabe le kuy kuy, yo a cifa Egemonite i lamiɗo, a wa li zle a Ptolemayis hã seŋseŋ a Gera.

²⁵A ru nga Ptolemayise, amma mizli ngi digahaya, hiri a cira taŋ ar naŋ mujumom ˀay ati Zudehey na ta. Mevel a ja taŋ, a wuɗam ɓa a susuyumoko ɓi ngi jumoˀay nah avra.

²⁶Liziyas a jiɗ ng’ar li tila mi. A cik vu migidaŋ naŋ ar ɓi ngi jumoˀay nah. A tisla mevel da mizli, a taˀaka gi mi, yo a vula taŋ wuluk mezle. Dar a ru nga Antiyos. Ti buy muru nga kiɗa vu, yo naŋ misa muɗa vu naŋ avra gar na, gwatay micohomo kahana so.